ផុតថ្ងៃជូនដំណឹងឲ្យរុះរើ អាជីវករលក់ដូរជុំវិញសួនកុមារពោធិ៍​ចិនតុង នៅតែបន្តដាក់អីវ៉ាន់រំលោភចិញ្ចើមផ្លូវជាធម្មតា

ក្រុ​មអាជីវករលក់ដូរបន្លែត្រីសាច់មួយចំនួននៅជុំវិញសួនកុមារពោធិ៍​ចិនតុង បានដាក់របស់របរលក់ដូរយ៉ាអាណាធិបតេយ្យនៅលើដងផ្លូវបណ្តាលឱ្យមានការកកស្ទះចរាចរណ៍ និងប៉ះពាល់ដល់សណ្តាប់ធ្នាប់ សោភ័ណភាព និងសុវត្ថិភាពសាធារណៈត្រូវបានរដ្ឋបាលខណ្ឌពោធិ៍សែនជ័យចេញសេចក្តីជូនដំណឹងឱ្យរុះរេីចេញ។ តែទោះបីមានការជូនដំណឹងយ៉ាងណាក្ដី ក្រុមអាជីវករនៅតែបន្តដាក់អីវ៉ាន់លក់ដូរជាធម្មតា។

តាមសេចក្ដីជូនដំណឹងរបស់រដ្ឋបាលខណ្ឌពោធិ៍សែនជ័យបានឲ្យដឹងថា នៅពីថ្ងៃទី១២ ខែកក្កដា ឆ្នាំ២០២៤នេះ រដ្ឋបាលរាជធានីភ្នំពេញ នឹងអនុវត្តការជួសជុលកែលម្អសួនកុមារពោធិ៍ចិនតុងឡើងវិញ ដែលតម្រូវឲ្យអាជីវករលក់ដូរនៅជុំវិញសួនកុមារពោធិ៍ចិនតុងទាំងអស់ ត្រូវរុះរើចេញឱ្យអស់ពីទីតាំងខាងលើ ដើម្បីបង្កលក្ខណៈងាយស្រួលដល់ការជួសជុល។ សេចក្ដីជូនដំណឹងបញ្ជាក់ថា ក្នុងករណីប្រជាពលរដ្ឋ និងអាជីវករទាំងអស់មិនអនុវត្តតាមខ្លឹមសារនៃសេចក្តីជូនដំណឹងនេះទេ រដ្ឋបាលខណ្ឌ នឹងមានវិធានការចុះរុះរើ និងដកហូតដោយមិនទទួលខុសត្រូវរាល់ការបាត់បង់ ខូចខាត ទ្រព្យសម្បត្តិ និងសម្ភារៈផ្សេងៗ ដែលមាននៅលើទីតាំងនោះឡើយ។

សូមជម្រាបថា នៅជុំវិញសួនកុមារពោធិ៍ចិនតុង ស្ថិតនៅភូមិតាងួន១ សង្កាត់កាកាបទី១ ខណ្ឌពោធិ៍សែនជ័យ ត្រូវបានប្រជាពលរដ្ឋ ក៏ដូចជាក្រុមអាជីវករលក់ដូរបានដាក់តាំងលក់ទំនិញ-សម្ភារៈ លើកដាក់ស្លាកយីហោ សាងសង់សំយ៉ាបផ្ទះនិងសំណង់ផ្សេងៗរំលោភមកលើចិញ្ចើមផ្លូវសាធារណៈ និងផ្លូវសាធារណៈបណ្តាលឱ្យមានការកកស្ទះចរាចរណ៍ និងប៉ះពាល់ដល់សណ្តាប់ធ្នាប់ សោភ័ណភាព និងសុវត្ថិភាពសាធារណៈ។

តែទោះបីមានការជូនដំណឹងយ៉ាងណាក្ដី នៅថ្ងៃទី១៣​ ខែកក្កដា​ ឆ្នាំ២០២៤នេះគេសង្កេតឃើញថា ក្រុមអាជីវករនៅតែបន្តដាក់លក់នៅទីតាំងខាងលេីដដែល៕

អត្ថបទ៖ សុខា