ពលរដ្ឋភូមិខ្ជាយ ស្នើសុំរក្សាមេភូមិ និងអនុភូមិចាស់នៅដដែលបន្ទាប់ពីមេឃុំផ្លាស់ប្ដូរស្ងាត់ៗ

នៅថ្ងៃ២៧ ខែមិថុនា ឆ្នាំ២០២៤ ឃុំជាំក្រវៀន ស្រុកមេមត់ ខេត្តត្បូងឃ្មុំ មានការដោះដូរសមាសភាពស្ងាត់ៗ មេភូមិ គឺលោក កែវ វ៉ា និងអនុភូមិលោក ថុង ហេង នៃភូមិខ្ជាយចាស់ចេញ ជំនួសដោយលោក ជ័យ សុខា ជាមេភូមិ និងលោក ទូច វុទ្ធា ជាអនុភូមិវិញម្តង។ កាដោះដូរមិនចំហរបានដឹងដល់ពលរដ្ឋក្នុងភូមិក៏ផ្ទុះការតវ៉ាចំនួន៥លើកមកហើយរាប់ទាំងព្រឹកថ្ងៃទី១៤ ខែកក្កដា ឆ្នាំ២០២៤នេះ។

លោក កែវ វ៉ា អាយុ៦៨ឆ្នាំ ជាមេភូមិខ្ជាយចាស់ បានបញ្ជាក់ឲ្យដឹងថា រូបគាត់ និងលោក ថុង ហេង បានបំរើការងារនេះជាង១០ឆ្នាំមកហើយ គឺបានបំរើសេវាគ្រប់យ៉ាងជូនដល់ពលរដ្ឋក្នុងភូមិ និងជាមួយថ្នាក់ឃុំមិនដែលមានបញ្ហាអ្វីនោះទេ។ លុះដល់ថ្ងៃទី២៧ ខែមិថុនា ឆ្នាំ២០២៤ ស្រាប់តែមានការប្រកាសដាក់មេភូមិ អនុភូមិថ្មីវិញ។ រូបលោក និងអនុភូមិចាស់ មិនជំទាស់ទេការរុះរើដំណែង តែសូមឲ្យធ្វើទៅតាមបែបបទរដ្ឋបាល។ លោកទាំងពីរនាក់មិនដែលមានកំហុសសោះ  ស្រាប់តែមានការដោះដូរបែបនេះទៅវិញ ដោយមិនមានការប្រជុំប្រាប់រូបលោកទាំងពីរនាក់ និងប្រជាពលរដ្ឋឲ្យបានដឹងសូម្បីម្តងសោះឡើយ។

ប្រជាពលរដ្ឋយ៉ាងច្រើនក្នុងភូមិ បានសំណូមពរដល់លោកមេឃុំ អភិបាលស្រុក អភិបាលខេត្ត សូមរក្សាមេភូមិ និងអនុភូមិចាស់ទុកនៅដដែល ព្រោះលោកទាំងពីរនាក់បំរើការងារជូនពលរដ្ឋបានល្អណាស់។

ទាក់ទិននឹងបញ្ហានេះដែរ ភ្នាក់ងារ កម្ពុជាថ្មី បានទំនាក់ទំនងទៅលោក អ៊ូច យឿន មេឃុំជាំក្រវៀន តាមទូរស័ព្ទលេខ ០៨៨ ៨៧០៥៣៨៣ នៅមឋ៉ោង១ និង២៣.២៤.២៥នាទី ថ្ងៃទី១៥ ខែកក្កដា ឆ្នាំ២០២៤ ជាច្រើនដងដើម្បីសុំការបំភ្លឺ តែមិនអាចទំនាក់ទំនងបាន ៕

អត្ថបទ៖ សាន វិឡែម