ព័ត៌មានជាតិ
កសិករថា តម្លៃម្ទេសអាចម៍សត្វធ្លាក់ចុះជាងឆ្នាំមុន
កសិករជាច្រើនគ្រួសារ ក្នុងឃុំកោះជីវាំង នៃស្រុកឯកភ្នំ ស្ទើរតែដូចៗគ្នា បានត្អូញត្អែរថា នៅក្នុងឆ្នាំនេះ ឈ្មួញបានទម្លាក់តម្លៃខ្លាំងបំផុតសឹងតែមិនធ្លាប់មានពីមុនមកទៅលើទិន្នផលម្ទេសអាចម៍សត្វដែលពួកគេប្រមូលផលបាន បើធៀបទៅនឹងតម្លៃដែលលក់បានក្នុងរដូវកាលប្រមូលផលតែមួយកាលពីឆ្នាំ២០២៣ កន្លងទៅ។
ប្រជាកសិករបានផ្តល់បទសម្ភាសន៍ជាមួយ «កម្ពុជាថ្មី» ថា ផលដំណាំម្ទេសអាចម៌សត្វដែលពួកគាត់និយមដាំដុះរាល់ឆ្នាំ គឺអាចផ្តល់ចំណូលសម្រាប់ទ្រទ្រង់ជីវភាពគ្រួសាររបស់ពួកគាត់បានយ៉ាងប្រសើពីមួយឆ្នាំទៅមួយឆ្នាំ ក្រោយពីរដូវកាលធ្វើប្រហុក ត្រូវបានបិទបញ្ចប់ក្នុងខែមេសា។
ប៉ុន្តែនៅឆ្នាំនេះស្របពេលទិន្នផលម្ទេសអាចម៌សត្វ អាចហុចផលបានល្អប្រសើជាងរាល់ឆ្នាំ បែរជាឈ្មួញទម្លាក់ថ្លៃខ្លាំងបំផុត ដែលមិនធ្លាប់កើតមានគឺ ១គីឡូក្រាម ម្ទេសស្រស់លក់បានតែ ៤៥០០រៀលតែប៉ុណ្ណោះ ខណៈឆ្នាំមុនៗលក់បាន ១គីឡូក្រាម ១,២០០០រៀល ឬលើសនេះផងក៏មាន។
ពួកគាត់ បន្តថា បើសិនជាតម្លៃនៅតែដូចឆ្នាំនេះទៀត នៅរដូវកាលបន្ទាប់ទៀតនោះ ពួកគាត់នឹងឈប់ដាំដុះបន្តទៀតហើយ ជៀសវាងកុំឲ្យឈ្មួញឆ្លៀតឱកាសកេងចំណេញច្រើនជាងពួកគាត់ដែលជាអ្នកហត់នឿយផ្ទាល់ និងជួបផលលំបាកក្នុងការដឹកជញ្ជូនទៅលក់លើទីផ្សារដោយខ្លួនឯង។
ដោយឡែក អ្នកស្រី ម៉េង សារ៉ាន់ រស់នៅភូមិអន្លងត្អួ ឃុំកោះជីវាំង ស្រុកឯកភ្នំ បានឲ្យដឹងថា៖ «ខ្ញុំបានដាំម្ទេសនៅលើផ្ទៃដី ២រ៉ៃ ដែលរដ្ឋបានកាត់ឆ្វៀលឲ្យនៅក្រោយផ្ទះ ក្រោយពីមុខរបរធ្វើប្រហុក ខ្ញុំឆ្លៀតដាំម្ទេសអាចម៌សត្វ ដើម្បីរកកម្រៃបន្ថែមសម្រាប់បម្រើដល់ជីវភាពគ្រួសារ និងផ្តល់សម្រាប់កូនរៀន ឲ្យបានប្រសើរដូចគេឯង។ បើគិតទិន្នផល ម្ទេសអាចម៌សត្វ ខ្ញុំប្រមូលបាន ៨០០គីឡូក្រាម ក្នុង ១ខែ តែលក់បាន ១គីឡូក្រាមតែ ៤៥០០រៀល ម្ទេសស្រស់ តម្លៃនេះខុសគ្នាឆ្ងាយណាស់ពីឆ្នាំមុន។ កាលឆ្នាំមុនខ្ញុំលក់បាន ១.២០០០រៀល ក្នុង ១គីឡូក្រាម បើតម្លៃនៅតែថោកដូចឆ្នាំនេះ ខ្ញុំឈប់ដាំទៀតហើយ ព្រោះតម្លៃនេះ ខ្ញុំមិនមិនអាចទទួលយកបានទេ ទាំងដាំ និងថែហត់នឿយណាស់»។
មិនខុសគ្នាប៉ុន្មានទៅហ្នឹងកសិករខាងលើ លោក ផ្លាន វណ្ណៈ ដែលរស់នៅក្នុងភូមិ-ឃុំ ជាមួយគ្នាក៏បានត្អូញត្អែឲ្យដឹងដែរថា «ខ្ញុំដាំបានលើផ្ទៃដី ១រ៉ៃ ដែលរដ្ឋបានប្រគល់ឲ្យហើយប្រមូលបាន ៤០០គីឡូក្រាមក្នុង ១ខែ តែត្រូវបានឈ្មួញទម្លាក់ថ្លៃខ្លាំងដែលមិនធ្លាប់មាន បើម្ទេសអាចម៌សត្វ នៅតែមានតម្លៃថេរតែត្រឹមនឹងដូចឆ្នាំនេះ ខ្ញុំឈប់ដាំហើយ រកដូរមុខរបរផ្សេងវិញ បានប្រសើជាង»។
លោកថា ម្ទេសអាចម៌សត្វ មិនសូវមានកសិករដាំច្រើននោះទេ ហេតុដូចនេះលោកសំណូមពរដល់ឈ្មួញ និងប្រជាពលរដ្ឋដែលនិយមប្រើប្រាស់ម្ទេសអាចម៌សត្វ ជួយលើកកម្ពស់តម្លៃម្ទេសប្រភេទនេះផង ធ្វើយ៉ាងណាឲ្យពួកគាត់មានទឹកចិត្តដាំបន្តទៀត ដើម្បីជាតម្រូវការលើទីផ្សារក្នុងស្រុក ដោយការដាំដុះមិនមានប្រើប្រាស់សារធាតុគីមីនោះទេ គឺដាំតាមបែបធម្មជាតិទាំងស្រុង។
យ៉ាងណាមិញ បើតាមអាជ្ញាធរមូលដ្ឋាន បានគូសបញ្ជាក់ឲ្យដឹងដែរថា នៅតំបន់នេះ ឲ្យតែដល់រដូវទឹកសម្រក ប្រជាពលរដ្ឋ គឺនាំគ្នាដាំតែម្ទេសអាចម៌សត្វប៉ុណ្ណោះ ដើម្បីដោះស្រាយជីវភាពគ្រួសារបន្ថែម ក្រៅពីមុខរបរនេសាទជាលក្ខណៈគ្រួសារ ហើយដំណាំម្ទេសអាចម៌សត្វ ធ្វើបាន ២ដងក្នុង ១ឆ្នាំ និងហុចផលក្នុងរយៈពេល ៣ខែម្តង និងប្រមូលផលធ្វើឡើង ២ដងក្នុង ១ខែ ហើយភាគច្រើនឈ្មួញនាំយកទៅលក់បន្តនៅខេត្តសៀមរាប ព្រោះងាយស្រួលក្នុងការដឹកជញ្ជូនប្រើពេលតិចជាងដឹកចូលក្នុងក្រុងបាត់ដំបង ដែលចំណាយពេលយូរតាមផ្លូវទឹកដូចគ្នា។
បើតាម លោក ហួន សុខ ជាអ្នកដឹកភ្ញៀវទេសចរចូលទស្សនានៅតំបន់បឹងទន្លេសាបព្រែកទល់ ក្នុងខេត្តបាត់ដំបង បានឲ្យដឹងថា «នៅក្នុងរដូវប្រាំង ភ្ញៀវត្រូវធ្វើដំណើរតាមផ្លូវគោកទៅកាន់ខេត្តសៀមរាប រួចបន្តដំណើរតាមទូកស្មាច់ ឬកាណូត ពីផែកាណូតទេសចរណ៍ ចុងឃ្នាសភ្នំក្រោម របស់ខេត្តសៀមរាប ដោយចំណាយពេលត្រឹមតែជាងមួយម៉ោងប៉ុណ្ណោះ បើធៀបនឹងការធ្វើដំណើរចេញពីក្រុងបាត់ដំបងប្រើរយៈពេលពីចន្លោះ ៤ទៅ ៥ម៉ោង ទើបដល់តំបន់នោះ»៕
អត្ថបទ៖ សៅ សារិទ្ធ
-
ព័ត៌មានជាតិ៥ ថ្ងៃ ago
គម្រោងសាងសង់ផ្លូវជាតិលេខ ៧១C សម្រេចលទ្ធផល១០០% ត្រៀមដាក់សម្ពោធឆាប់ៗនេះ
-
ព័ត៌មានជាតិ៤ ថ្ងៃ ago
សមត្ថកិច្ចថា បានហៅលោក ផន ផល្លា ទៅអប់រំ ធ្វើកិច្ចសន្យាឱ្យឈប់បង្ហោះអ្វីដែលងាយយល់ច្រឡំ ប៉ះពាល់សន្តិសុខជាតិ
-
ព័ត៌មានជាតិ៣ ថ្ងៃ ago
អ្នកឧកញ៉ា ឡេង ណាវ៉ាត្រា គោរពអរគុណនាយកទីចាត់ការហ្វឹកហ្វឺនអគ្គបញ្ជាការផ្តល់កងត្រែទ័ព សម្រួលការថតចម្រៀង( ប្រាំសីហាការដ្ឋានប្រវត្តិសាស្រ្តហ្វូណនតេជោ )
-
ជីវិតកម្សាន្ដ៤ ថ្ងៃ ago
ព្រឺរោម!! វីដេអូចម្រៀងប្រវត្តិសាស្ត្រ នៃកាបើកការដ្ឋានព្រែកជីកហ្វូណនតេជោ ដែលមានអ្នកច្រៀងរួមគ្នា ជាង៣០០០នាក់
-
ព័ត៌មានជាតិ៥ ថ្ងៃ ago
សមាជិក ប.ស.ស ចំនួន ៣២០ នាក់ ហើយ បានដាក់ឯកសារស្នើសុំប្រាក់សោធន
-
សេដ្ឋកិច្ច៣ ថ្ងៃ ago
ចំណុចចាប់ផ្តើមផ្លូវល្បឿនលឿនភ្នំពេញ-ប៉ោយប៉ែត ស្ថិតនៅខាងជើងវិមានឈ្នះឈ្នះ
-
ព័ត៌មានជាតិ១ សប្តាហ៍ ago
ម្ចាស់Camcar collection លុបវីដេអូ និងសំណេរចេញពីបណ្តាញសង្គម ដើម្បីបញ្ចប់រឿងជាមួយអ្នកឧកញ៉ា លី សុភ័ក្ត
-
ព័ត៌មានអន្ដរជាតិ៤ ថ្ងៃ ago
ជម្លៀសខ្លួនប្រជាជននៅកោះត្រល់ ក្រោយភ្លៀងធ្លាក់ខ្លាំង១២ម៉ោងជាប់គ្នា