ប ស ស ក្រើនរំលឹកសមាជិកត្រូវបង្កើនការប្រុងប្រយ័ត្នខ្ពស់ចៀសវាងការចាញ់បោករបស់ជនអនាមិក

ប.ស.ស. បានធ្វើការក្រើនរំលឹកដល់សមាជិករបស់ខ្លួនត្រូវមានការប្រុងប្រយ័ត្នខ្ពស់ដើម្បីចៀសវាងការចាញ់បោកបញ្ឆោតពីសំណាក់ជនខិលខូច ឬក្រុមជនអនាមិញដែលបានក្លែងបន្លំគណនី ឬកុងធនាគាររបស់ ប.ស.ស.នាំឱ្យខាតបង់ប្រាក់កាក់ ឬទ្រព្យសម្បត្តិផ្សេងៗ។

ការក្រើនរំលឹកនេះបានធ្វើឡើងបន្ទាប់ពី ប.ស.ស. បានជូនដំណឹងដល់សាធារណៈជនពិសេសប្រជាពលរដ្ឋដែលសមាជិក ប.ស.ស. ទាំងអស់មេត្តាជ្រាបថា ថ្មីៗនេះមានករណីឆបោកទៅលើសមាជិក ប.ស.ស. តាមរយៈបង់ភាគទាន
ដោយជនឆបោកបានផ្ញើសារទៅសមាជិក ប.ស.ស. ដោយផ្ទាល់ និងបានបញ្ចុះបញ្ចូលឱ្យសមាជិក ប.ស.ស. បង់ប្រាក់មកគណនីធនាគាររបស់ខ្លួន។

សូមបញ្ជាក់ថា សម្រាប់សមាជិក ប.ស.ស. ជាបុគ្គលស្វ័យនិយោជន៍រាល់ពេលបង់ភាគទានមក ប.ស.ស. ត្រូវរកមើលពាក្យ “ប.ស.ស.បង់ភាគទានស្វ័យនិយោជន៍ ” ឬជាភាសាអង់គ្លេស “NSSF Self Employed” ហើយប្រសិនបើពេលចុចបង់ភាគទាន តែមិនមានឃើញឈ្មោះដូចខាងលើទេ គឺមិនមែនជាគណនីរបស់ ប.ស.ស. ឡើយ ដូច្នេះសូមកុំចុចបង់ព្រោះជាការឆបោករបស់ក្រុមជនអនាមិក។ សម្រាប់មានចម្ងល់ផ្សេងៗ ឬមានការសង្ស័យណាមួយ សូមលោកអ្នកខលមកលេខ ១២៨៦ ឬ ១២៩៧ ឬអាចឆាតមកកាន់ Facebook Page ប.ស.ស. ឬតាមរយៈ Telegram Group ផ្លូវការរបស់ ប.ស.ស.៕

អត្ថបទ៖ សំអឿន