ព័ត៌មានអន្ដរជាតិ

លោក ហ្សេលេនស្គី ចង់ធ្វើកិច្ចប្រជុំសន្តិភាពអ៊ុយក្រែនលើកទី២ ហើយអញ្ជើញរុស្ស៊ីចូលរួម

បានផុស

៣ ខែ មុន

នៅ

ថ្ងៃអង្គារ ១៦ កក្កដា ២០២៤

ដោយ

Chheang

ប្រធានាធិបតីអ៊ុយក្រែន បានបង្ហាញពីបំណងចង់បង្កើតឲ្យមានកិច្ចប្រជុំសន្តិភាពជាលើកទី២ នៅខែវិច្ឆិកាខាងមុខ ដើម្បីស្វែងរកសន្តិភាពឲ្យអ៊ុយក្រែនសាជាថ្មីម្ដងទៀត ហើយលោក ហ្សេលេនស្គី បាននិយាយថា តំណាងរបស់ប្រទេសរុស្ស៊ី គួរតែចូលរួមនៅក្នុងកិច្ចប្រជុំនេះផងដែរ។

ប្រធានាធិបតីអ៊ុយក្រែន លោក Volodymyr Zelenskiy (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថិតនៅក្នុងសន្និសីទសារព័ត៌មាននៅក្នុងទីក្រុងកៀវ កាលពីថ្ងៃចន្ទទី១៥ ខែកក្កដា ឆ្នាំ២០២៤ លោក ហ្សេលេនស្គី បាននិយាយថា “ខ្ញុំបានកំណត់គោលដៅថា នៅក្នុងខែវិច្ឆិកា យើងនឹងមានផែនការត្រៀមខ្លួនពេញលេញមួយ។ ខ្ញុំគិតថា អ្នកតំណាងរុស្ស៊ីគួរតែនៅក្នុងកិច្ចប្រជុំកំពូលលើកទីពីរនេះ”។ ចំណែកឯ មន្ត្រីអ៊ុយក្រែន បានឲ្យដឹងថា កិច្ចប្រជុំលើកទី២ នឹងមានការពិភាក្សាគ្នាលើគម្រោងសន្តិភាពអ៊ុយក្រែន ហើយតម្រូវឲ្យមានការបែងចែកប្រទេសចូលរួមជាក្រុមៗ ដើម្បីប្រសិទ្ធភាពការងារ។

លោក ហ្សេលេនស្គី មិនបានបញ្ជាក់អ្វីលម្អិតទៀតឡើយអំពីការរៀបចំកិច្ចប្រជុំសន្ដិភាពអ៊ុយក្រែនលើកក្រោយនេះទេ។

យ៉ាងណាមិញ បើតាមមន្ត្រីជាន់ខ្ពស់រុស្ស៊ីកាលពីសប្ដាហ៍មុន ទីក្រុងមូស្គូនឹងមិនទទួលយកការអញ្ជើញណាមួយរបស់អ៊ុយក្រែននោះឡើយ ពាក់ព័ន្ធនឹងបំណងចង់ឲ្យមានកិច្ចប្រជុំសន្ដិភាពជាលើកទី២។ អនុរដ្ឋមន្ត្រីការបរទេសរុស្ស៊ី លោក Mikhail Galuzin បានថ្លែងប្រាប់សារព័ត៌មាន Sputnik កាលពីថ្ងៃព្រហស្បតិ៍ទី១១ ខែកក្កដា ឆ្នាំ២០២៤ ថា “យើងដឹងច្បាស់ពីចេតនារបស់ទីក្រុងកៀវ និងបងធំលោកខាងលិច ដែលប្រឹងលាងខ្លួនពីភាពអាម៉ាស់នៃកិច្ចប្រជុំកំពូលសន្តិភាពបរាជ័យ ក្នុងទីក្រុង Burgenstock នៃប្រទេសស្វីស កាលពីពាក់កណ្តាលខែមិថុនា ហើយកំពុងព្យាយាមរៀបចំព្រឹត្តិការណ៍ស្រដៀងគ្នានេះ។ ពួកគេថែម គិតចង់អញ្ជើញរុស្ស៊ីទៀតផង ទាំងដែលទីតាំងជាក់លាក់មិនទាន់ត្រូវបានកំណត់។ ទោះបីជាយ៉ាងណាក៏ដោយ ភូមិសាស្ត្រមិនមានសារៈសំខាន់ជាមូលដ្ឋានទេ អ្វីដែលសំខាន់ជាងនេះគឺខ្លឹមសារ”។

លោកបន្តថា ប្រទេសរុស្ស៊ី ដឹងច្បាស់អំពីរូបមន្តរបស់លោកហ្សេលេនស្គី ដើម្បីដោះស្រាយវិបត្តិអ៊ុយក្រែន ប៉ុន្តែយើងមិនទទួលយកឱសានវាទណាមួយឡើយ ហើយក៏នឹងមិនចូលរួមក្នុងកិច្ចប្រជុំកំពូលបន្ទាប់ដែរ៕

ដោយ៖ ឈាង