ជីវិតកម្សាន្ដ

នាយ គ្រឿន រម្លឹកកាលពីក្មេង ឮសំឡេងស្តេចអាយ៉ៃលោកតា ព្រហ្ម ម៉ាញ ដឹងតែសប្បាយ

បានផុស

៦ ខែ មុន

នៅ

ថ្ងៃពុធ ១៧ កក្កដា ២០២៤

ដោយ

នាយ គ្រឿន ដែលជាតារាកំប្លែងស្ងួត និងត្រូវជាប្អូនប្រុសបង្កើតរបស់នាយ ពែកមី នោះ បានចេញមុខមកបានរម្លឹកនូវរឿងអតីតកាលរបស់ខ្លួនអំឡុងពេលនៅពីក្មេងៗ ដោយលោកបានបញ្ជាក់ថា ខ្លួនគឺជាអ្នកគាំទ្រវីរសិល្បករអាយ៉ៃដ៏ល្បីគឺលោកតា ព្រហ្ម ម៉ាញ ។ លោកថា នោះឲ្យតែឮសំឡេងស្តេចអាយ៉ៃលោកតា ព្រហ្ម ម៉ាញ តាមមេក្រូដឹងតែសប្បាយអត់ទុក្ខកង្វល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការពិតលោកតា ព្រហ្ម ម៉ាញ គឺជាសិល្បករអាយ៉ៃជើងចាស់មួយរូបដែលមានឈ្មោះបោះសំឡេងយ៉ាងខ្លាំងក្នុងប្រទេសកម្ពុជាដោយលោកគឺជា ដៃគូចម្រៀងអាយ៉ៃដ៏ស័ក្ដិសមជាមួយអ្នកស្រី នួន សារី ហៅ យាយ យ៉យ។ ម្យ៉ាងទៀតលោកតា ព្រហ្ម ម៉ាញ ក៏ជាវីរសិល្បករផ្នែកចម្រៀងអាយ៉ៃដ៏ប៉ិនប្រសប់ដែលពូកែក្នុងការប្រើប្រាស់នូវសំនួនវោហារសព្ទ ឃ្លោងឃ្លានៃពាក្យពេចន៍ខ្មែរដ៏ពីរោះរណ្តំ និងបែបបង្កប់ន័យជ្រៅថែមទៀតផង។

ដោយឡែក រម្លឹកដល់លោកតា ព្រហ្ម ម៉ាញ ,តារាកំប្លែងនាយ គ្រឿន បានរៀបរាប់ភ្ជាប់រូបភាពថា “តាំងពីឲ្យក្មេងឮសំឡេងតាមេក្រូបុណ្យ ឬមង្គលការស្ដាប់ហើយ សើចសប្បាយមិនថាជិត មិនថាឆ្ងាយមកដល់ពេល នេះលោកតា ព្រហ្ម ម៉ាញ មានព្រះជន្ម ៧៤ឆ្នាំហើយ បងប្អូនក៏មិនខុសពីខ្ញុំដែរ“។

គួរបញ្ជាក់ថា វីរសិល្បករចម្រៀងអាយ៉ៃជើងចាស់លោ កតា ព្រហ្ម ម៉ាញ ក៏ទទួលបានគោរមងារកិត្តិយសនៃរាជបណ្ឌិត្យសភាកម្ពុជាគឺជាគោរមងារថា «កិត្តិឧទ្ទេសបណ្ឌិត» កាលពីថ្ងៃទី០៩ ខែមេសា ឆ្នាំ២០២២ កន្លង ទៅ។ លោក ព្រហ្ម ម៉ាញ ជាសិល្បករជើងចាស់មានសំឡេងពីរោះ ពូកែទាំងកំប្លុកកំប្លែង ទាំងសំនួនវោហារ និងការសម្តែងជាដើម។

លោកតា ព្រហ្ម ម៉ាញ មានស្រុកកំណើតនៅខេត្តកំពង់ស្ពឺហើយរូបលោកបានចាប់ផ្តើមចូលវិស័យសិល្បៈនេះតាំងពីឆ្នាំ១៩៧០មកម្ល៉េះដោយកាលនោះ លោកទើបតែមានអាយុ ២០ឆ្នាំប៉ុណ្ណោះ ដែលគិតមកដល់ឆ្នាំ ២០២៤នេះ លោក ព្រហ្ម ម៉ាញ បានប្រឡូកក្នុងសិល្បៈប្រមាណជាង ៥០ឆ្នាំ មកហើយ៕

អត្ថបទ៖ ចាន់រ៉ា