ពលរដ្ឋរង់ចាំការស្ថាបនាផ្លូវបេតុងមួយខ្សែប្រវែងជាង​១ពាន់ម៉ែត្រ ខណៈអាជ្ញាធរចុះវាស់វែងជិត២​ឆ្នាំ​មក​ហើយ

ពលរដ្ឋរស់នៅភូមិទួលពង្រ​ សង្កាត់ចោមចៅទី១​ ខណ្ឌពោធិ៍សែនជ័យ កំពុងរង់ចាំការស្ថាបនាផ្លូវបេតុងចាស់មួយខ្សែចាប់ពីផ្សារទួលពង្រទៅព្រុំប្រទល់ខណ្ឌដង្កោរ​ប្រម៉ាណជា១០០០ម៉ែត្រ​ ខណៈអាជ្ញាធរចុះពិនិត្យវាស់វែង និងឱ្យពលរដ្ឋកាត់សំយាបផ្ទះដែលប៉ះពាល់ជិត២ឆ្នាំមកហើយ។

ពលរដ្ឋបានលេីកឡេីងថា​ កាលពីអំឡុងពាក់កណ្តាលឆ្នាំ២០២២​ អាជ្ញាធរ​ខណ្ឌ​ សង្កាត់​ បានចុះពិនិត្យវាស់វែង​ និងឱ្យពលរដ្ឋដែលរស់នៅអមសងខាងផ្លូវកាត់ដំបូល ឬសំយាបផ្ទះ​ តូប​ ដេីម្បីជៀសវាងការប៉ះពាល់ក្នុងការអភិវឌ្ឍន៍ផ្លូវខាង​លេី។ ជាការសហការដើម្បីបានផ្លូវបេតុងស្អាត ពលរដ្ឋក៏នាំគ្នាកាត់ចេញតាមការណែនាំរបស់អាជ្ញាធរ តែរហូតមកដល់ពេលនេះ នៅមិនទាន់ឃេីញមានការអភិវឌ្ឍន៍​ស្ថាបនាផ្លូវខាងលេីនេះទេ​ ឃេីញអាជ្ញាធរចុះកាយផ្លូវយកសំរាមចេញនៅចុងភូមិខាងកេីតប្រម៉ាណ៥០ម៉ែត្រ។

ពលរដ្ឋបន្ថែមទៀតថា​ ការកាយផ្លូវនេះ អាចប្រឈម និងបង្កគ្រោះថ្នាក់នៅពេលយប់ ព្រោះផ្លូវនេះមិនមានភ្លេីងបំភ្លឺផ្លូវនោះទេ​ ខណៈផ្លូវក៏ខូចទ្រុឌទ្រោមខ្លាំងពេលមានភ្លៀងធ្លាក់តែងជន់លិច និងមានពលរដ្ឋធ្វើដំណើរដួលបង្កជារបួសជាញឹកញ៉ាប់ផងដែរ។

ជុំវិញបញ្ហានេះ លោក​ កង​ វង​ ចៅសង្កាត់ចោមចៅទី១ បានប្រាប់ភ្នាក់ងារ កម្ពុជាថ្មី​ នៅព្រឹកថ្ងៃទី១៧កក្កដា នេះថា ការកាយផ្លូវនៅចុងភូមិខាងកេីតប្រម៉ាណ៥០ម៉ែត្រនោះ​ កន្លងមកពេលមានភ្លៀងធ្លាក់ម្តងម្កាលតែងតែដក់ទឹកលិចផ្លូវ​ ហេីយម្យ៉ាងទៀតពលរដ្ឋតែងយកសំរាមទៅដោះចោលទីនោះ​ ទេីបលោកដាក់គ្រឿងចក្រ​ កាយចេញបញ្ជៀសទឹកលិចដក់លេីផ្លូវ និងហាមមិនឱ្យពលរដ្ឋបោះសំរាមនៅទីនោះបន្តទៀត។ លោកចៅសង្កាត់បន្ថែមថា ចំពោះការស្ថាបនាផ្លូវមួយខែ្សនេះអាចនឹងគ្រោងធ្វេីនៅឆ្នាំ២០២៥ខាងមុខ៕

អត្ថបទ៖ សុខា