ព័ត៌មានអន្ដរជាតិ

រុស្ស៊ី និងអ៊ុយក្រែន ផ្លាស់ប្តូរអ្នកទោសទ្រង់ទ្រាយធំលើកទី៣ មានទាំងនាយទាហាននិងពលទាហាន

បានផុស

៦ ខែ មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

រដ្ឋាភិបាលរុស្ស៊ីនិងអ៊ុយក្រែនដែលកំពុងស្ថិតក្នុងសង្គ្រាមដ៏ក្តៅគគុកនៅឡើយ បានផ្លាស់ប្តូរអ្នកទោសទ្រង់ទ្រាយធំលើកទីបីក្នុងរយៈពេល៧សប្តាហ៍ចុងក្រោយនេះដោយមានអ្នកទោសសរុបចំនួន១៩០នាក់ត្រូវបានដោះលែងរវាងប្រទេសទាំងពីរ។ នេះបើយោងតាមការចេញផ្សាយរបស់ទីភ្នាក់ងារពត៌មាន Reuters នៅថ្ងៃទី១៨ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្លាស់ប្តូរអ្នកទោសចុងក្រោយនេះបានធ្វើឡើងបន្ទាប់ពីការចរចាដែលសម្របសម្រួលដោយប្រទេសអារ៉ាប់រួម (UAE) ដែលបានដើរតួនាទីយ៉ាងសំខាន់ក្នុងដំណើរការកិច្ចព្រមព្រៀងផ្លាស់ប្តូររវាងប្រទេសរុស្ស៊ីនិងអ៊ុយក្រែនដែលប្រយុទ្ធគ្នាអស់រយៈពេលជិត៣ឆ្នាំទៅហើយ។ ជាមួយគ្នានេះដែរប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី (Volodymyr Zelensky) បានប្រកាសថា ជនជាតិអ៊ុយក្រែនទាំង៩៥នាក់ដែលត្រូវបានដោះលែង គឺជាយោធា ហើយបានសម្តែងការដឹងគុណចំពោះ UAE សម្រាប់ការសម្របសម្រួលនេះ។

យ៉ាងណាមិញ បើយោងក្រសួងការពារជាតិរុស្ស៊ី ទាហានដែលវិលត្រលប់មកវិញ នឹងទទួលការពិនិត្យសុខភាព ការស្តារនីតិសម្បទា និងផ្លូវចិត្ត ដោយអះអាងថា ពួកគេស្ទើតែបានប្រឈមមុខនឹងគ្រោះថ្នាក់ដល់អាយុជីវិត ខណៈពេលជាប់ក្នុងការជាប់ឃុំឃាំងរបស់អ៊ុយក្រែន។

គណៈកម្មាធិការសម្របសម្រួលអ៊ុយក្រែនស្តីពីការដោះស្រាយជាមួយអ្នកទោសសង្គ្រាមដែលបានធានានូវការត្រឡប់មកវិញនៃមនុស្ស៣៤០៥នាក់ពីការជាប់ឃុំឃាំងរបស់រុស្ស៊ី បានឲ្យដឹងថា ការដោះដូរអ្នកទោសនេះជាលើកទីបីក្នុងប៉ុន្មានសប្តាហ៍ថ្មីៗនេះ ដែលបានប្រកាសជាលើកដំបូងនៅចុងខែឧសភា ចាប់តាំងពីការចាប់ផ្តើមនៃការលុកលុយរបស់រុស្ស៊ីលើអ៊ុយក្រែនកាលដើមឆ្នាំ២០២២។

ក្នុងចំណោមអ្នកទោសសង្គ្រាមរបស់ភាគីអ៊ុយក្រែន មាននាយទាហាន៧នាក់ និងទាហាននិងពលទាហាន៨៨នាក់ដែលត្រូវបានដោះលែងនៅក្នុងការផ្លាស់ប្តូរចុងក្រោយនេះ ដោយភាគច្រើនត្រូវបានជាប់ឃុំឃាំងចាប់តាំងពីឆ្នាំ ២០២២ ។គណៈកម្មាធិការនេះក៏បានគូសបញ្ជាក់ដែរថា ទាហានអ៊ុយក្រែនដែលវិលត្រឡប់មកវិញជាច្រើននាក់ ទទួលរងពីជំងឺរ៉ាំរ៉ៃ និងត្រូវការការព្យាបាលរយៈពេលវែង ដោយសាររបួសរបស់ពួកគេ។

គួរបញ្ជាក់ផងដែរថា នៅក្នុងការផ្លាស់ប្តូរកាលពីខែមិថុនា រុស្ស៊ីនិងអ៊ុយក្រែនក៏បានប្រគល់ឈ្លើយសឹកចំនួន៩០នាក់ទៅវិញទៅមក ដែលជាការកត់សម្គាល់នៃការបោះជំហានដ៏សំខាន់មួយឆ្ពោះទៅរកការបន្ធូរបន្ថយវិបត្តិមនុស្សធម៌ដែលបណ្តាលមកពីជម្លោះរវាងប្រទេសទាំងពីរ៕