ព័ត៌មានអន្ដរជាតិ

តម្លៃប្រេងកើនឡើង ដោយសារស្ដុកប្រេងអាមេរិកធ្លាក់ចុះច្រើនជាងការរំពឹងទុក

បានផុស

៥ ខែ មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

តម្លៃប្រេងបានបន្តកើនឡើងក្នុងការជួញដូរនាថ្ងៃព្រហស្បតិ៍នេះ ដោយសារតែការធ្លាក់ចុះច្រើនជាងការរំពឹងទុកនៃស្ដុកប្រេងឆៅនៅសហរដ្ឋអាមេរិក ដែលជាប្រទេសប្រើប្រាស់ប្រេងធំជាងគេបំផុតរបស់ពិភពលោក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងនាពេលអនាគតម៉ាក Brent បានកើនឡើង ៥៨ សេន ឬ ០,៧ ភាគរយ ដោយជួញដូរនៅតម្លៃ ៨៥,៦៦ ដុល្លារ/បារ៉ែល នៅព្រឹកថ្ងៃព្រហស្បតិ៍ ខណៈតម្លៃប្រេងឆៅអាមេរិកម៉ាក West Texas Intermediate (WTI) ជួញដូរនៅតម្លៃ ៨៣,៦០ ដុល្លារ/បារ៉ែល ដោយកើនឡើង ៧៥ សេន ឬ ០,៩ ភាគរយ។

ទិន្នន័យចុងក្រោយពីរដ្ឋបាលព័ត៌មានថាមពលរបស់សហរដ្ឋអាមេរិក បានបង្ហាញថា ស្តុកប្រេងឆៅរបស់សហរដ្ឋអាមេរិកបានធ្លាក់ចុះចំនួន ៤,៩ លានបារ៉ែលកាលពីសប្ដាហ៍មុន។ ទិន្នន័យនេះ លើសពីចំនួនធ្លាក់ចុះដែលអ្នកវិភាគសេដ្ឋកិច្ចបានព្យាករ ៣០ ០០០ បារ៉ែល និងការរំពឹងពីការធ្លាក់ចុះ ៤,៤ លានបារ៉ែល ក្នុងរបាយការណ៍ក្រុមពាណិជ្ជកម្មវិទ្យាស្ថានប្រេងអាមេរិក។

អ្នកវិភាគមើលឃើញថា តម្រូវការប្រេងច្រើននៅអាមេរិក បន្ធូរបន្ថយកង្វល់ពីសម្ពាធជុំវិញកំណើនសេដ្ឋកិច្ចយឺតយ៉ាវក្នុងត្រីមាសទី២របស់ចិន ។

អ្នកវិភាគបន្តថា ការរំពឹងទុកពីការកាត់បន្ថយអត្រាការប្រាក់របស់ធនាគារកណ្ដាលអាមេរិក ដែលអាចជួញជំរុញកំណើនសេដ្ឋកិច្ច និងការធ្វើដំណើររបស់ប្រជាជនក្នុងរដូវក្ដៅនេះ អាចធ្វើឱ្យតម្រូវការប្រេងក្នុងស្រុកអាមេរិកកើនឡើងបន្ថែមទៀត៕

Related Topics: