ព័ត៌មានអន្ដរជាតិ

តើករណីឃាតកម្មជនជាតិវៀតណាម ៦ នាក់នៅក្រុងបាងកក អាចប៉ះពាល់ដល់គោលដៅទេសចរណ៍ថៃដែរទេ?

បានផុស

៥ ខែ មុន

នៅ

ថ្ងៃសុក្រ ១៩ កក្កដា ២០២៤

ដោយ

ថ្ងៃពុធ ទី ១៧ កក្កដា គឺជាកាលវិភាគជំនួបរវាងនាយករដ្ឋមន្រ្តីថៃ លោក សេដ្ឋា ថាវីស៊ីន និងរដ្ឋមន្រ្តីក្រសួងថាមពលរុស្ស៊ី លោក Sergei Tsivilev នៅសណ្ធាគារ Grand Hyatt Erawan ដែលស្ថិតក្នុងសង្កាត់ទាក់ទាញភ្ញៀវទេសចរដ៏សំខាន់មួយនៃទីក្រុងបាងកក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាអកុសល ១ ថ្ងៃមុនជំនួបនោះ ពោលគឺល្ងាចថ្ងៃអង្គារ សេចក្ដីរាយការណ៍ពីករណីជនជាតិវៀតណាម ៦ នាក់ស្លាប់ក្នុងសណ្ធាគារដ៏ល្បីឈ្មោះដដែល ក៏ផ្ទុះឡើង ដែលបង្កការចាប់អារម្មណ៍យ៉ាងកក្រើកទូទាំងប្រទេសថៃ និងសកលលោក ដោយគេឃើញគ្រប់សារព័ត៌មានអន្តរជាតិល្បីៗចុះផ្សាយពីសំណុំរឿងដ៏រន្ធត់នេះយ៉ាងគគ្រឹក។

គេមើលឃើញថា ភាពកក្រើកបែបនេះកំពុងបំផុសការចោទសួរផ្សេងៗ រួមទាំងសំណួរដែលថា តើវាអាចប៉ះពាល់ដល់គោលដៅទេសចរណ៍របស់រដ្ឋាភិបាលថៃដែរ ឬយ៉ាងណា និងអាចដល់កម្រិតណា?

ពិតណាស់ ផលប៉ះពាល់អាចត្រូវបានវាស់វែងក្នុងទម្រង់ផ្សេងៗ ហើយច្បាស់បំផុត គឺការផ្អែកលើទិន្នន័យភ្ញៀវទេសចរ ដែលរដ្ឋាភិបាលថៃកត់ត្រាប្រចាំថ្ងៃ។ អ្វីដែលគេដឹងភ្លាមៗនោះគឺថា ភាពរហ័សនៃព័ត៌មាន បង្កជាការព្រួយបារម្ភផ្សេងៗ ដែលនេះមានផលប៉ះពាល់ដោយផ្ទាល់លើកេរ្តិ៍ឈ្មោះរបស់ប្រទេសថៃ ដែលពឹងផ្អែកខ្លាំងលើវិស័យទេសចរណ៍សម្រាប់ដង្ហើមសេដ្ឋកិច្ច។

ក្រោយរឿងនេះផ្ទុះឡើង គេសង្កេតឃើញសារព័ត៌មានមួយចំនួនបានសរសេរនៅលើចំណងជើងព័ត៌មានរបស់ខ្លួនថា «ការស្លាប់យ៉ាងអាថ៌កំបាំង» ដោយផ្អែកលើខ្លឹមសារព័ត៌មានបឋមពីប៉ូលិសថៃដែលថា គ្មានតម្រុយដែលថាជនរងគ្រោះទាំង៦នាក់ជួបបញ្ហាជ្រួលច្របល់អ្វី មុនពេលពួកគេស្លាប់នោះទេ។ បើតាមការចុះផ្សាយរបស់កាសែតអង់គ្លេស Daily Mail មានស្ថាប័នព័ត៌មានខ្លះ ថែមទាំងបានចុះផ្សាយថា វាជាករណីបាញ់សម្លាប់ទ្រង់ទ្រាយធំទៀតផង។

ឆ្លើយនឹងតបបញ្ហានេះ លោកនាយករដ្ឋមន្រ្តី សេដ្ឋា ដែលបានទៅកន្លែងកើតហេតុនៅល្ងាចថ្ងៃអង្គារនោះ បានច្រានចោលនូវព័ត៌មានចចាមអារាម រួមទាំងការណ៍ដែលថា វាអាចជាករណីចោរកម្ម ឬហិង្សា។ ភ្លាមៗ លោកបានបញ្ជាឱ្យមានការស៊ើបអង្កេតយ៉ាងរហ័ស រួមទាំងការធ្វើកោសល្យវិច័យលើសាកសពរបស់ជនរងគ្រោះ។

ច្បាស់ណាស់ ការឆ្លើយតបរបស់លោក សេដ្ឋា គឺជាសញ្ញាដែលថា សំណុំរឿងឃាតកម្មចុងក្រោយ អាចបង្កផលប៉ះពាល់ធ្ងន់ធ្ងរដល់មុខមាត់របស់ថៃ ដែលមានគោលដៅទាក់ទាញភ្ញៀវទេសចរឱ្យបានជាង ៣៥ លាននាក់នៅឆ្នាំ ២០២៤ នេះ ចំពេលដែលសេដ្ឋកិច្ចថៃរំពឹងថានឹងមានកំណើនយឺតយ៉ាវ ហើយត្រូវពឹងផ្អែកជាគំហុកលើវិស័យគ្មានផ្សែងមួយនេះ។

យ៉ាងណាមិញ ការឆ្លើយតបរហ័សរបស់អាជ្ញាធរថៃ អ្នកពាក់ព័ន្ធ រួមទាំងមេដឹកនាំរបស់ថៃផ្ទាល់ អាចចាត់ទុកថាជាជំហានដ៏មានប្រសិទ្ធិភាព ដើម្បីកាត់បន្ថយផលប៉ះពាល់លើវិស័យទេសចរណ៍ ខណៈកន្លងមក ព័ត៌មានជុំវិញបញ្ហាអសន្តិសុខផ្សេងៗ បានធ្វើឱ្យថៃអាប់អួររួចទៅហើយ ដែលទាមទារឱ្យរដ្ឋាភិបាលព្យាយាមស្ដារបញ្ហានេះយ៉ាងឆាប់រហ័ស និងប្រកបដោយប្រសិទ្ធិភាព។

ក្នុងជំហានដើម្បីផ្ដល់ទំនុកចិត្តជូនគ្រប់មជ្ឍដ្ឋាន លោក សេដ្ឋា បានប្រកាសប្រាប់ទៅអ្នកយកព័ត៌មាននៅរសៀលថ្ងៃពុធថា ជំនួបរវាងលោក និងរដ្ឋមន្រ្តីថាមពលរុស្ស៊ី នៅសណ្ធាគារ Grand Hyatt Erawan នឹងប្រព្រឹត្តទៅធម្មតា។ លោកថ្លែងយ៉ាងដូច្នេះថា៖ «នេះមិនមែនជាអំពើភេរវកម្ម ឬកង្វះការការពារសន្តិសុខនោះទេ អ្វីៗគឺល្អ»។

លោក សេដ្ឋា ថ្លែងយ៉ាងដូច្នេះ បន្ទាប់ពីប៉ូលីសថៃបានសន្និដ្ឋាន ក្រោយធ្វើកោសល្យវិច័យសាកសពជនរងគ្រោះតិចជាង ២៤ ម៉ោងថា វាជាករណីអត្តឃាត-ឃាតកម្ម ដោយម្នាក់ក្នុងចំណោមនោះ បានធ្វើអត្តឃាត ដោយដាក់ «ស្យានីត» ដែលជាសារធាតុពុលដ៏សាហាវចូលទៅក្នុងកែវតែ ដើម្បីសម្លាប់ជនរងគ្រោះ៥នាក់ផ្សេងទៀតទៅជាមួយខ្លួន។ ផ្អែកតាមការសម្ភាសន៍ជាមួយសាច់ញាតិ ប៉ូលិសថៃជឿថា សំណុំរឿងនេះអាចជាប់ទាក់ទងទៅនឹងជម្លោះជំនួញ។

ទោះជាយ៉ាងណាក៏ដោយ ភ្លាមៗ គេប្រហែលជាមិនអាចវ៉ាស់វែងយ៉ាងណាពីទំហំនៃផលប៉ះពាល់ ដែលឃាតកម្មចុងក្រោយអាចបង្កជាភាពមិនស្ងប់ចិត្តក្នុងចំណោមភ្ញៀវទេសចរវៀតណាម អាមេរិក ក៏ដូចជាភ្ញៀវទេសចរបរទេសជារួមនោះទេ។ ជនរងគ្រោះទាំង៦នាក់ជាជនជាតិវៀតណាម ហើយ២នាក់ក្នុងចំណោមនោះ មានសញ្ជាតិជាពលរដ្ឋអាមេរិក។

យោងតាមការចុះផ្សាយរបស់កាសែត VnExpress អ្នកនាំពាក្យក្រសួងការបរទេសវៀតណាមលោកស្រី Pham Thu Hang បានប្រាប់អ្នកសារព័ត៌មានកាលពីថ្ងៃព្រហស្បតិ៍ថា ស្ថានទូតវៀតណាមប្រចាំប្រទេសថៃកំពុងសហការជាមួយអាជ្ញាធរក្នុងស្រុកដើម្បីស៊ើបអង្កេតការស្លាប់ដដែល។ លោកស្រី Hang បានបន្ថែមថា វៀតណាមក៏បានស្នើទៅប៉ូលិសថៃ និងក្រសួងការបរទេសថៃ ឱ្យផ្តល់ព័ត៌មានលម្អិតបន្ថែមអំពីករណីនេះ និងស្នើសុំដាក់ពង្រាយវិធានការការពារជនជាតិវៀតណាមផងដែរ។

ជាមួយគ្នានេះ ប៉ូលិសថៃបានសហការជាមួយការិយាល័យស៊ើបអង្កេតសហព័ន្ធ (FBI) របស់សហរដ្ឋអាមេរិក ហើយអ្នកនាំពាក្យក្រសួងការបរទេសសហរដ្ឋអាមេរិក លោក Matthew Miller បានតាមដានស្ថានការណ៍យ៉ាងដិតដល់ និងត្រៀមខ្លួនរួចជាស្រេចក្នុងការផ្ដល់ជំនួយចាំបាច់។

គួរបញ្ជាក់ថា ករណីដ៏កក្រើកដដែលកើតឡើង ប្រមាណតែ២ថ្ងៃប៉ុណ្ណោះ ក្រោយប៉ូលិសថៃបានរកឃើញសាកសពរបស់ស្រ្តីអ្នកមានឥទ្ធិពលលើបណ្ដាញសង្គមជាជនជាតិចិន ដែលត្រូវបានគេរាយការណ៍ថាបាត់ខ្លួនកាលពីជាង២សប្ដាហ៍មុនក្នុងប្រទេសថៃ។ ស្រ្តីជាជនរងគ្រោះដដែល ត្រូវបានជនសង្ស័យជាជនជាតិចិនដូចគ្នាសម្លាប់ ក្រោយជួបគ្នាក្នុងក្រុងបាងកកកាលពីថ្ងៃទី ១ កក្កដា ហើយគេជឿថា វាជាករណីចាប់ជំរិត។

ករណីចាប់ជំរិត បានក្លាយជាក្ដីបារម្ភមួយសម្រាប់ភ្ញៀវទេសចរចិនក្នុងប្រទេសថៃ។ កាលពីខែមិថុនា ប៉ូលិសថៃបានជួយសង្រ្គោះស្រ្តីជនជាតិចិនអាយុ ២៧ ឆ្នាំ ពីការចាប់ជំរិតទារប្រាក់ប្រមាណ ៥ លានយ័ន ក្នុងទីក្រុងបាងកក។ នៅខែមេសា និស្សិតចិនម្នាក់ដែលកំពុងសិក្សានៅអូស្ត្រាលី ត្រូវបានក្រុមក្មេងទំនើបដែលប្រព្រឹត្តការចាប់ជំរិត ល្បួងទៅប្រទេសថៃដើម្បីចាប់ជំរិតទារប្រាក់ ៨ លានយ័នពីឪពុកម្ដាយជនរងគ្រោះ ប៉ុន្តែត្រូវបានប៉ូលិសថៃជួញសង្រ្គោះ។

គួរបញ្ជាក់ថា វាគ្រាន់តែជាករណីចុងក្រោយទាំងប៉ុន្មាន ដែលបំផុសការព្រួយបារម្ភប៉ុណ្ណោះ។ មុននោះ បញ្ហាអសន្តិសុខ ធំៗបានញំញីប្រទេសថៃរួចទៅហើយ។ កាលពីខែតុលាឆ្នាំមុន ក្មេងប្រុសអាយុ ១៤ ឆ្នាំម្នាក់ បានបើកការបាញ់ប្រហារនៅផ្សារទំនើប Siam Paragon ដែលនៅមិនឆ្ងាយប៉ុន្មានពីសណ្ធាគារ Grand Hyatt Erawan ដោយបានសម្លាប់មនុស្ស ៣ នាក់។ ការបាញ់ប្រហារនោះ បានកើតឡើងប៉ុន្មានថ្ងៃមុនខួប១ឆ្នាំនៃការសម្លាប់រង្គាលនៅមជ្ឈមណ្ឌលមើលថែកូនក្មេងក្នុងខេត្ត Nong Bua Lamphu ដោយមនុស្ស ៣៦ នាក់។

ហេតុការណ៍ទាំងអស់នេះ កើតឡើងខណៈរដ្ឋាភិបាលថៃប្រឹងប្រែងយ៉ាងសស្រាក់សស្រាំ ដើម្បីស្ដារវិស័យទេសចរណ៍របស់ប្រទេស ដែលធ្លាក់ចុះដុនដាបក្នុងអំឡុងវិបត្តិកូវីដ-១៩។ កាលពីឆ្នាំ ២០២៣ ប្រទេសថៃបានទទួលភ្ញៀវទេសចរប្រមាណ ២៨ លាននាក់ ដោយកើនឡើង ១១ លាននាក់ ធៀបនឹងឆ្នាំ ២០២២ ប៉ុន្តែនៅតែតិចជាង ៤០ លាននាក់ក្នុងឆ្នាំ ២០១៩ ពោលគឺមុនពេលវិបត្តិកូវីដផ្ទុះឡើង។

កាលពីថ្ងៃចន្ទ ពោលគឺថ្ងៃដែលឃាតកម្មនៅសណ្ធាគារ Grand Hyatt Erawan រដ្ឋាភិបាលថៃបានប្រកាសបន្ថែមចំនួនប្រទេស និងតំបន់ រហូតដល់ ៩៣ ចូលទៅក្នុងបញ្ជីនៃប្រទេសដែលអាចចូលទៅថៃរយៈពេល ៦០ ថ្ងៃ ដោយមិនចាំបាច់ប្រើប្រាស់ទិដ្ឋាការ។

បញ្ហាចុងក្រោយ ថ្វីត្បិតតែមិនអាចទម្លាក់ចំនួនភ្ញៀវទេសចរគំហុកដូចវិបត្តិកូវីដ ប៉ុន្តែនៅតែទាមទារការធានាការផ្ដល់ទំនុកចិត្តពីរដ្ឋាភិបាលថៃ ជាពិសេសផ្នែកសន្តិសុខ ដែលលើសពីការពោលពាក្យរបស់មន្រ្តីថៃ។ ពេលចុះទៅកន្លែងកើតហេតុ រដ្ឋមន្ត្រីក្រសួងមហាផ្ទៃថៃ លោក Anutin Charnvirakul បានថ្លែងថា ករណីចុងក្រោយ «មិនពាក់ព័ន្ធនឹងប្រជាជនក្នុងស្រុក ឬអំពើហិង្សាណាមួយទេ» ដូច្នេះ ថៃនៅតែជាកន្លែងមានសុវត្ថិភាពសម្រាប់ភ្ញៀវទេសចរ៕