ព័ត៌មានជាតិ

ប្រធានផ្សារដើមគរ និងអាជីវករ ត្រៀមលក្ខណៈរួចរាល់សម្រាប់ប្រារព្ធពិធីអបអរថ្ងៃបើកការដ្ឋានព្រែកជីកហ្វូណនតេជោ ខាងមុខនេះ

បានផុស

៩ ខែ មុន

នៅ

ថ្ងៃសុក្រ ១៩ កក្កដា ២០២៤

ដោយ

ប្រធានផ្សារដើមគរ សមាជិក និងបុគ្គលិកផ្សារទាំងអស់ រួមទាំងអាជីវករ បានត្រៀមលក្ខណៈរួចរាល់ សម្រាប់ប្រារព្ធពិធីអបអរថ្ងៃបើកការដ្ឋានព្រែកជីកហ្វូណនតេជោ នាថ្ងៃទី ៥ សីហា ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទិត្យ វុទ្ធី ប្រធានគណៈកម្មការគ្រប់គ្រងផ្សារដើមគរ បានប្រាប់ឲ្យដឹងថា ក្នុងនាមគណៈគ្រប់គ្រងផ្សារ សមាជិក និងបុគ្គលិកផ្សារទាំងអស់ បានត្រៀមលក្ខណៈរួចរាល់ ទាំងសម្ភារៈ និងកម្លាំងចិត្ត សម្រាប់អបអរថ្ងៃបើកការដ្ឋាន ដោយនឹងទូងស្គរ ចាក់បាស បង្កសំឡេងរំពងអឹងកង និងសកម្មភាពនានាផ្សេងទៀត ដើម្បីញ៉ាំងឲ្យថ្ងៃទី ៥ សីហា គឺជាថ្ងៃដ៏អស្ចារ្យរបស់ប្រជាជន និងសង្គមជាតិ។

លោកបន្ថែមថា ព្រែកជីកដ៏មហាអស្ចារ្យនេះ ពុំមែនកើតឡើងដោយចៃដន្យនោះទេ គឺជាការគិតគូរប្រកបដោយគតិបញ្ញាញាណដ៏វាងវៃរបស់ សម្តេចតេជោ ហ៊ុន សែន និង សម្តេចមហាបវរធិបតី ហ៊ុន ម៉ាណែត ដែល សម្តេច ទាំងទ្វេ ប្រមុខដឹកនាំខ្លាំងក្លា បានបង្កើតព្រែកជីកប្រវត្តិសាស្ត្រ ពុំធ្លាប់មាននោះឡើយនៅកម្ពុជា។

លោកបន្តថា ព្រែកជីកនេះ ក៏នឹងក្លាយជាកេរដំណែលដ៏អស្ចារ្យបន្សល់ទុកដល់កូនចៅឲ្យបានដឹងយ៉ាងច្បាស់ថា ព្រែកនេះ កើតឡើងក្នុងសម័យតេជោ ហ៊ុន សែន ដែលជាសម័យកាលរុងរឿង និងសុខសន្តិភាព។

ប្រជាពលរដ្ឋ ជាអាជីវករលក់ដូរក្នុងផ្សារដើមគរ បានបង្ហាញក្តីរីករាយ និងពេញចិត្តបំផុតចំពោះគម្រោងព្រែកជីក ជាប្រវត្តិសាស្ត្រដែលមិនធ្លាប់មានមួយនេះ ដោយពួកគាត់ទាំងអស់គ្នា បានមើលឃើញថា នេះគឺជាការគិតគូរដ៏វែងឆ្ងាយរបស់ប្រមុខថ្នាក់ដឹកនាំ នៃកម្ពុជា កសាងឡើងសម្រាប់ផ្តល់ជាប្រយោជន៍ដល់ប្រជាជនក្នុងយុគសម័យបច្ចុប្បន្ន និងបន្តជានិរន្តដល់កូនចៅរាប់រយជំនាន់ទៅមុខបន្តទៀតផងដែរ។

គួរជម្រាបថា ផ្សារដើមគរ ជាផ្សាររដ្ឋមួយ ក្នុងចំណោមផ្សាររដ្ឋទាំង ២៥ នៅរាជធានីភ្នំពេញ ដែលបានត្រៀមខ្លួនរួចរាល់សម្រាប់ថ្ងៃបើកការដ្ឋាន ជាប្រវត្តិសាស្ត្រ នាថ្ងៃទី ០៥ ខែសីហា ឆ្នាំ ២០២៤ ខាងមុខនេះ។

សូមបញ្ជាក់ថា នាថ្ងៃទី ៥ សីហា ខាងមុខនោះ រដ្ឋបាលរាជធានីភ្នំពេញ ក៏នឹងរៀបចំព្រឹត្តិការណ៍ដ៏ធំមួយ នៅកោះពេជ្រ គឺការប្រគំតន្ត្រីដែលមានអ្នកចូលរួមប្រមាណ ១ ម៉ឺននាក់ ជាមួយនឹងការបាញ់កាំជ្រួចយ៉ាងគគ្រឹកគគ្រេងផងដែរ៕

អត្ថបទ ៖ សុភា