ជនដៃដល់ក្នុងសំណុំរឿងចាក់សម្លាប់ក្នុងវង់ផឹកស៊ីត្រូវបានចាប់ខ្លួន

កម្លាំងនគរបាលនាយកដ្ឋានព្រហ្មទណ្ឌបានស្រាវជ្រាវឃាត់ខ្លួនជនដៃដល់ដែលចាក់សម្លាប់បុរសម្នាក់ក្នុងវង់ផឹកបានហើយ ក្រោយពីព្យាយាមរត់គេចខ្លួន។ ជនដៃដល់មានឈ្មោះ លី ជីវ័ន្ត ហៅ ពយ ភេទប្រុស អាយុ៣៣ឆ្នាំ ជនជាតិខ្មែរ។

ជនដៃដល់ត្រូវបានឃាត់ខ្លួននៅថ្ងៃទី២១ ខែកក្កដា ឆ្នាំ២០២៤ វេលាម៉ោង១៦និង១០នាទី នៅចំណុចភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ និងបានបញ្ជូនមកនាយកដ្ឋាន ដើម្បីសួរនាំបន្ដតាមនីតិវិធី។

សូមជម្រាបថា កាលពីថ្ងៃទី២០ ខែកក្កដា ឆ្នាំ២០២៤ វេលាម៉ោង២១និង២០នាទី មានករណីឃាតកម្មមួយកើតឡើងនៅត្រង់ចំណុច ផ្លូវលំ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បង្កឡើងដោយជនសង្ស័យឈ្មោះ លី ជីវ័ន្ត ហៅ ពយ ភេទប្រុស អាយុ៣៣ឆ្នាំ ជនជាតិខ្មែរ បានធ្វើសកម្មភាពស្ទុះយកកាំបិតចាក់សម្លាប់ជនរងគ្រោះឈ្មោះ ចាន់ ឆៃយ៉ា ភេទប្រុស អាយុ៣២ឆ្នាំ ជនជាតិខ្មែរ ក្រោយពីបានទាស់ពាក្យសម្តី និងប្រតាយប្រតប់ ក្នុងវង់ផឹងស៊ី។ បន្ទាប់ពីធ្វើសកម្មភាពរួចជនសង្ស័យបានជិះម៉ូតូម៉ាកស្កូបពី ពណ៌ស មិនចាំផ្លាកលេខគេចខ្លួនបាត់៕

អត្ថបទ៖ ម៉េង