ជីវិតកម្សាន្ដ

ទម្រាំប្ដូរពីតួអាសអាភាស ទៅជាតារាល្បីជួរមុខ Shu Qi ប្រឹងជម្នះនឹងពាក្យនិន្ទាជាច្រើន

បានផុស

២ ខែ មុន

នៅ

ថ្ងៃចន្ទ ២២ កក្កដា ២០២៤

ដោយ

Shu Qi ជាតារាសម្តែង និងជាតារាម៉ូដែលហុងកុង-តៃវ៉ាន់ ដែលត្រូវបានទស្សនិកជនស្គាល់យ៉ាងច្បាស់ ក្រោយលេចមុខជាតួឯកក្នុងភាពយន្តខ្នាតធំរបស់ហុងកុង និងភាពយន្តក្ដៅសាច់ជាច្រើនរឿង រហូតជាប់ងារជា “រាជិនីរឿងអាសអាភាស” មកទល់សព្វថ្ងៃ។

ថ្វីដ្បិតតែអាជីពនាបច្ចុប្បន្នកំពុងតែរលូនយ៉ាងណាក្ដី ប៉ុន្តែទម្រាំតែក្លាយជាតារាជួរមុខមានមនុស្សជុំវិញពិភពលោកកោតសរសើរ ក្នុងរយៈពេល២០ឆ្នាំកន្លងមកនេះនាងបានឆ្លងកាត់ការលំបាក និងការរើសអើងជាច្រើន ជាពិសេសគឺជម្នះនូវពាក្យនិទ្ទាចេញពីមាត់មនុស្សជុំវិញ ដើម្បីលុបអតីតកាលរបស់នាងក្នុងខ្សែភាពយន្តបែបរោលរាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាស្រីវ័យ៥០ឆ្នាំរូបនេះ ធ្លាប់បានចែករំលែកបទពិសោធន៍ជីវិតខ្លួនឯងនៅក្នុងភាពយន្តឯកសារ My Legacy ថា មែនទែនទៅ នាងមិនត្រូវបានគ្រួសារស្រឡាញ់ដូចកូនដទៃទេ។ ជារឿយៗត្រូវបានឪពុកម្តាយស្តីបន្ទោស និងវាយដំ នាងបាននិយាយថា “រាល់ពេលដែលខ្ញុំឮម៉ូតូរបស់ឪពុកខ្ញុំមកផ្ទះ ហើយទ្វារដែកបើកចុះមកក្រោម ខ្ញុំភ័យខ្លាច ហើយរត់ទៅឆ្ងាយដើម្បីលាក់ខ្លួន ទោះបីជាពាក់កណ្តាលយប់ក៏ដោយ។ ដូច្នេះ ខ្ញុំគិតថា ការធំឡើងក្នុងបរិយាកាសបែបនេះ ជាមួយនឹងបទពិសោធន៍ទាំងនោះ បានធ្វើឲ្យខ្ញុំក្លាយជាមនុស្សរសើបខ្លាំងនៅក្នុងសង្គមមួយនេះ”។

នៅអាយុ ១៦ ឆ្នាំ អតីតតួស្រីអាសអាភាសបានសម្រេចចិត្តចាកចេញពីផ្ទះដើម្បីចាប់ផ្តើមអាជីព។ នាងបានផ្លាស់ទៅរស់នៅទីក្រុងហុងកុងនៅអាយុ ១៧ ឆ្នាំ ហើយអាចប្រកបរបរចិញ្ចឹមជីវិតដោយខ្លួនឯង។ ជាមួយនឹងអត្ថប្រយោជន៍នៃរូបរាងដែលសំណោយផលពីកំណើត នាងស្រាប់តែផុងខ្លួនប្រឡូកក្នុងឧស្សាហកម្មកម្សាន្តជាគំរូរូបថតសម្រាប់ទស្សនាវដ្តី 18+ ។ បន្ទាប់មកនាងបានក្លាយជាតារាសម្ដែងភាពយន្តនៅវិទ្យាល័យចាប់តាំងពីពេលនោះ។

អស់រយៈពេល ២ ឆ្នាំ បន្ទាប់ពីចាកចេញពីផ្ទះ Shu Qi ត្រូវបានហ៊ុំព័ទ្ធដោយរូបភាពកាលពីអតីតកាល ទស្សនិកជនបានហៅនាងថា «តារាភាពយន្ដវិទ្យាល័យ» ។ ក្រោយមកនាងចែករំលែកថា វាជាពេលវេលាដែលនាងតែងតែចង់លុបចោលជារៀងរហូត ប្រសិនបើនាងអាចធ្វើបានម្តងទៀត នាងនឹងមិនជ្រើសរើសដើរលើផ្លូវបែបនេះទេ។

រហូតមកដល់ពេលមួយ ជីវិតនាងស្រាប់តផ្លាស់ប្ដូរដោយត្រូវសាកល្បងសម្ដែងក្នុងរឿង “Viva Erotica” នាឆ្នាំ១៩៩៦ ទើបរូបនាងអាចដករហស្សនាមជា “តារាភាពយន្ដវិទ្យាល័យ”។ តួនាទីនេះក៏មិននឹកស្មានដល់ដែរ ដែលនាំនាងទទួលបានពានរង្វាន់ភាពយន្តហុងកុង ក្នុងប្រភេទតួឯកស្រីឆ្នើម ដែលជាពានរង្វាន់ដ៏មានកិត្យានុភាពគ្មានតារាភាពយន្ត 18+ ណាហ៊ានស្រមៃចង់បានឡើយ។

ដោយឡែក យោងតាមគេហទំព័រ Today Online ក៏បានគូសបញ្ចាក់ដែរថា អ្នកដឹកនាំរឿងហុងកុងលោក Wong Jing គឺជាមនុស្សម្នាក់ដែលធ្វើឲ្យ Shu Qi មានអារម្មណ៍ថា នាងបានភ្ញាក់ដឹងខ្លួនពីសុបិនដើម្បីចង់ផ្លាស់ប្តូរខ្លួនឯង ហើយគាត់ក៏ជាមនុស្សម្នាក់ដែលបានខិតខំប្រឹងប្រែងយ៉ាងខ្លាំង ដើម្បីជួយតារាស្រីរូបនេះផ្លាស់ប្តូរពីកម្រិតទាបទៅកាន់ទីខ្ពស់។ ចាប់តាំងពីពេលនោះមក នាងបង្ហាញខ្លួនជាតួឯកនៅក្នុងខ្សែភាពយន្តហុងកុងល្បីៗជាច្រើនរឿង រហូតដណ្ដើមបានតំណែងជាតារាស្រីដ៏មានប្រជាប្រិយបំផុតនៅអាស៊ីរួមទាំងពិភពលោក និងក្លាយជាតារាស្រីស៊ីថ្លៃខ្ពស់បំផុតប្រចាំប្រទេសចិនក្នុងរយៈពេល ៨ឆ្នាំជាប់ៗគ្នា។

ទាក់ទងនឹងជីវិតផ្ទាល់ខ្លួនរបស់នាង កាលពីខែកញ្ញា ឆ្នាំ ២០១៦ Shu Qi បានប្រកាសថា នាងបានរកឃើញសុភមង្គលជាមួយអ្នកដឹកនាំរឿង Stephen Fung ។ អ្នកទាំងពីរបានរួមរស់ជាមួយគ្នាប្រហែល៤ឆ្នាំ មុននឹងប្រកាសរៀបការ។ នៅក្នុងអត្ថបទមួយនាងបានចែករំលែកដោយរីករាយថា Stephen Fung មិនសង្ហាគ្រប់គ្រាន់សម្រាប់លក្ខណៈវិនិច្ឆ័យរបស់នាងក្នុងការជ្រើសរើសប្តីនោះទេ។

យ៉ាងណាមិញ ក្រោយរៀបការរួច នាងកម្រនឹងបានចែករំលែកជីវិតផ្ទាល់ខ្លួនលើបណ្ដាញសង្គមប៉ុន្មានណាស់។ ប៉ុន្តែ ក្នុងឱកាសប្រារព្ធពិធីគម្រប់ ៨ ឆ្នាំនៃអាពាហ៍ពិពាហ៍ Shu Qi មិនស្ទាក់ស្ទើរក្នុងការផ្ញើពាក្យផ្អែមល្ហែមទៅកាន់ស្វាមីជាទីស្រលាញ់របស់នាងឡើយ។ ក្នុងនោះ នាងបានបានសរសេរសារយ៉ាងវែងអន្លាយនៅលើទំព័រផ្ទាល់ខ្លួនកាលពីដើមឆ្នាំនេះក្នុងន័យថ្លែងអំណរគុណដល់ស្វាមីថា “អរគុណសម្រាប់ការអត់ឱន និងនៅជាមួយខ្ញុំអស់ជាច្រើនឆ្នាំ។ អរគុណសម្រាប់អ្វីគ្រប់យ៉ាងដែលអ្នកបានផ្តល់ឲ្យខ្ញុំ។ សូមអបអរសាទរខួបអាពាហ៍ពិពាហ៍របស់យើង” !

គិតមកដល់បច្ចុប្បន្ន ទ្រព្យធនរបស់តារាសម្ដែងតៃវ៉ាន់វ័យ៥០ឆ្នាំរូបនេះមានប្រមាណជា ២០ លានដុល្លារ ដែលភាគច្រើនបានមកពីការខិតខំប្រឹងប្រែងក្នុងអាជីពសម្ដែងអស់រយៈពេលជាង២០ឆ្នាំមកហើយ៕