ធនាគារជាតិកម្ពុជានិងធនាគារកណ្តាលទីម័រខាងកើតចុះអនុស្សរណៈយោគយល់គ្នាលើវិស័យហិរញ្ញវត្ថុ​

ធនាគារជាតិនៃកម្ពុជា និងធនាគារកណ្ដាលទីម័រខាងកើត បានឯកភាពចុះហត្ថលេខាលើអនុស្សរណៈយោគយល់គ្នា ដើម្បីបង្ហាញពីការចាប់ផ្តើមនៃកិច្ចសហប្រតិបត្តិការក្នុងគោលដៅរួមចំណែកអភិវឌ្ឍន៍វិស័យធនាគារនៃប្រទេសទាំងពីរ ឱ្យកាន់តែរីកចម្រើនថែមទៀត។

កិច្ចប្រជុំទេ្វភាគី និងពិធីចុះហត្ថលេខាលើអនុស្សរណៈយោគយល់គ្នា ដែលធ្វើឡើងនៅថ្ងៃទី២២ ខែកក្កដា ឆ្នាំ២០២៤ ក្នុងរាជធានីភ្នំពេញ ដោយលោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជា  និងលោក Hélder Lopes ទេសាភិបាល ធនាគារកណ្តាលទីម័រខាងកើត ផ្តោតលើ កិច្ចសហការមានជាអាទិ៍៖ ១. ប្រតិបត្តិការធនាគារកណ្តាល, ២. ការតភ្ជាប់ការទូទាត់សងប្រាក់, ៣. នវានុវត្តន៍ហិរញ្ញវត្ថុឌីជីថល, ៤. ការត្រួតពិនិត្យធនាគារ, ៥. បរិយាបន្នហិរញ្ញវត្ថុ, និង៦. ការអភិវឌ្ឍធនធានមនុស្ស។

យោងតាមសេចក្តីប្រកាសព័ត៌មានរបស់ធនាគារជាតិនៃកម្ពុជាបានបន្តថា តាមរយៈអនុស្សរណៈយោគយល់នេះ មន្ត្រីជំនាញនៃធនាគារកណ្តាលទាំងពីរ នឹងពង្រឹងកិច្ចសហប្រតិបត្តិការបច្ចេកទេសកាន់តែរឹងមាំ តាមរយៈកិច្ចពិភាក្សាផ្លាស់ប្តូរយោបល់ជាប្រចាំ ការចែករំលែកព័ត៌មាន និងទិន្នន័យពាក់ព័ន្ធនឹងសេដ្ឋកិច្ចនិងហិរញ្ញវត្ថុ ព្រមទាំងបទពិសោធន៍និងចំណេះដឹងលើការងារបច្ចេកទេស ជាដើម។ ​

គួរបញ្ជាក់ថា នេះ គឺជាកិច្ចប្រជុំលើកដំបូងរវាងធនាគារជាតិនៃកម្ពុជា និងធនាគារកណ្តាលទីម័រខាងកើត ក្នុងស្មារតីនៃកិច្ចសហប្រតិបត្តិការ និងផ្លាស់ប្តូរយោបល់លើស្ថានភាពសេដ្ឋកិច្ច នយោបាយរូបិយវត្ថុ និងដំណើរការវិវត្តនៃវិស័យធនាគារនៃប្រទេសទាំងពីរ ជាពិសេសផ្តោតលើការចែករំលែកនូវបទពិសោធន៍ និងយុទ្ធសាស្ត្រនៃការលើកកម្ពស់ការប្រើប្រាស់រូបិយវត្ថុជាតិ ដុល្លារូបនីយកម្ម ដែលមានអត្ថប្រយោជន៍សម្រាប់ធនាគារកណ្តាល និងប្រទេសទាំងពីរ៕

អត្ថបទ៖សំអឿន