ផ្លូវបេតុងជិត៦០០ម៉ែត្រ ដែលមិនប្រកាសដេញថ្លៃជាសាធារណៈ ចាប់ផ្តើមលួចសាងសង់

ផ្លូវបេតុងប្រវែងជិត៦០០ម៉ែត្រ ទទឹង៥ម៉ែត្រ ស្ថិតក្នុងភូមិត្រពាំងស្រង៉ែ ឃុំគោកស្រុក ស្រុកតំបែរ ខេត្តត្បូងឃ្មុំ។ ការជូនដំណឹងនៅលើគេហទំព័ររបស់លេខាធិការដ្ឋាន គ ជ អ ប បានប្រកាសដាក់ឲ្យដេញថ្លៃជាសាធារណៈកាលពីថ្ងៃទី២៤ ខែមេសា ឆ្នាំ២០២៤ ផ្លូវបេតុងអាមេប្រវែង៥៨៤ម៉ែត្រ តម្លៃប៉ាន់ស្មាន ជាង៣៨២លានរៀលនោះ។ បែរជាត្រូវបានគណៈកម្មការលទ្ធកម្មឃុំគោកស្រុកសម្រេចយ៉ាងតក់ក្រហល់ជ្រើសរើសយកការចរចាយកក្រុមហ៊ុនស្ងាត់ៗ មកសាងសង់ផ្លូវនេះទៅវិញ ដោយយោងពីភាពលំបាកការធ្វើដំណើរ របស់ប្រជាពលរដ្ឋ សិស្សានុសិស្ស ស្របរដូវវស្សាផង ឃុំរៀបនិតិវិធីស្នើសុំទៅរដ្ឋបាលខេត្តតែម្តង ដើម្បីស្វែងរកភាពស្របច្បាប់ រួចចាត់ដាក់ឲ្យក្រុមហ៊ុនឈ្មោះ យ៉េន ស៉ីនួន ជាអ្នកកសាង ចាប់ពីថ្ងៃទី២២ ខែកក្កដា ឆ្នាំ២០២៤ បានសម្រេច៥០ភាគរយហើយ។

ជុំវិញបញ្ហានេះ ត្រូវបានមហាជនគេរិះគន់ចំៗថា ការរៀបចំបែបនេះ គឺគណៈកម្មការលទ្ធកម្មរំលោភបំពាននិតិវិធី ព្រោះការប្រកាសបើកសំណើធ្វើបានតែម្តងគត់ ពុំទាន់គ្រប់លក្ខណៈនៅឡើយទេ។ ប្រជាពលរដ្ឋនៅភូមិត្រពាំងស្រង៉ែបានឲ្យដឹងថា គាត់សប្បាយចិត្តនៅពេលដែលទទួលបានផ្លូវបេតុងនេះណាស់ ព្រោះវាជួយដល់ប្រយោជន៍យ៉ាងច្រើនដល់ជីវភាពរស់នៅដល់ពលរដ្ឋក្នុងតបន់នេះ។ តែផ្លូវដែលក្រុមហ៊ុនធ្វើដីទ្រាប់បាតក្រោមឈូសឆាយបង្ហាប់ថែមដីប្រហែល​១០ឡាន ធ្វើឲ្យបាត់គុណភាពផ្លូវ គាត់មិនយល់ដែរបញ្ហានឹង។

ទាក់ទិនទៅនឹងការសាងសង់ផ្លូវនេះ លោក គុយ ជឿន មេឃុំគោកស្រុកបានបញ្ជាក់ថា ខ្សែមួយផ្លូវនេះជាផ្លូវអាទិភាព ដែលត្រូវធ្វើការសាងសង់ឲ្យបានឆាប់រហ័ស ហើយបានប្រកាសដាក់ឲ្យដេញថ្លៃម្តងរួចមកហើយ កាលពីថ្ងៃទី២៤ ខែមេសា ឆ្នាំ២០២៤ តែត្រូវបានលើកពេលនៃការដេញថ្លៃ។ ដូចនេះបើរង់ចាំការប្រកាសដាក់ដេញថ្លៃម្តងទៀតរដូវវស្សានឹងឈានមកដល់ និងមានទឹកភ្លៀងធាក់ច្រើនមិនអាចសាងសង់បាន ដូចនេះយើងធ្វើយ៉ាងណាឲ្យគម្រោងផ្លូវបេតុងអាមេនេះ សាងសង់មុនរដូវភ្លៀងធ្លាក់ និងឆ្លើយតបទៅតាមតម្រូវការចាំបាច់របស់ប្រជាពលរដ្ឋនៅក្នុងភូមិទូទាំងឃុំ។ ដំបូងថាដាក់ឲ្យដេញដែរ តែវាមិនគ្រប់ចំនួនទើបចរចាយកតែម្តងទៅ។ តែយើងក៏បានស្នើសតាមរយៈ ស្រុក ទីចាត់ការផែនការវិនិយោគ ទៅលោកអភិបាលខេត្តរួបទើបសាងសង់ផ្លូវនេះ។ ព្រោះឃុំចំណេញផ្លូវបានវែងរហូតដល់៦០០ម៉ែត្រឯណោះ ជាមួយក្រុមហ៊ុនមានការចុះកិច្ចកុងត្រាច្បាស់លាស់ មានការបង្ហាប់ដីទ្រាប់បាតក្រោមផ្លូវខាងបច្ចេកទេសគេពិនិត្យ និងប្រើដែកប្រភេទថ្នាំងអំពៅប៉ុនៗកូនដៃ បើមិនអនុវត្តន៏តាមវិធានកិច្ចកុងត្រាទេ គឺមិនឲ្យសិទ្ធិក្នុងការសាងសង់នោះទេ ។

លោក សឺង គិរីវណ្ឌី នាយកទីចាត់ការ ផែនការ និងវិនិយោគខេត្តក៏បានបញ្ជាក់ដែរថា រឿងនេះខាងទីចាត់ការមិនបានដឹងដែរ ក្រោយមកទើបដឹងថា គឺមានការស្នើសុំពីគណៈកម្មការលទ្ធកម្ម និងមានឯកភាពពីលោកអភិបាលខេត្តទៀតទើបក្រុមហ៊ុននេះហ៊ានធ្វើ សំខាន់មានខេត្តទទួលស្គាល់គឺស្របច្បាប់ហើយ ៕

អត្ថបទ៖ សាន វិឡែម