ព័ត៌មានអន្ដរជាតិ

ចិនដាក់សម្ពាធសមាជិកសភាចំនួន៦ប្រទេស មិនឲ្យចូលរួមសន្និសីទនៅតៃវ៉ាន់

បានផុស

២ ខែ មុន

នៅ

ថ្ងៃចន្ទ ២៩ កក្កដា ២០២៤

ដោយ

Chheang

សមាជិកសភាមកពីប្រទេសចំនួន៦ បាននិយាយដូចៗគ្នាថា មន្ត្រីទូតចិនបានដាក់សម្ពាធពួកគេមិនឲ្យទៅចូលរួមនៅក្នុងសន្និសីទកោះតៃវ៉ាន់នោះឡើយ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន AP នៅថ្ងៃទី២៩ខែកក្កដាឆ្នាំ២០២៤។

លោក Luke de Pulford នាយកប្រតិបត្តិ IPAC (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសទាំង៦ ដែលត្រូវរដ្ឋាភិបាលក្រុងប៉េកាំងដាក់សម្ពាធ មានដូចជា បូលីវី កូឡុំប៊ី សាធារណរដ្ឋស្លូវ៉ាគី ម៉ាសេដ្វាន បូស្ន៉ី និងប្រទេសអាស៊ីមួយដែលសុំមិនបញ្ចេញអត្តសញ្ញាណ។ ក្រុមអ្នកនយោបាយទាំង៦ប្រទេស បានរៀបរាប់ថា ពួកគេទទួលបានសារ ការហៅទូរសព្ទ និងសំណើប្រជុំបន្ទាន់ ដើម្បីផ្អាកនូវគម្រោងធ្វើដំណើរទៅចូលរួមសន្និសីទ IPAC (Inter-Parliamentary Alliance) ដែលត្រៀមធ្វើឡើងនៅថ្ងៃទី២៩ខែកក្កដានេះ ស្ដីពីបញ្ហាប្រឈមបង្កឡើងដោយចិន ដើម្បីលើកកម្ពស់តម្លៃប្រជាធិបតេយ្យ សិទ្ធិមនុស្ស និងបទបញ្ជាតាមផ្លូវច្បាប់។ សន្និសីទ IPAC មានការចូលរួមពីសមាជិកសភារាប់រយនាក់មកពីប្រទេសចំនួន៣៥ ហើយត្រូវបានបង្កើតឡើងដំបូងនៅក្នុងឆ្នាំ២០២០។

IPAC បានប្រឈមមុខនឹងសម្ពាធពីរដ្ឋាភិបាលចិនជាយូរមកហើយ ដោយសមាជិកមួយចំនួនត្រូវបានដាក់ទណ្ឌកម្មដោយទីក្រុងប៉េកាំង ហើយនៅក្នុងឆ្នាំ២០២១ ប្រទេសខ្លះត្រូវបានវាយប្រហារដោយក្រុម Hacker របស់ចិនថែមទៀតផង។ លោក Luke de Pulford ប្រធានរៀបចំសន្និសីទ IPAC បានឲ្យដឹងថា ការដាក់សម្ពាធលើកនេះ ខុសប្លែកពីអ្វីដែលចិនធ្លាប់ធ្វើកន្លងមក។ ពេលរៀបចំប្រជុំ IPAC នៅទីតាំងផ្សេងក្រៅពីតៃវ៉ាន់ មន្ត្រីទូតចិនបានទាក់ទងទៅសមាជិកសភាប្រទេសជាសមាជិកនៅក្រោយពេលចប់សន្និសីទ ខុសប្លែកអ្វីតែឆ្នាំនេះ ចិនបានដាក់សម្ពាធមុនពេលរៀបចំសន្និសីទទៅវិញ។

ថ្លែងទៅកាន់ទីភ្នាក់ងារព័ត៌មាន AP លោក Antonio Miloshoski សមាជិកសភាប្រទេសម៉ាសេដ្វាន បាននិយាយថា លោកបានទទួលសារអេឡិចត្រូនិចពីចិន ដោយក្នុងនោះសរសេរថា៖ «ខ្ញុំឈ្មោះ Wu មកពីស្ថានទូតចិន។ យើងឮថា អ្នកបានទទួលការអញ្ជើញពី IPAC។ តើអ្នកនឹងចូលរួមសន្និសីទដែលនឹងធ្វើឡើងសប្ដាហ៍ក្រោយនៅតៃវ៉ាន់ដែរឬអត់?»។ ចំណែកលោកស្រី Sanela Klaric សមាជិកសភាបូស្ន៉ី បានរៀបរាប់ថា៖ «ពួកគេបានទាក់ទងមកប្រធានគណបក្សនយោបាយរបស់ខ្ញុំ ពួកគេបានស្នើឲ្យគាត់បញ្ឈប់ខ្ញុំមិនឲ្យធ្វើដំណើរទៅតៃវ៉ាន់”។ លោកស្រី Klaric បាននិយាយបន្តថា ការដាក់សម្ពាធនេះពិតជារំខានខ្លាំង ប៉ុន្តែវាមិនអាចរារាំងការប្ដេជ្ញាចិត្តបន្តការចូលរួមរបស់លោកស្រីនោះឡើយ៕

ដោយ៖ ឈាង