ព័ត៌មានអន្ដរជាតិ

Mitsubishi គ្រោងចូលសម្ព័ន្ធក្រុមហ៊ុនផលិតរថយន្តជប៉ុន Honda-Nissan

បានផុស

២០ នាទី មុន

នៅ

ថ្ងៃចន្ទ ២៩ កក្កដា ២០២៤

ដោយ

ក្រុមហ៊ុនផលិតរថយន្ត Mitsubishi Motors គ្រោងចូលរួមក្នុងសម្ព័ន្ធភាពនៃក្រុមហ៊ុនផលិតរថយន្តជប៉ុន Honda Motor និង Nissan Motor ដោយនឹងបង្កើតចំណងទំនាក់ទំនងផលិតរួមគ្នា ចំពេលដែលការប្រកួតប្រជែងលើទីផ្សារអន្តរជាតិកាន់តែខ្លាំងឡើងៗ ជាពិសេសពីក្រុមហ៊ុនចិន។ នេះបើតាមការរាយការណ៍របស់ទីភ្នាក់ងារសារព័ត៌មាន Nikkei Asia កាលពីថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រសិនបើបូកបញ្ជូលគ្នា ក្រុមហ៊ុនទាំង៣លក់រថយន្តរហូតដល់ ៨ លានគ្រឿងប្រចាំឆ្នាំ។ Nikkei Asia បានផ្សាយថា ក្រុមហ៊ុន Mitsubishi Motors ដែលមានហ៊ុន ៣៤ ភាគរយកាន់កាប់ដោយក្រុមហ៊ុន Nissan នឹងធ្វើការជាមួយHonda និង Nissan ដើម្បីបញ្ចប់ព័ត៌មានលម្អិតនៃភាពជាដៃគូយុទ្ធសាស្ត្ររបស់ខ្លួន ដោយបន្ថែមថាក្រុមហ៊ុនទាំង៣មានបំណងបង្កើតស្តង់ដារសុសវែររថយន្តដែលប្រើដើម្បីគ្រប់គ្រងរថយន្ត។

បើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ក្រុមហ៊ុនទាំង៣មិនបានបញ្ជាក់ឱ្យច្បាស់លាស់ អំពីអ្វីដែលកាសែត Nikkei Asia រាយការណ៍នៅឡើយទេ។

យ៉ាងណាមិញ គេមើលឃើញថា ការបោះជំហានបែបនេះ កើតឡើងខណៈ Nissan ដែលជាក្រុមហ៊ុនផលិតរថយន្តធំជាងគេទី ៣ របស់ជប៉ុន បានបាត់បង់ចំណែកទីផ្សារជាលំដាប់នៅទីផ្សារធំៗរួមមានសហរដ្ឋអាមេរិក និងចិន ស្របពេលដែលប្រទេសទាំង២ បានគ្របដណ្ដប់ជាងពាក់កណ្តាលនៃការលក់ទូទាំងពិភពលោករបស់ក្រុមហ៊ុនកាលពីត្រីមាសទី១។

កាលពីថ្ងៃព្រហស្បតិ៍ ក្រុមហ៊ុនដដែល បានកាត់បន្ថយទស្សនវិស័យប្រចាំឆ្នាំរបស់ខ្លួន បន្ទាប់ពីចេញការបញ្ចុះតម្លៃទ្រង់ទ្រាយធំនៅសហរដ្ឋអាមេរិក ស្ទើរតែធ្វើឱ្យក្រុមហ៊ុនរកប្រាក់ចំណេញមិនបានក្នុងត្រីមាសទី១។

កាលពីខែមីនា ក្រុមហ៊ុន Nissan និង Honda បាននិយាយថា ពួកគេកំពុងពិចារណាពីភាពជាដៃគូយុទ្ធសាស្ត្រ ដើម្បីសហការគ្នាលើការផលិតគ្រឿងបន្លាស់រថយន្តអគ្គិសនី និងបញ្ញាសិប្បនិម្មិតនៅក្នុងសុសវែររថយន្ត។

តាមពិតទៅ ក្រុមហ៊ុន Mitsubishi ស្ថិតក្នុងសម្ព័ន្ធភាពយូរអង្វែងហើយជាមួយ Nissan និងក្រុមហ៊ុនផលិតរថយន្តបារាំង Renault ។ គេមើលឃើញថា កិច្ចសហការដាច់ដោយឡែកពីគ្នារវាង Nissan Honda និង Mitsubishi Motors អាចជួយក្រុមហ៊ុនផលិតរថយន្តរបស់ប្រទេសជប៉ុនកាត់បន្ថយការចំណាយ និងបង្កើនការប្រយុទ្ធក្នុងការប្រកួតប្រជែងដ៏ស្វិតស្វាញលើវិស័យរថយន្តអគ្គិសនី ដែលមានក្រុមហ៊ុនបរទេសដូចជា BYD របស់ចិន និង Tesla របស់អាមេរិក កំពុងវាតទីនៅលើទីផ្សារ៕