កូរ៉េខាងត្បូង៖ កូនស្រីលោក គីម អាយុ១១ឆ្នាំ ​ត្រៀមឡើងដឹកនាំប្រទេស ស្នងតំណែងឪពុក 

ភ្នាក់ងារចារកម្មកូរ៉េខាងត្បូង ហៅកាត់ NIS បានប្រាប់សមាជិកសភា ក្នុងសម័យប្រជុំបិទទ្វារកាលពីថ្ងៃចន្ទទី២៩ខែកក្កដាឆ្នាំ២០២៤ថា កុមារី គីម ជូអេ ដែលជាកូនស្រីរបស់លោក គីម ជុងអ៊ុន អាចជាអ្នកបន្តវេនក្នុងគ្រួសារត្រកូលគីម ដែលនឹងត្រូវដឹកនាំប្រទេសកូរ៉េខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT ដោយដកស្រង់ប្រភពពី NIS, ពេលនេះ កុមារី ជូអេ កំពុងតែសិក្សាអំពីមេរៀនពាក់ព័ន្ធភាពជាអ្នកដឹកនាំប្រទេស ត្រៀមឡើងស្នងតំណែងពីលោក គីម។

សមាជិកសភាកូរ៉េខាងត្បូងលោក Lee Seong-kweun បានប្រាប់ទៅអ្នកសារព័ត៌មាន ក្រោយសម័យប្រជុំសភាថា «កូរ៉េខាងជើងបង្ហើបថា កុមារី គីម ជូអេ គឺជាបេក្ខភាពបន្តវេន ព្រោះបច្ចុប្បន្ន នាងកំពុងសិក្សាមេរៀនស្នងតំណែងពីឪពុក។ កូរ៉េខាងជើង កំពុងខិតខំឃោសនា និងព្យាយាមបង្ហាញវត្តមានកុមារីនេះជាសាធារណៈខ្លាំងណាស់ ដើម្បីស្ទាបស្ទង់ប្រតិកម្មពីមជ្ឈដ្ឋាននានាទៅលើរូបនាង»។

ស្របពេលជាមួយគ្នានោះដែរ សារព័ត៌មាន Bloomberg បានចុះផ្សាយថា «តាំងពីដើមឡើយ គ្មានកូនណាម្នាក់របស់មេដឹកនាំកូរ៉េខាងជើង បានបង្ហាញមុខទាំងវ័យក្មេងបែបនេះទេ។ តាមទំនៀម កូនចៅរបស់មេដឹកនាំរដ្ឋ តែងលាក់មុខពីភ្នែកសាធារណជនជានិច្ច លុះត្រាតែពួកគេមានមុខតំណែងណាមួយនៅក្នុងរដ្ឋ»។

សូមបញ្ជាក់ថា គីម ជូអេ បានបង្ហាញខ្លួនជាសាធារណៈលើកដំបូងក្នុងខែវិច្ឆិកា ឆ្នាំ២០២២ នៅពេលនាង ទៅមើលការសាកល្បងមីស៊ីលផ្លោងអន្តរទ្វីប Hwasong-17 ជាមួយឪពុក។

ចាប់តាំងពីពេលនោះមក នាងបានបង្ហាញខ្លួនរាប់សិបដង ដោយអមដំណើរមេដឹកនាំកូរ៉េខាងជើងទៅកាន់ទីតាំងបាញ់មីស៊ីល មូលដ្ឋានយោធា កម្មវិធីរដ្ឋ និងសូម្បីតែព្រឹត្តិការណ៍កីឡា។

យោងតាម ​​NIS, កុមារី ជូអេ មានអាយុប្រហែល១១ឆ្នាំ ហើយត្រូវបានគេជឿថា ជាកូនទីពីរក្នុងចំណោមកូនទាំងបី របស់លោក គីម ជាមួយភរិយាឈ្មោះ រី ស៊ុលជូ៕

អត្ថបទ៖ សុខ សុវណ្ណ

ចុចអាន៖ កូរ៉េខាងត្បូង៖ កូនស្រីលោក គីម ជុងអ៊ុន មានភាគរយខ្ពស់ ក្លាយជាអ្នកស្នងតំណែងដឹកនាំ កូរ៉េខាងជើង