ក្រុមហ៊ុនវៀតណាម ចង់​​បើក​កសិដ្ឋាន​ផលិតទឹកដោះគោស្រស់​​ ២ លាន​តោន​ នៅ​ឥណ្ឌូណេស៊ី​ ​

រដ្ឋមន្ត្រីក្រសួងកសិកម្ម​ឥណ្ឌូណេស៊ី​ លោក Andi Amran Sulaiman បាន​ឱ្យដឹង​កាលពីថ្ងៃអាទិត្យថា ក្រុមហ៊ុនវៀតណាមមួយ បានបង្ហាញពីចំណាប់អារម្មណ៍ក្នុងការវិនិយោគលើកសិដ្ឋានផលិត​ទឹកដោះគោស្រស់​នៅក្នុងប្រទេសឥណ្ឌូណេស៊ី ក្នុងគោលបំណងផលិតទឹកដោះគោប្រហែល ២ លានតោនក្នុងមួយឆ្នាំ។ នេះ​បើ​តាម​ការ​ចុះ​ផ្សាយ​របស់​កាសែត​ Jakarta Globe កាល​ពី​ថ្ងៃ​ចន្ទ​។

លោក Amran ដែល​ថ្មី​​ៗ​នេះ​ បាន​ទៅ​ធ្វើ​ទស្សនកិច្ច​នៅ​​ប្រទេស​វៀតណាម ​​​មិន​បាន​​បង្ហើប​​ឈ្មោះ​ក្រុមហ៊ុន​​​នោះ​ទេ ប៉ុន្តែ​បាន​ប្រាប់​ថា ​​ក្រុមហ៊ុន​នោះ​​​ត្រូវ​ការ​ផ្ទៃ​ដី​ចំនួន ១០០ ០០០ ​ហិកតា ដើម្បី​ធ្វើ​​​ជា​​កសិដ្ឋាន​​។

​លោក​ថ្លែង​យ៉ាងដូច្នេះ​ថា​៖ «កសិដ្ឋានចិញ្ចឹម​គោយក​ទឹក​ទឹកដោះដ៏ធំមួយ ​នឹងវិនិយោគនៅទីនេះ ហើយពួកគេបានស្នើសុំកសិដ្ឋានចិញ្ចឹមសត្វគោ​ ទំហំ​ ១០០ ០០០ ហិកតា ​ដើម្បីជួយយើងកាត់បន្ថយតម្រូវការនាំចូលទឹកដោះគោរបស់យើងចំនួន ៥០ ភាគរយ»​។ លោក​បន្ត​ថា​៖ «ពួកគេ​បានសន្យាថានឹងផ្គត់ផ្គង់ ៥០ភាគរយនៃចំនួនទឹក​ដោះ​គោ​ដែល​យើង​នាំ​ចូល​ប្រមាណ​ ៤,៣៨ លាន​តោន​»។ ​

រដ្ឋមន្រ្តីដដែល​ បាន​បន្ថែមថា រដ្ឋាភិបាលឥណ្ឌូណេស៊ី​គ្រោងនឹងអញ្ជើញ​ក្រុម​ហ៊ុន​វិនិយោគវៀតណាមដដែល​ មក​ប្រជុំនៅក្នុង​ប្រទេស​របស់​ខ្លួន​ ​ដើម្បីពិភាក្សាលម្អិតអំពីគម្រោងវិនិយោគដែលគ្រោងទុក​ ខណៈ​កំពុងពិចារណាទីតាំងនៅភាគខាងកើតប្រទេសឥណ្ឌូនេស៊ី កោះស៊ូម៉ាត្រា ឬកោះ​កាលីម៉ាន់តាន់​ ​ដែល​មាន​អាកាសធាតុ​​អំណោយផល​។

គួរ​គូស​បញ្ជាក់​ថា​ ក្នុងដំណើរទស្សនកិច្ច​ទៅ​វៀតណាមកាល​ពី​សប្ដាហ៍​មុន​ លោក Amran បានជួបជាមួយមន្ត្រីរដ្ឋាភិបាល និងសហគ្រិន​វៀតណាម​​។ កាល​នោះ​ លោកបានជួបពិភាក្សាជាមួយលោកស្រី​ Thai Huong ស្ថាបនិក និងជាប្រធានក្រុមហ៊ុនទឹកដោះគោ True Happiness (TH) Group ប៉ុន្តែការិយាល័យរបស់លោកមិនបានបញ្ជាក់ពីថាតើ​លោកស្រី​ Thai Huong ជា​វិនិយោគិន​ដែល​លោក​ Amran បាន​លើក​ឡើង​នោះ​ទេ​។

គេ​មើល​ឃើញ​ថា​ វៀតណាម​ និង​ឥណ្ឌូណេស៊ី​ ​បាន​កត់​ត្រា​អំពីកំណើនទំនាក់ទំនងសេដ្ឋកិច្ច និងពាណិជ្ជកម្មក្នុងរយៈពេលប៉ុន្មានឆ្នាំកន្លងមកនេះ​។ ឥណ្ឌូណេស៊ី​ ដែល​​​មាន​ប្រជាជន​សរុប​ជាង ២៧០ លាន​នាក់​ អាច​ជា​ទីផ្សារ​វិនិយោគ​ដ៏​ធំ​សម្រាប់​វៀតណាម​ផ្សេង​ៗ​ លើស​ពី​កសិដ្ឋាន​ផលិតទឹកដោះគោ​។ ថ្មី​ៗ​នេះ​ ក្រុម​ហ៊ុនផលិតរថយន្ត​អគ្គិសនី​វៀតណាម VinFast បាន​ចាប់​ផ្ដើម​សាងសង់​រោងចក្រដំឡើងរថយន្តអគ្គិសនីថ្មីក្នុង​ខេត្ត​ ជ្វាខាង​លិច​ របស់​ឥណ្ឌូណេស៊ី​៕