ទោះបីពិការភាព តែបុរសម្នាក់នេះ តស៊ូរកស៊ីចិញ្ចឹមកូន ដោយពុំចាំបាច់ដើរសុំទានគេ

លោក រាយ រន ហៅពូវិន អាយុ៣២ឆ្នាំ រស់នៅភូមិបន្ទាយឈើ ឃុំទឹកវិល ស្រុកសៀមរាប ខេត្តសៀមរាប ទោះបីកើតមកមានពិការភាពតាំងពីកំណើត តែអ្វីដែលគួរឱ្យសរសើរនោះ លោកជាមនុស្សម្នាក់ដែលឧស្សាហ៍ព្យាយាម និងតស៊ូក្នុងការរកស៊ីប្រចាំថ្ងៃ ដើម្បីចិញ្ចឹមកូន ដោយពុំចាំបាច់ដើរសុំទានគេ។

លោក រាយ រន ជនពិការលក់ស្មុកកាហ្វេ និងសម្ភារៈធ្វើពីឬស្សី នៅខេត្តសៀមរាប បានប្រាប់​ឱ្យ កម្ពុជាថ្មី ដឹងថា លោកជាមនុស្សម្នាក់ដែលមានពិការភាពតាំងពីកំណើត ពោលគឺ លោកស្វិតជើងទាំងពីរតាំងពីកំណើតមកម្ល៉េះ។

លោក បន្តថា សម្រាប់់ពេលបច្ចុប្ប​ន្ននេះ លោកមានមុខរបរតូចមួយ សម្រាប់រកប្រាក់ចិញ្ចឹមគ្រួសារ ដោយទិញស្មុកកាហ្វេ និងស្មុកបាយដំណើម និងសម្ភារៈដែលធ្វើពីឬស្សី ដាក់លក់តាមរទេះ និងការលក់តាមអនឡាញ ដើម្បីបានប្រាក់បន្តិចបន្តួច ទុកគ្រាន់ចំណាយទៅលើការសិក្សារបស់កូនៗ និងការចំណាយក្នុងគ្រួសារទាំងមូល។

លោក រាយ រន ហៅពូ​វិន បានប្រាប់ឱ្យដឹងទៀតថា ទាក់ទងនឹងស្មុកកាហ្វេ និងស្មុកបាយដំណើម និងសម្ភារៈធ្វើពីឬស្សីទាំងនេះ លោកមិនបានធ្វើដោយខ្លួនឯងនោះទេ គឺលោកបានទិញពីប្រជាពលរដ្ឋដែលរស់នៅក្នុងសហគមន៍ជាមួយគ្នា ដើម្បីយកមកលក់បន្ត គ្រាន់បានចំណេញក្បាលកាក់បន្ដិចបន្ដួច ជាក់ស្ដែងក្នុងស្មុកកាហ្វេ១ លោកអាចលក់ចំណេញបានត្រឹម ២០០រៀល ប៉ុណ្ណោះ តែក៏អាស្រ័យទៅលើការកម្ម៉ងទិញពីអតិថិន ពិសេសគឺម្ចាស់ហាងកាហ្វេ ផងដែរ។

ទោះបីមុខរបរនេះ មិនសូវកាក់កប តែពូវិន តស៊ូមិនចុះចាញ់នឹងឧបសគ្គនោះឡើយ នេះក៏ដោយសារតែគាត់ត្រូវមានបន្ទុកដោយចិញ្ចឹមកូនប្រុសស្រី ចំនួន ៤នាក់ ភាគច្រើនត្រូវចំណាយទៅលើរបរអាហារ និងការសិក្សាប្រចាំថ្ងៃ ជាដើម។

ពូវិន បានបន្ថែមទៀតថា មុខរបរលក់ស្មុកកាហ្វេ និងស្មុកបាយដំណើមនេះ សម្រាប់ពេល​បច្ចុប្បន្ន ហាក់មិនសូវសម្បូរអ្នកទិញប៉ុន្មាននោះឡើយ ក្រៅពីហាងកាហ្វេនៅតាមបណ្ដាខេត្ត និងរាជធានីភ្នំពេញ តែងតែជួយកម្ម៉ងទិញជាច្រើន ដែលអាចធ្វើឱ្យលោកអាចរកប្រាក់ចំណូលបានជាង ៤០ម៉ឺនរៀល ជារៀងរាល់ខែ សម្រាប់ផ្គត់ផ្គង់គ្រួសារ និងការសិក្សារបស់កូន ដោយពុំចាំបាច់លើកដៃសុំទានគេ៕

អត្ថប​ទ ៖​ សួស សិត