ព័ត៌មានជាតិ

គិតត្រឹមថ្ងៃ ០១ សីហា ដំណាំស្រូវពលរដ្ឋក្នុងខេត្តបាត់ដំបង រងផលប៉ះពាល់ពីជំនន់ទឹកភ្លៀងសរុបជិត ៤ ពាន់ហិតា

បានផុស

២ ខែ មុន

នៅ

ថ្ងៃសុក្រ ២ សីហា ២០២៤

ដោយ

បើយោងតាមរបាយការណ៍ដែល «កម្ពុជាថ្មី» ទទួលបានពីមន្ទីរកសិកម្មខេត្តបាត់ដំបង គិតត្រឹមថ្ងៃទី០១ ខែសីហា ជំនន់ទឹកភ្លៀងក្នុងខេត្តបាត់ដំបង បានបង្កឱ្យមានផលប៉ះពាល់ដល់ផលដំណាំស្រូវរបស់ប្រជាកសិករសរុបប្រមាណជិត ៤ ពាន់ហិកតា (៣,៩២៨ ហិតា) ប៉ុន្តែមិនមានការខូចខាតផលដំណាំស្រូវរបស់ប្រជាកសិករឡើយ ក្រោយមានការជួយអន្តរាគមន៍ពីអាជ្ញាធរពាក់ព័ន្ធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្មានថ្ងៃកន្លងមកនេះ ខេត្តបាត់ដំបងមានភ្លៀងធ្លាក់ផ្ទួនៗបង្កឲ្យទឹកក្នុងស្ទឹងសង្កែហក់ឡើងខ្ពស់ និងឈានដល់កម្រិតប្រកាសអាសន្ន ដែលបង្កឲ្យប្រជាកសិករនៅតាមបណ្តាស្រុកផ្នែកខាងក្រោម មានការព្រួយបារម្ភទៅលើផលដំណាំស្រូវ។ យ៉ាងណាមិញ ការព្រួយបារម្ភនេះក៏បានរំសាយទៅវិញដោយផលដំណាំស្រូវរបស់ប្រជាកសិករគ្រាន់តែរងផលប៉ះពាល់ខ្លះតែប៉ុណ្ណោះ ដោយមិនប្រឈមមុខនឹងការខូចខាតនោះឡើយ។

អាជាធរបានបញ្ជាក់ថា ដោយសារតែអាជ្ញាធរស្រុកបានសហការគ្នាបានល្អ ចុះពិនិត្យនិងស្វែងរកវិធីបណ្តោះទឹកបានទាន់ពេលវេលា ម្យ៉ាងវិញទៀតទឹកភ្លៀងក៏បានផ្អាកធ្លាក់ ទើបផលដំណាំកសិករផ្នែកខាងស្រុកមួយចំនួនដូចជាស្រុកឯកភ្នំមិនមានការខូចខាតនៅឡើយ។

បើតាមមន្ត្រីកសិកម្ម «បើទោះបីទំហំនៃការប៉ះពាល់នៅមានកម្រិតទាប ហើយមិនមានរងការខូចខាតនៅឡើយក៏ពិតមែន តែក៏មិនទាន់ដឹងអំពីស្ថានភាពអាកាសធាតុនៅឡើយ បើសិនជាថ្ងៃខាងមុខនឹងមានភ្លៀងផ្នែកខាងលើបន្តធ្លាក់ផ្ទួនៗបន្តទៀត អាចនឹងមានការខូចខាត តែបើអាកាសធាតុអំណោយផលល្អ ផលដំណាំស្រូវកសិករនឹងបានផលជាវិជ្ជមានច្រើនជាងអវិជ្ជមាន»។

បើយោងតាមស្ថិតិផ្ទៃដីដែលបានប៉ះពាល់ និងខូចខាតដោយទឹកជំនន់ និងរាំងស្ងួតលើផលដំណាំស្រូវបើគឹតត្រឹមថ្ងៃទី០១ ខែសីហា ឆ្នាំ២០២៤នេះ ស្រុកដែលជាគោលដៅមានចំនួន ១១ស្រុក ក្នុងនោះមានតែស្រុកចំនួន ២ និងសង្កាត់ចំនួន ១ ក្នុងក្រុងបាត់ដំបងរងផលប៉ះពាល់៕