ព័ត៌មានជាតិ

មន្រ្តីក្រសួងសាធារណការ បញ្ជាក់ហេតុការណ៍ធ្លាក់ទូរថភ្លើងដឹកប្រេងឥន្ធនៈនៅខេត្តពោធិ៍សាត់

បានផុស

៨ ខែ មុន

នៅ

ថ្ងៃអាទិត្យ ៤ សីហា ២០២៤

ដោយ

មន្រ្តីក្រសួងសាធារណការនិងដឹកជញ្ជូន បានធ្វើការគូសបញ្ជាក់ពីឧប្បត្តិហេតុធ្លាក់ទូរថភ្លើងដឹកប្រេងឥន្ធនៈចេញពីដែករ៉ៃ លើផ្លូវដែកភាគខាងជើងចំណុច PK-123+350 ស្ថិតក្នុងភូមិកប៉ាស់ ឃុំឈើតុំ ស្រុកក្រគរ ខេត្តពោធិ៍សាត់ ដែលបង្កការខូចខាតមួយចំនួន តែមិនបង្កឲ្យគ្រោះថ្នាក់ដល់អាយុជីវិតមនុស្សនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផន រឹម មន្រ្តីអ្នកនាំពាក្យក្រសួងសសាធារណការនិងដឹកជញ្ជូននៅរសៀលនេះ បានប្រាប់ពីហេតុការណ៍នេះថា កាលពីវេលាម៉ោង ៤ និង ៣០ នាទីព្រឹកថ្ងៃទី ៤ ខែសីហា ឆ្នាំ២០២៤ រថភ្លើងមួយខ្សែចេញដំណើរពីបាត់ដំបងឆ្ពោះទៅកាន់រាជធានីភ្នំពេញ បានជួបឧប្បត្តិហេតុធ្លាក់ទូរថភ្លើងដឹកប្រេងឥន្ធនៈចេញពីដែករ៉ៃ លើផ្លូវដែកភាគខាងជើងចំណុច PK-123+350 ស្ថិតក្នុងភូមិកប៉ាស់ ឃុំឈើតុំ ស្រុកក្រគរ ខេត្តពោធិ៍សាត់ ចំនួន ៦ ទូ (ទូទទេ)។ ឧបទ្ទវហេតុនេះមិនបណ្តាលឲ្យរងគ្រោះថ្នាក់ដល់អ្នកបើកបរ អ្នកធ្វើដំណើរ និងប្រជាពលរដ្ឋរស់នៅតាមដងផ្លូវដែកឡើយ។

ក្រោយកើតហេតុ ក្រុមការងារនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន និងក្រុមហ៊ុន Royal Railway Cambodia បានទៅដល់កន្លែងកើតហេតុភ្លាមៗដើម្បីអន្តរាគមន៍ និងយករថយន្តស្ទូចលើកទូរថភ្លើងមកដាក់លើផ្លូវដែកវិញ។

ក្រុមការងារបច្ចេកទេសបានពិនិត្យជាក់ស្តែងនៅកន្លែងកើតហេតុ ដោយមើលឃើញស្ថានភាពផ្លូវដែកខូចខាតប្រវែង ១០០ ម៉ែត្រ និងស្រុតមួយចំហៀងដោយសារទឹកហូរច្រោះបន្ទាប់ពីភ្លៀងធ្លាក់ជាបន្តបន្ទាប់ប៉ុន្មានថ្ងៃជាប់ៗគ្នានេះ។

បើតាមលោក ផន រឹម លទ្ធផល នៃការស្រាវជ្រាវលម្អិត នាយកដ្ឋានផ្លូវដែក នៃក្រសួងសាធារណការ និងដឹកជញ្ជូន និងភាគីក្រុមហ៊ុន Royal Railway Cambodia នឹងផ្សព្វផ្សាយនាពេលក្រោយ៕

អត្ថបទ៖ សំអឿន