តម្លៃដំឡូងមីស្រស់ ចាប់ផ្ដើមកើនឡើងវិញបន្តិច

លោក អិល ឈិញ ប្រធានសមាគមកសិករដំឡូងមីខ្មែរ បានឱ្យដឹងថា តម្លៃដំឡូងមីចាប់ផ្ដើម​ឡើ​ង​​ថ្លៃ​បន្តិចវិញដល់ ២២០ រៀលក្នុងមួយគីឡូក្រាមនៅរយៈពេល ២ ថ្ងៃនេះ បន្ទាប់ពីធ្លាក់ចុះ​តាំងពីខែឧសភា។

លោក អិល​ ឈិញ បញ្ជាក់ថា កសិករអាចទទួលផលចំណេញបាន ទាល់តែតម្លៃចាប់ពី ២៥០ រៀល ក្នុងមួយគីឡូក្រាមឡើងទៅ ហើយអាស្រ័យលើទិន្នផលដំឡូងទៀតដែលបាន​ប្រមាណ​ជាង ២០ តោនក្នុង​មួយ​ហិកតា។

ប្រធានសមាគមរូបនេះ បានបញ្ជាក់ថា ទិន្នផលដំឡូងមីនៅឆ្នាំនេះ ទំនងជាធ្លាក់ចុះ ដោយសារ​អា​កាស​ធាតុមានភ្លៀងធ្លាក់ច្រើនបានធ្វើឱ្យប៉ះពាល់ដល់ការដាំដុះ។​

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ នៅឆមាសទី០១ ឆ្នាំ ២០២៤ ការនាំចេញដំឡូងមីសម្រេចបាន ២,៥០ តោន ដែលមានទំហំទឹកប្រាក់ ៤៥០ លានដុល្លារ។

ក្នុងឆមាសទី១ ឆ្នាំ២០២៤ ការនាំចេញកសិផលរបស់កម្ពុជា សម្រេចបានជាង ៦លានតោន កើនឡើងជិត ៦០ភាគរយ ធៀបនឹងឆមាសទី១ ក្នុងឆ្នាំ២០២៣៕

អត្ថបទ៖ ឡេង ដេត