រដ្ឋបាលខេត្តរតនគិរី អបអរសាទរពិធីបើកការដ្ឋានសាងសង់ព្រែកជីកហ្វូណនតេជោ នៅក្បែររង្វង់មូលនាគព័ន្ធ

នៅព្រឹកថ្ងៃទី៥ សីហា ឆ្នាំ២០២៤ លោក មួង ប៉យ សមាជិកព្រឹទ្ធសភា លោក ខាំ ខឿន សមាជិកក្រុមប្រឹក្សាខេត្ត និងលោក ភួ គឹមមឿ សមាជិកក្រុមប្រឹក្សាខេត្ត បានអញ្ជើញដឹកនាំមន្ត្រីរាជការ កងកម្លាំងទាំងបី សិក្សានុសិស្ស លោកគ្រូ អ្នកគ្រូ យុវជន និងប្រជាពលរដ្ឋ ជាងប្រមាណ ១០០០នាក់ ចូលរួមអបអរសាទរពិធីបើកការដ្ឋានសាងសង់ព្រែកជីកហ្វូណនតេជោ ដែលប្រារព្ធធ្វើឡើងនៅបរិវេណក្បែររង្វង់មូលនាគព័ន្ធ ស្ថិតក្នុងក្រុងបានលុង ខេត្តរតនគិរី។

នៅតាមបណ្តាគ្រឹះស្ថានសាធារណៈ រដ្ឋ មន្ទីរ-អង្គភាព រដ្ឋបាលក្រុង ស្រុកទាំង៩ វត្តអារាមនានាក្នុងខេត្តរតនគិរី បានធ្វើការវាយគង ទូងស្គរគ្រប់ទីកន្លែងព្រមៗគ្នា នៅវេលាម៉ោង៩និង៩នាទីព្រឹក យ៉ាងឱឡារឹក។

ព្រែកជីកហ្វូណនតេជោដែលជាគម្រោងប្រវត្តិសាស្រ្ត សម្រាប់ផលប្រយោជន៍ជាតិ និងប្រជាជនកម្ពុជា។ គម្រោង “ព្រែកជីកហ្វូណនតេជោ គឺជាគម្រោងមួយដ៏ធំមហិមារ និងមានលក្ខណៈជាយុទ្ធសាស្រ្តពិសេស ដែលសាងសង់ឡើង ក្នុងគោលដៅលើកកម្ពស់សកម្មភាពដឹកជញ្ជូនទំនិញ កសិផល និងភ្ញៀវទេសចរ គ្រប់គ្រងទឹកជំនន់ និងគ្រោះរាំងស្ងួត រួមទាំងពង្រឹងឯករាជ្យភាព អធិបតេយ្យភាព និងពង្រីកឧត្តមភាពនៃការដឹកជញ្ជូនតាមផ្លូវទឹករបស់កម្ពុជាផ្ទាល់។

ក្នុងនីតិកាលទី៧ រាជរដ្ឋាភិបាលបានដាក់ឲ្យអនុវត្តយុទ្ធសាស្ត្របញ្ចកោណ-ដំណាក់កាលទី១ ដោយបានកំណត់ចក្ខុវិស័យប្រែក្លាយកម្ពុជា ជាប្រទេសចំណូលខ្ពស់នៅឆ្នាំ២០៥០។ ក្នុងនោះ ការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងភស្តុភារកម្ម ជាពិសេសការអភិវឌ្ឍហេដ្ឋារចនាសម្ព័ន្ធផ្លូវទឹក និងគម្រោងផ្លូវនាវាចរណ៍ ត្រូវបានចាត់ទុកជាអាទិភាពគន្លឹះមួយ ក្នុងចំណោមវិស័យសំខាន់ៗជាច្រើនទៀត នៅក្នុងយុទ្ធសាស្ត្របញ្ចកោណ៕

អត្ថបទ៖ វុទ្ធឦសាន