តួលេខជនជាតិវៀតណាម ស្លាប់ដោយសារគ្រោះធម្មជាតិ កើនដល់ជាង ១០០នាក់

គិតត្រឹមពេលនេះ ឧប្បត្តិហេតុទាក់ទងនឹងគ្រោះមហន្តរាយធម្មជាតិនៅប្រទេសវៀតណាម ចាប់តាំងពីដើមឆ្នាំ២០២៤មក បានបណ្តាលឲ្យមនុស្សចំនួន១០៤នាក់ស្លាប់ឬបាត់ខ្លួន ព្រមទាំងបង្កជាការខូចខាតគិតជាទំហំទឹកប្រាក់ប្រមាណ២ទ្រីលានដុង (៧៩.២លានដុល្លារអាមេរិក)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Tuoi Tre កាលពីថ្ងៃចន្ទទី៥ខែសីហាឆ្នាំ២០២៤, តួលេខទាំងនេះ ត្រូវបានបង្ហាញក្នុងរបាយការណ៍ ដែលដាក់ជូននាយករដ្ឋមន្ត្រី Pham Minh Chinh កាលពីថ្ងៃអាទិត្យ។

រលកកម្តៅ គ្រោះរាំងស្ងួត និងការជ្រៀតចូលនៃទឹកប្រៃ បានវាយលុកប្រទេសវៀតណាមខ្លាំងនៅដើមឆ្នាំនេះ ខណៈមកដល់ពាក់កណ្តាលឆ្នាំ វៀតណាម ត្រូវរងគ្រោះជាទម្ងន់បន្ថែមទៀតដោយបំណាក់ដី គ្រោះទឹកជំនន់ និងភ្លៀងធ្លាក់ខ្លាំង ភាគច្រើននៅតំបន់ភាគខាងជើង និងកណ្តាល។

ត្រឹមមួយខែកក្កដា ពលរដ្ឋ​ជាង៤០​នាក់ ត្រូវ​​គេ​រាយការណ៍​ថា​​ស្លាប់ និង​បាត់​ខ្លួន​ដោយ​សារ​ព្យុះ​ភ្លៀង និង​បំណាក់ដី។

មិនត្រឹមប៉ុណ្ណឹង មជ្ឈមណ្ឌលជាតិសម្រាប់ការព្យាករធនធានជលសាស្ត្របានប្រកាសថា លំនាំអាកាសធាតុ La Niña អាចនឹងប៉ះពាល់ដល់ប្រទេសចាប់ពីខែសីហាតទៅ ដែលនឹងបណ្តាលឲ្យមានព្យុះកាចសាហាវ ភ្លៀងធ្លាក់ខ្លាំង ទឹកជំនន់ បំណាក់ដី និងបាក់ទំនប់ ជាហេតុបង្កហានិភ័យធំធេងដល់ផលិតកម្ម ការប្រកបរបរចិញ្ចឹមជីវិត ផ្ទះសម្បែងនិងសុវត្ថិភាពរបស់អ្នកស្រុក។

ស្របពេលជាមួយគ្នានោះ ក្រសួងធនធានធម្មជាតិនិងបរិស្ថាន ក៏ត្រូវបានស្នើឲ្យសិក្សាឲ្យទាន់ពេលវេលា និងតាមដានការព្យាករក៏ដូចជាការព្រមានផងដែរ ដើម្បីទប់ស្កាត់គ្រោះមហន្តរាយ៕

អត្ថបទ៖ សុខ សុវណ្ណ

ចុចអាន៖ ២ខែចុងក្រោយ ភាគខាងជើងវៀតណាម ធ្លាក់ភ្លៀងខ្លាំង បង្កគ្រោះមហន្តរាយធំធេង