ជីវិតកម្សាន្ដ

ប្រធានសមាគមសិល្បករប្តេជ្ញាជួយជំរុញលើកស្ទួយ អភិរក្ស និងអភិវឌ្ឍន៍វិស័យសិល្បៈវប្បធម៌ខ្មែរ

បានផុស

២ ខែ មុន

នៅ

ថ្ងៃពុធ ៧ សីហា ២០២៤

ដោយ

លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរប្រកាសបានប្តេជ្ញាចិត្តយ៉ាងមុតមាំក្នុងការជួយជំរុញលើកស្ទួយ អភិរក្ស និងអភិវឌ្ឍន៍វិស័យសិល្បៈវប្បធម៌ខ្មែរដ៏ល្អផូរផង់ឱ្យកាន់តែមានកិត្យានុភាពបន្ថែមទៀតទាំងលើឆាកជាតិ និងអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងពីសំណាក់លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរនេះ បានធ្វើឡើងក្នុងឱកាសដឹកនាំក្រុមប្រឹក្សាភិបាលគណៈប្រតិបត្តិរបស់សមាគមសិល្បករខ្មែរ ចូលជួបសំណេះសំណាលសម្ដែងការគួរសមជាមួយលោកជំទាវបណ្ឌិត ពេជ្រ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិកម្ពុជា និងទទួលអនុសាសន៍ណែនាំកាលពីថ្ងៃទី៦ ខែសីហាឆ្នាំ២០២៤។

ជាមួយគ្នានោះដែរលោកជំទាវអ្នកឧកញ៉ា ម៉ៅ ចំណាន ក៏បានស្នើសុំឱ្យមានការចុះអនុស្សរណៈយោគយល់គ្នារវាងសមាគមសិល្បករខ្មែរ និងសមាគមកាយឫទ្ធិកម្ពុជា និងក្រុមគ្រូពេទ្យស្ម័គ្រចិត្តសម្ដេចតេជោ (TYDA) ដើម្បីធ្វើកិច្ចការងារសង្គមរួមគ្នាផងដែរ។ លោកជំទាវអ្នកឧកញ៉ាបានគោរពថ្លែងនូវអំណរគុណជូនចំពោះលោកជំទាវបណ្ឌិតពេជ្រ ចន្ទមុន្នី ហ៊ុនម៉ាណែត ដែលបានអញ្ជើញចូលរួមជាអធិបតីនៅក្នុងពិធីជួបសំណេះសំណាលនេះ។

ប្រធានសមាគមសិល្បករខ្មែរបានជម្រាបជូនលោកជំទាវបណ្ឌិតស្ត្រីទី១នៃកម្ពុជាអំពីប្រវត្តិរបស់សមាគម ត្រូវបានបង្កើតឡើងតាំងពីឆ្នាំ២០០៦ រហូតមកដល់ពេលនេះរួមទាំងសមិទ្ធផលការងារថ្មីៗដែលសម្រេចបាននៅក្នុងអាណត្តិទី៦ក្រោមការដឹកនាំរបស់លោក ជំទាវអ្នកឧកញ៉ារយៈពេលជាង៣ខែមកនេះ។

ចំពោះសកម្មភាពវិញសមាគមបានរៀបចំ និងចូលរួមរៀបចំព្រឹត្តិការសង្គមវប្បធម៌ជាច្រើនរួចមកហើយថ្មីៗនេះក៏បានដឹកនាំសិល្បករ-សិល្បការិនីប្រមាណ២០០នាក់ ចូលរួមអបអរសាទរមហាព្រឹត្តិការណ៍បើកការដ្ឋានសាងសង់ “ព្រែកជីកហ្វូណតេជោ”ផងដែរ រួមទាំងសកម្មភាពសប្បុរសធម៌ជួយសម្រួលដល់ជីវភាពសិល្បករចាស់ជរា និងបាត់បង់សមត្ថភាពក្នុងការសម្តែង ត្រូវបានអនុវត្តជាបន្តបន្ទាប់។ ប្រធានសមាគមក៏បានជម្រាបជូនពីផែនការសកម្មភាពនានាជាបន្តបន្ទាប់របស់សមាគមក្នុងការចូលរួមលើកកម្ពស់វិស័យសិល្បៈវប្បធម៌ជាតិ ផ្សារភ្ជាប់នឹងវិស័យទេសចរណ៍ផងដែរ។

ជាការឆ្លើយតបលោកជំទាវបណ្ឌិត ពេជ្រ ចន្ទមុន្នី ហ៊ុនម៉ាណែត ស្ត្រីទី១កម្ពុជាបានសម្ដែងនូវការកោតសរសើរ និងវាយតម្លៃខ្ពស់ចំពោះសមាគមសិល្បករខ្មែរ ក្រោមកដឹកនាំដោយលោកជំទាវអ្នកឧកញ៉ា ម៉ៅ ចំណាន ជាប្រធានក្នុងរយៈពេលកន្លងមកនេះ ដែលបានធ្វើកិច្ចការងារជាច្រើនក្នុងការចូលរួមលើកកម្ពស់វិស័យសិល្បៈវប្បធម៌ក៏ដូចជាកិច្ចការងារក្នុងចូលរួមចំណែកជួយដល់សង្គមជាតិ។

លោកជំទាវបណ្ឌិត ពេជ្រ ចន្ទមុន្នី ក៏បានស្វាគមន៍នូវសំណើររបស់អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរក្នុងការចុះអនុស្សរណៈយោគយល់គ្នារវាងសមាគមសិល្បករខ្មែរមួយនឹងសមាគមកាយឫទ្ធិកម្ពុជាក៏ដូចជាសមាគមក្រុមគ្រូពេទ្យស្ម័គ្រចិត្តសម្ដេចតេជោ(TYDA) ដើម្បីធ្វើកិច្ចសហប្រតិបត្តិការធ្វើការងារសង្គម សិល្បៈវប្បធម៌ និងការងារមនុស្សធម៌រួមគ្នានៅពេលខាងមុខផងដែរ៕

អត្ថបទ៖ ចាន់រ៉ា