រុស្ស៊ី ចាប់ផ្តើមបញ្ជូនអាវុធទៅឲ្យអ៊ីរ៉ង់ ត្រៀមធ្វើសង្គ្រាមជាមួយ អ៊ីស្រាអែល 

តាមការចុះផ្សាយរបស់ Daily Mail ដោយដកស្រង់សម្តីមន្ត្រីនៅទីក្រុងតេហេរ៉ង់, ពេលនេះប្រទេសរុស្ស៊ី បានចាប់ផ្តើមបញ្ជូនសព្វាវុធទៅឲ្យអ៊ីរ៉ង់ហើយ ដើម្បីត្រៀមធ្វើសង្គ្រាមជាមួយអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍កាលពីថ្ងៃអង្គារទី៦ខែសីហា, មន្ត្រីអ៊ីរ៉ង់ប្រាប់ថា រុស្ស៊ី ចាប់ផ្តើមបញ្ជូនរ៉ាដានិងប្រព័ន្ធការពារដែនអាកាសដ៏ទំនើបរូចហើយ ជាពិសេស ខែល S-300 ដែលផលិតដោយរុស្ស៊ីផ្ទាល់។ 

ទោះបីជាយ៉ាងណាក៏ដោយ គេមិនដឹងច្បាស់ទេថាតើ អ៊ីរ៉ង់ បានស្នើសុំសព្វាវុធអ្វីខ្លះពីភាគីរុស្ស៊ី ហើយទីក្រុងមូស្គូ ក៏មិនទាន់ចេញមុខនិយាយពាក់ព័ន្ធរឿងនេះដែរ។

ព័ត៌មាននេះកើតឡើងស្របពេល លេខាធិការក្រុមប្រឹក្សាសន្តិសុខរុស្ស៊ី និងជាអតីតរដ្ឋមន្ត្រីការពារជាតិលោក Sergei Shoigu បានជួបជាមួយប្រធានាធិបតីអ៊ីរ៉ង់ Masoud Pezeshkian និងមន្ត្រីសន្តិសុខកំពូលផ្សេងទៀត ដើម្បីគាំទ្រប្រទេសមជ្ឈិមបូព៌ាមួយនេះ។

ក្នុងជំនួបនោះ លោក Shoigu ថ្លែងថា «យើងត្រៀមខ្លួនរួចជាស្រេច ដើម្បីធ្វើកិច្ចសហប្រតិបត្តិការពេញទំហឹងជាមួយប្រទេសអ៊ីរ៉ង់ក្នុងវិស័យផ្សេងៗ»។

ទន្ទឹមនោះ លោក Pezeshkian ក៏ថ្លែងអំណរគុណដល់ទីក្រុងមូស្គូវិញដែរ សម្រាប់ការគាំទ្រអ៊ីរ៉ង់នៅក្នុងគ្រាដ៏លំបាក ហើយលោកចង់ពង្រឹងទំនាក់ទំនងជាមួយរុស្ស៊ីបន្ថែមទៀត។

សូមបញ្ជាក់ថា បច្ចុប្បន្នអ៊ីរ៉ង់កំពុងរៀបចំបើកការវាយប្រហារដ៏ធំមួយ សងសឹកអ៊ីស្រាអែល ដែលខ្លួនចោទថា បានសម្លាប់មេក្រុមហាម៉ាសឈ្មោះ Ismail Haniyeh នៅក្នុងទីក្រុង តេហេរ៉ង់ និងមេបញ្ជាការក្រុម ហេសបូឡា លោក Fuad Shukr ក្នុងទីក្រុង បេរូត កាលពីខែមុន៕

អត្ថបទ៖ សុខ សុវណ្ណ

ចុចអាន៖ មន្ត្រីកំពូល​​រុស្ស៊ី​​ ជាន់​ទឹក​ដី​អ៊ីរ៉ង់ ខណៈអ៊ីរ៉ង់​សញ្ជឹងវាយប្រហារ​​​អ៊ីស្រាអែល​​​