ព័ត៌មានអន្ដរជាតិ

ការខ្ស័យធនរបស់ធនាគារជនបទនៅឥណ្ឌូណេស៊ី កើនឡើងជាគំហុក

បានផុស

៥ ខែ មុន

នៅ

ថ្ងៃពុធ ៧ សីហា ២០២៤

ដោយ

អាជ្ញាធរសេវាកម្មហិរញ្ញវត្ថុឥណ្ឌូណេស៊ី (OJK) បានដកហូតអាជ្ញាប័ណ្ណអាជីវកម្មរបស់ធនាគារចំនួន ១៤ នៅក្នុងប្រទេសឥណ្ឌូនេស៊ី ចាប់តាំងពីដើមឆ្នាំ ២០២៤ ដោយសារធនាគារទាំងនោះខ្ស័យធន។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកប្រតិបត្តិនៃការគ្រប់គ្រងធនាគាររបស់ OJK លោក Dian Ediana Rae បានឱ្យដឹងកាលពីថ្ងៃចន្ទថា៖ «ក្នុងឆ្នាំ ២០១៤ ធនាគារចំនួន ១៤ ក្នុងប្រទេសឥណ្ឌូណេស៊ីបានដួលរលំ ហើយត្រូវបានដកហូតអាជ្ញាប័ណ្ណអាជីវកម្មរបស់ពួកគេ។ ធនាគារទាំងនេះ គឺជាប្រភេទធនាគារជនបទ (BPR)»។

បើតាម Jakarta Globe ចំនួននៃធនាគារដែលក្ស័យធននៅឆ្នាំនេះ មានច្រើនទៅដល់ទៅជាង៣ដងធៀបនឹងឆ្នាំមុន ហើយនេះគិតត្រឹមតែដើមសីហាប៉ុណ្ណោះ។ កាលពីឆ្នាំ ២០២៣ មានតែធនាគារចំនួន ៤ បានក្ស័យធនក្នុងប្រទេសឥណ្ឌូណេស៊ី។

ជាមធ្យម ធនាគារចំនួន៧-៨ បានក្ស័យធនជារៀងរាល់ឆ្នាំនៅក្នុងប្រទេសឥណ្ឌូណេស៊ី ដោយសារការគ្រប់គ្រងហិរញ្ញវត្ថុមិនត្រឹមត្រូវ រួមទាំងការក្លែងបន្លំប្រាក់ក្នុងស្ថាប័នធនាគារផ្ទាល់។ ចាប់តាំងពីឆ្នាំ ២០០៥ មក ធនាគារសរុបចំនួន ១៣៦ បានក្ស័យធន។ បើតាមលោក Dian Ediana Rae ស្ទើរតែទាំងអស់នៃធនាគារដែលបានក្ស័យធនក្នុងឆ្នាំនេះ គឺជាប្រភេទធនាគារជនបទ។

អ្នកជំនាញមើលឃើញថា ការក្ស័យធនរបស់ធនាគារជនបទ អាចបង្កើតគម្លាតនៃការសន្សំ-វិនិយោគកាន់តែធំ ហើយធ្វើឱ្យការទទួលបានមូលនិធិកម្ចីដើម្បីអភិវឌ្ឍអាជីវកម្មខ្នាតតូច និងតូចបំផុត មានការថយចុះ ដែលការណ៍នេះ នឹងវាជះឥទ្ធិពលដល់កំណើនសេដ្ឋកិច្ចក្នុងសហគមន៍តូចៗ។