ព័ត៌មានអន្ដរជាតិ

ទឹកជំនន់អាចប៉ះពាល់មនុស្សរាប់លាននាក់ ខណៈអ្នកស្លាប់កើនដល់១៥៦នាក់នៅប៉ាគីស្ថាន

បានផុស

៤ ខែ មុន

នៅ

ថ្ងៃសុក្រ ៩ សីហា ២០២៤

ដោយ

ភ្លៀងធ្លាប់ជាប់គ្នារយៈពេលជិត៦សប្តាហ៍នៅប្រទេសប៉ាគីស្ថាន បណ្តាលឱ្យមានទឹកជំនន់យ៉ាងគំហុកនៅតំបន់ជាច្រើនស្ទើរពេញផ្ទៃប្រទេស និងបណ្តាលឱ្យអ្នកស្លាប់កើនឡើងដល់១៥៦នាក់មកដល់ពេលនេះ ខណៈដែលភ្លៀងនៅតែបន្តធ្លាក់ឥតស្រាកបង្កជាក្តីបារម្ភកើតមានវិបត្តិធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរជាតិគ្រប់គ្រងគ្រោះមហន្តរាយប៉ាគីស្ថានបានឲ្យដឹងថា ផ្ទះជាង ១៨០០ខ្នងត្រូវបានខូចខាតចាប់តាំងពីថ្ងៃទី១ខែកក្កដា ហើយភ្លៀងបានជន់លិចផ្លូវជាច្រើនក្នុងទីក្រុង Lahore ភាគខាងកើត ខណៈមនុស្សភាគច្រើនក្នុងចំណោមអ្នកស្លាប់ទាំង១៥៦នាក់គឺនៅក្នុងខេត្ត Punjab ភាគខាងកើត និងភាគពាយ័ព្យនៃខេត្ត Khyber Pakhtunkhwa។ លើសពីនេះ មនុស្សជិត៣០០នាក់បានរងគ្រោះថ្នាក់លើរាងកាយនៅក្នុងឧប្បត្តិហេតុទឹកជំនន់នេះ ហើយអាជ្ញាធរកំពុងផ្តល់អាហារដោយឥតគិតថ្លៃ និងការថែទាំសុខភាពដល់ប្រជាពលរដ្ឋដែលរងផលប៉ះពាល់។

បច្ចុប្បន្នមនុស្សជាង២០០០នាក់ កំពុងស្ថិតនៅក្នុងជំរុំសង្គ្រោះបណ្តោះអាសន្ននៅតំបន់ដែលរងផលប៉ះពាល់ដោយទឹកភ្លៀងខ្លាំងនៅក្នុងខេត្ត Sindh ភាគខាងត្បូង។ កាលពីថ្ងៃព្រហស្បតិ៍ ក្រុមជំនួយគណៈកម្មាធិការសង្គ្រោះអន្តរជាតិក៏បានរៀបចំពង្រីកការឆ្លើយតបរបស់ខ្លួននៅក្នុងប្រទេសប៉ាគីស្ថាន ជាមួយនឹងភ្លៀងធ្លាក់ដែលកំពុងគំរាមកំហែងដល់អាយុជីវិត និងជីវភាពរស់នៅរបស់មនុស្សរាប់លាននាក់។

ប្រទេសប៉ាគីស្ថានកំពុងស្ថិតក្នុងពាក់កណ្តាលរដូវខ្យល់មូសុងប្រចាំឆ្នាំ ដែលចាប់ផ្តើមពីខែកក្កដាដល់ខែកញ្ញាស្របពេលអ្នកវិទ្យាសាស្ត្រ និងអ្នកព្យាករណ៍អាកាសធាតុបានព្រមានពីការប្រែប្រួលអាកាសធាតុចំពោះភ្លៀងធ្លាក់ខ្លាំងក្នុងប៉ុន្មានឆ្នាំថ្មីៗនេះ។

កាលពីឆ្នាំ ២០២២នៅពេលដែលមានភ្លៀងធ្លាក់ខ្លាំងបានធ្វើឱ្យទឹកទន្លេកើនឡើង និងជន់លិចមួយភាគបីនៃប្រទេសនេះ បានសម្លាប់មនុស្សចំនួន ១,៧៣៩ នាក់ និងបង្កការខូចខាតគិតជាទឹកប្រាក់ចំនួន ៣០ ពាន់លានដុល្លារ៕