ម្ចាស់សិប្បកម្មចានកាកអំពៅស្នើដល់ប្រជាជនខ្មែរជួយគាំទ្រផលិតផលក្នុងស្រុក

ម្ចាស់សិប្បកម្មចានកាកអំពៅស្នើសុំឱ្យប្រជាជនខ្មែរទាំងអស់ជួយគាំទ្រផលិតផលក្នុងស្រុកឱ្យបានច្រើន ដើម្បីជួយជំរុញសិប្បកម្មក្នុងស្រុក អាចវិវត្តខ្លួនទៅជាឧស្សាហកម្មធំៗ ជាពិសេសការជួយលើកស្ទួយផលិតផលក្នុងស្រុក។

លោក តាំង សុជាតិ ម្ចាស់សិប្បកម្មចានកាកអំពៅ បានប្រាប់ កម្ពុជាថ្មី ថា សម្រាប់សិប្បកម្មកែច្នៃកាកអំពៅផលិតចេញជាចាន ក្នុងសិប្បកម្មរបស់លោកនាពេលបច្ចុប្បន្ន អាចមានលទ្ធភាពផលិតចានកាកអំពៅបានប្រមាណ ២០០ ទៅ៣០០ចាន ខណៈដែរតម្រូវការ​ និងការគាំទ្រពីសំណាក់ប្រជាជនខ្មែរ ហាក់មិនសូវពេញនិយមប្រើប្រាស់ ជាជាងផលិតផលនាំចូលពីក្រៅប្រទេស។

លោក​ បន្តថា៖« សម្រាប់ចានកាកអំពៅ​នេះ វាបានចូលរួមចំណែកយ៉ាងខ្លាំងដល់បរិស្ថាន ជាក់ស្ដែងជារៀងរាល់ថ្ងៃ កាកអំពៅដែលអាជីវករបានយកមកដល់សិប្បកម្ម ដើម្បីកែច្នៃឡើងវិញនោះ សុទ្ធតែបានចូលរួមចំណែកជួយដល់បរិស្ថានសង្គម ជារៀងរាល់ថ្ងៃ»។

ទាក់ទងនឹងដំណើរការផលិតចានកាកអំពៅ សិប្បកម្មរបស់លោក តាំង សុជាតិ បានសម្រិតសម្រាំងយ៉ាងប្រណិតទៅលើគុណភាព និងសោភ័ណភាព សម្រាប់ប្រជាជនខ្មែររួចជាស្រេច។ ជាក់ស្ដែង កាកអំពៅដែលប្រមូលចេញពីអាជីវករត្រូវជ្រើសរើសកាកអំពៅណាដែលស្អាត ទើបបានយកមកកាន់សិប្បកម្មដើម្បីធ្វើការកិន និងសម្លាប់មេរោគចេញ ទើបអាចផលិតចេញជាចាន សម្រាប់ដាក់លក់នៅលើទីផ្សារបាន។

ម្ចាស់សិប្បកម្មរូបនេះ បន្ថែមទៀតថា សម្រាប់ទីផ្សារចានកាកអំពៅរបស់លោកនាពេលបច្ចុប្បន្ននេះ កំពុងបានដាក់លក់នៅតាមផ្សារទំនើបមួយចំនួនក្នុងរាជធានីភ្នំពេញ តែអ្វីដែលលោកមើលឃើញនោះ ផលិតផលដែលជាស្នាដៃខ្មែរ ហាក់មិនសូវទទួលបានការគាំទ្រ និងការប្រើប្រាស់ ពីសំណាក់ប្រជាជនខ្មែរ នៅឡើយ។

លោក តាំង សុជាតិ បានប្រាប់ឱ្យដឹងទៀតថា ក្នុងនាមលោកជាម្ចាស់សិប្បកម្មកែច្នៃចានពីកាកអំពៅ សុំស្នើសុំចិត្ត និងលើកទឹកចិត្តប្រជាជនខ្មែរទាំងអស់ មេត្តាចូលរួមជួយប្រើប្រាស់ផលិតផលជាស្នាដៃកូនខ្មែរ ត្បិតតែគុណភាព សោភ័ណភាព ផលិតផលខ្មែរពេលខ្លះ ពុំអាចប្រកួតប្រជែងជាមួយផលិតផលបរទេសបាន តែត្រូវចាំថា៖ «ដើម្បីសិប្បកម្មក្នុងស្រុកទាំងអស់ អាចវិវត្តខ្លួនទៅជាឧស្សាហកម្មធំៗបាន គឺចាប់ផ្ដើមពីការគំាទ្ររបស់ប្រជាជនខ្មែរទាំងអស់គ្នា ផងដែរ‍»។

អត្ថបទ៖ សួស សិត