ប្រមុខការពារជាតិកម្ពុជា ព្រមានទៅក្រុមប្រឆាំងថា «សូមមេត្តាកុំឆ្លងផុតពីបន្ទាត់ក្រហមឱ្យសោះ!»

«សូមមេត្តាកុំឆ្លងផុតពីបន្ទាត់ក្រហមឱ្យសោះ!»។ នេះជាសាររបស់ប្រមុខក្រសួងការពារជាតិកម្ពុជា នាយឧត្តមសេនីយ៍ ទៀ សីហា ព្រមានទៅកាន់ក្រុមប្រឆាំងជ្រុលនិយមមួយក្ដាប់តូច ដែលបាននិងកំពុងញុះញង់ឱ្យពលរដ្ឋ និងកងកម្លាំងប្រដាប់អាវុធ ក្រោកបះបោរផ្តួលរំលំរាជរដ្ឋាភិបាលស្របច្បាប់នៅកម្ពុជា។

នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានផ្ញើសារបន្ថែមថា«សូមបងប្អូនជនរួមជាតិមួយចំនួនតូច (រស់នៅកម្ពុជា ឬក្រៅប្រទេស) សូមឈប់ជឿតាមការញុះញង់ពីជនអគតិពីខាងក្រៅប្រទេស ដែលមានបំណងអាក្រក់ចង់ឱ្យកម្ពុជាធ្លាក់ទៅរកសង្គ្រាម ឬការបែកបាក់ផ្ទៃក្នុង ដូចប្រទេសមួយចំនួនដែលកំពុងតែជួបវិបត្តិ ដោយមជ្ឈដ្ឋានខាងក្រៅ (បដិវត្តន៍ពណ៌ ជាដើម)»។ លោកនាយឧត្តមសេនីយ៍ ក៏ទទូចឱ្យអ្នកទាំងនោះឈប់សង្ស័យលើការដឹកនាំរបស់រាជរដ្ឋាភិបាល ផ្ទុយទៅវិញត្រូវរួមគ្នាធ្វើឱ្យកម្ពុជាខ្លាំង រុងរឿង កម្ពុជាអភិវឌ្ឍស្មើមុខស្មើមាត់ដូចប្រទេសជិតខាង និងប្រទេសដ៏ទៃទៀត ទើបជាការប្រសើរ។

ក្នុងនាមថ្នាក់ដឹកនាំក្រសួងការពារជាតិ នាយទាហាន នាយទាហានរង និងពលទាហាន នៃកងយោធពលខេមរភូមិន្ទ លោកនាយឧត្តមសេនីយ៍ ទៀ សីហា បានប្រកាសថ្កោលទោសចំពោះក្រុមប្រឆាំងជ្រុលនិយមមួយក្តាប់តូចនៅក្រៅប្រទេសនេះ ហើយដាច់ខាតការពារឱ្យបានរដ្ឋធម្មនុញ្ញ ជាតិ សាសនា ព្រះមហាក្សត្រ ពិសេសការពារឱ្យខាងតែបានរាជរដ្ឋាភិបាលស្រប់ច្បាប់ ផលប្រយោជន៍ជាតិ ការពារសុខសន្តិភាព ទោះក្នុងតម្លៃណាក៏ដោយមិនអាចឱ្យក្រុមណាមកបំផ្លិចបំផ្លាញជាដាច់ខាត។​

បន្ថែមពីការប្រកាសដោយផ្ទាល់របស់លោកនាយឧត្តមសេនីយ៍ ទៀ សីហា, ក្រសួងការពារជាតិ ក៏បានចេញញាតិគាំទ្រយ៉ាងពេញទំហឹងចំពោះសារសំឡេងពិសេសរបស់សម្តេចតេជោ ហ៊ុន សែន ប្រធានព្រឹទ្ធសភា ដែលបានថ្លែងនារសៀលថ្ងៃទី១២ ខែសីហា ឆ្នាំ២០២៤ ពាក់ព័ន្ធនឹងកិច្ចសហប្រតិបត្តិការអភិវឌ្ឍតំបន់ត្រីកោណកម្ពុជា-ឡាវ-វៀតណាម។

ញាត្តិរបស់ក្រសួងការពារជាតិ បានលើកឡើងដែរថា កងយោធពលខេមរភូមិន្ទ នៅតែជាឆ្អឹងខ្នងដ៏រឹងមាំបំផុតរបស់រាជរដ្ឋាភិបាល ការពារដាច់ខាតរាជរដ្ឋាភិបាលស្របច្បាប់ ដែលកើតចេញពីការបោះឆ្នោតដោយប្រជាពលរដ្ឋ។ ដូច្នេះ ការប៉ុនប៉ងអូសទាញប្រទេសកម្ពុជាឱ្យធ្លាក់ក្នុងសភាពវឹកវរ ហឹង្សា បង្ហូរឈាម និងឈានទៅរកសង្គ្រាមស៊ីវិលសារជាថ្មី ជាអំពើល្មើសច្បាប់ មិនអាចអត់ឱនបានឡើយ។

ក្រសួងការពារជាតិ ប្រឆាំងដាច់ខាតរាល់ឧបាយកល និងសកម្មភាពប៉ុន​ប៉ងផ្តួលរំលំរាជរដ្ឋាភិបាលស្របច្បាប់ ផ្ទុយពីគោលការណ៍លទ្ធិប្រជាធិបតេយ្យ និងពិសេសគាំទ្រដោយឥតងាករេចំពោះរាជរដ្ឋាភិបាលកម្ពុជា ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី៕