ព័ត៌មានជាតិ

រដ្ឋមន្រ្តីក្រសួងសាធារណការ បន្តចុះដល់ទីរួមខេត្តកែប ពិនិត្យទីតាំងផ្លូវនាវាចរណ៍ព្រែកជីកហ្វូណនតេជោ

បានផុស

៣ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

បន្ទាប់ពីបញ្ចប់ការចុះពិនិត្យទីតាំងភូមិសាស្រ្តប្រឡាយ ១៥ នៅស្រុកអង្គបូរី-ក្រុងដូនកែវ ខេត្តតាកែវ នៅព្រឹកមិញនេះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានបន្តដឹកនាំគណៈប្រតិភូ និងក្រុមការងារពាក់ព័ន្ធ ចុះពិនិត្យទីតាំងភូមិសាស្រ្តឆ្នេរអង្គោល នៅក្នុងទីរួមខេត្តកែប នៃគម្រោងផ្លូវនាវាចរណ៍ “ព្រែកជីកហ្វូណនតេជោ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះនៅទីតាំងឆ្នេរអង្គោល ទីរួមខេត្តកែប ដើម្បីត្រួតពិនិត្យនិយាមកា រួមទាំងធ្វើការផ្ទៀងផ្ទាត់ផែនទីលម្អិតនៃគម្រោងនៅលើភូមិសាស្រ្តជាក់ស្តែង។

ព្រែកជីកហ្វូណនតេជោ ជាគម្រោងទាញទន្លេភ្ជាប់ទៅសមុទ្រនៃគម្រោងអភិវឌ្ឍផ្លូវនាវាចរណ៍របស់ប្រទេសកម្ពុជា។ បើតាមការសិក្សាព្រែកជីកនេះមានប្រវែង ១៨០ គីឡូម៉ែត្រ ដែលចំណុចចាប់ផ្តើមចេញពីព្រែកតាកែវនៃទន្លេមេគង្គ ឆ្លងកាត់តាមព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ និងបន្តរហូតដល់សមុទ្រខេត្តកែប ដោយឆ្លងកាត់ភូមិសាស្ត្រ ខេត្តចំនួន ៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប។

ការជីកព្រែកនេះធ្វើនៅលើតម្រាយខ្សែផ្លូវទឹកធម្មជាតិ និងផ្លូវទឹកបុរាណ ដែលបានបន្សល់ទុកតាំងពីសម័យអាណាចក្រហ្វូណន។ តម្រាយផ្លូវទឹកធម្មជាតិដែលមានស្រាប់មានប្រវែងប្រមាណ ១៣៥ គីឡូម៉ែត្រ ខណៈផ្លូវទឹកត្រូវជីកតម្រង់កុំឱ្យកោងពេកមានប្រវែងជាង ៣៨ គីឡូម៉ែត្រ និងផ្លូវទឹកជីកថ្មីមានប្រវែងជាង ៧ គីឡូម៉ែត្រ ដើម្បីកាត់បន្ថយកំណោងនិងកាត់បន្ថយចម្ងាយតភ្ជាប់ទៅកាន់សមុទ្រ។

ព្រែកជីកប្រវត្តិសាស្រ្តនេះ មានទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ ជម្រៅទឹកប្រមាណ ៥,៤ ម៉ែត្រ និងមានគន្លងនាវាចរណ៍ចំនួន ២គន្លង។

គម្រោងនឹងប្រើប្រាស់រយៈពេលសាងសង់ប្រមាណ ៤៨ ខែ គ្រោងបញ្ចប់នៅក្នុងអំឡុងឆ្នាំ២០២៨ ដោយប្រើប្រាស់ទុនវិនិយោគសរុបប្រមាណ ១,៧ ពាន់លាន ដុល្លារអាម៉េរិក ក្នុងនោះទុនវិនិយោគរបស់សហគ្រាសសាធារណៈ និងក្រុមហ៊ុនក្នុងស្រុកមានចំនួន ៥១% និងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) មានចំនួន ៤៩% ដោយការវិនិយោគនឹងត្រូវអនុវត្តក្រោមរូបភាពសាងសង់-ប្រតិបត្តិការ-ផ្ទេរ (BOT)៕