ហាងឆេងមាសហក់ឡើងជាថ្មី អ្នកជំនាញថា តម្លៃមាស​នឹងកើនដល់ជាង ៣ ពាន់ដុល្លារក្នុងមួយតម្លឹង

ម្ចាស់ហាងលក់មាសនៅផ្សារជម្ពូវ័នបានឱ្យដឹងថា តម្លៃមាសបានហក់ឡើងវិញនៅរយៈពេល ៣ ថ្ងៃ​នេះ ដោយលក់ចេញក្នុងតម្លៃ ២៩៤ ដុល្លារ ​​​​​ក្នុង​មួយជីនៅថ្ងៃទី ១៤ ខែកក្កដា ឆ្នាំ ២០២៤។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities បានឱ្យដឹងនៅព្រឹកថ្ងៃទី ១៤ ខែសីហា ឆ្នាំ ២០២៤ នេះថា រយៈពេល ៣ ថ្ងៃចុងក្រោយនេះ តម្លៃមាសបានកើនឡើងដល់ជិត ២៩៩១ ដុល្លារក្នុងមួយតម្លឹង។

គិតត្រឹមព្រឹកថ្ងៃទី ១៤ ខែសីហា ឆ្នាំ ២០២៤ តម្លៃហាងឆេងមាសជួញដូរឡើងដល់ ២៩៦៣ ដុល្លារ ក្នុងមួយតម្លឹងនៅកម្ពុជា ឬស្មើរនឹង ២៤៦៣ ដុល្លារក្នុងមួយអោន នៅទីផ្សារអន្តរជាតិ។

លោក ឡុង សំណាងថ្លែងថា៖ «កត្តាដែលធ្វើឱ្យហាងឆេងមាសហក់ឡើងខ្ពស់ គឺពាក់ព័ន្ធនឹងទំនុកចិត្តរបស់អ្នកប្រើប្រាស់​លុយដុល្លារ ជាពិសេសវិនិយោគិនធំៗ ដែលគេមើលឃើញថា ធនាគារកណ្ដាល នឹងកាត់បន្ថយអត្រាការប្រាក់ពី ០.២៥ ទៅ ០.៥០ នៅខែកញ្ញាខាងមុខ»។

លោក ឡុង សំណាង បញ្ជាក់ថា អត្រាការប្រាក់លុយដុល្លារអាមេរិកស្ថិតនៅ ៥.៥០ ប្រសិនបើធនាគារកណ្ដាលអាមេរិកកាត់បន្ថយអត្រាការប្រាក់ពី ០.២៥ ទៅ ០.៥០ ដូច្នេះអត្រាការប្រាក់របស់សហរដ្ឋអាមេរិកនៅត្រឹមតែ ៥.00 ដែលនាំឱ្យលុយដុល្លារចុះខ្សោយ ហើយរុញច្រានឱ្យតម្លៃហាងឆេងមាសកើនឡើងតែម្ដង។

លោក ឡុង សំណាង បន្តថា៖ «ពេលតម្លៃលុយដុល្លារធ្លាក់ចុះ ធ្វើឱ្យទំនុកចិត្តអ្នកកាន់លុយដុល្លារក៏ធ្លាក់ចុះដែរ អញ្ចឹងគេលែងយកលុយដុល្លារទៅដាក់នៅធនាគារដើម្បីបានការប្រាក់ទៀតហើយ គេងនឹងអាចដកលុយហ្នឹងមកវិនិយោគអ្វីមួយដែលអាចរកចំណូលក្រៅពីការប្រាក់ ដូចជាការទិញភាគហ៊ុន និងទិញមាសជាដើម»។

បើតាមលោក ឡុង សំណាង តម្លៃមាសនឹងបន្តកើនឡើង ដោយសារតែស្ថានភាពមិនប្រាកដប្រជានៅលើពិភពលោក ធ្វើ​ឱ្យពាណិជ្ជកម្ម និងសេដ្ឋកិច្ចធ្លាក់ចុះ ដែលរុញច្រានឱ្យតម្លៃមាសកើនឡើង ហើយនឹងកើនលើសពី ៣ ពាន់ដុល្លារក្នុងមួយតម្លឹង ឬទៅដល់ ២៥០០ ដុល្លារក្នុងមួយអោន នៅលើទីផ្សារអន្តរជាតិ៕

អត្ថបទ៖ ឡេង ដេត