ព័ត៌មានអន្ដរជាតិ

ដោយសារតែកាបូប LV របស់ស្រ្តីចិនម្នាក់ ជើងហោះហើរ China Express ត្រូវពន្យារមួយម៉ោង

បានផុស

៧ ខែ មុន

នៅ

ថ្ងៃសុក្រ ១៦ សីហា ២០២៤

ដោយ

យោងតាមសារព័ត៌មាន South China Morning Post បានរាយការណ៍ថា នារីជាតិចិនម្នាក់បដិសេធដាក់កាបូប យីហោ Louis Vuitton នៅនឹងមុខជើងរបស់នាង រហូតជើងហោះហើរត្រូវបង្ខំចិត្តពន្យារពេលមួយម៉ោង។ ក្រោយមកនាងត្រូវបានបណ្តេញចេញពីជើងហោះហើរភ្លាមៗ ខណៈដែលមិនព្រមធ្វើតាមច្បាប់របស់យន្តហោះ។

មែនទៅ ឧប្បត្តិហេតុនេះបានផ្ទុះឡើងនៅអាកាសយានដ្ឋានមួយក្នុងក្រុង Chongqing នៃប្រទេសចិន កាលពីថ្ងៃទី ១០ ខែសីហា មកម្ល៉េះ។ បន្ទាប់ពីអ្នករួមដំណើរម្នាក់បានចែករំលែកវីដេអូមួយនៅលើវេទិកាប្រព័ន្ធផ្សព្វផ្សាយសង្គមរបស់ចិន Douyin ដែលវាមានអ្នកចូលមើលជាង ៤ លានដង។

អ្នកដំណើរដែលបានចែករំលែកវីដេអូនៅលើប្រព័ន្ធផ្សព្វផ្សាយសង្គមបាននិយាយថា ស្ត្រីមិនបញ្ចេញឈ្មោះកំពុងអង្គុយនៅក្នុងកៅអីប្រភេទ Business class ក្នុងជើងហោះហើរ China Express Airlines ។ នាពេលនោះ នាងត្រូវបានគេស្នើសុំឲ្យដាក់កាបូប Louis Vuitton នៅក្រោមកៅអីនៅពីមុខនាង។ ប៉ុន្តែ ស្ត្រីរូបនេះបានទទូចឲ្យរក្សាកាបូបនោះនៅក្បែរខ្លួន។

ទោះយ៉ាងណាក៏ដោយ ការបដិសេធរបស់នារីម្នាក់នេះនាំឲ្យមានការពន្យារពេលយូរ ដែលនាំឲ្យខកដំណើរដល់អ្នករួមដំណើរផ្សេងទៀត។ ក្រោយមក បុគ្គលិកលើយន្តហោះបានសម្រេចនាំស្រ្តីជនជាតិចិនរូបនោះចាកចេញេពីជើងហោះហើរភ្លាមៗ រហូតអ្នកលើយន្តហោះជាច្រើននាក់បានបង្ហាញទឹកមុខសប្បាយចិត្ត ដែលគេប្រើវិធនាការមួយនេះដល់អ្នកមិនគោរពច្បាប់ចេញ។

ដោយឡែក ងាកមកកាន់ក្រុមហ៊ុនអាកាសចរណ៍ China Express Airlines បានបដិសេធមិនធ្វើអត្ថាធិប្បាយលើឧប្បត្តិហេតុនេះ ឬចែករំលែកអត្តសញ្ញាណរបស់អ្នកដំណើរនោះទេ។ យ៉ាងណាមិញ វីដេអូនេះបាននាំឲ្យមានប្រតិកម្មចម្រុះនៅលើបណ្ដាញសង្គមចិន ខណៈពេលដែលអ្នកប្រើប្រាស់មួយចំនួនបានរិះគន់ស្ត្រីរូបនេះដែលបំពានច្បាប់ជើងហោះហើរ និងការរំខានដល់អ្នកដំណើរផ្សេងទៀត។ អ្នកខ្លះទៀតបាននិយាយថា ពួកគេយល់ពីភាពស្ទាក់ស្ទើររបស់នាងក្នុងការដាក់កាបូបអ្នករចនាម៉ូដថ្លៃៗនៅលើកន្លែងមិនស្អាត យ៉ាងណាគួរតែទៅដល់កណ្តាល ជាជាងការទាត់នាងចុះពីលើយន្តហោះដែរ៕