កម្ពុជា-ឡាវ គ្រោងសាងសង់ស្ពានឆ្លងកាត់ទន្លេល្ពៅ រវាងខេត្តព្រះវិហារ និងខេត្តចំប៉ាសាក់ ខណៈពលរដ្ឋក៏ចង់បាន

កម្ពុជា-ឡាវ គ្រោងនឹងសាងសង់ស្ពានឆ្លងកាត់ទន្លេល្ពៅ រវាងខេត្តព្រះវិហារ និងខេត្តចំប៉ាសាក់ ហើយប្រជាពលរដ្ឋជាច្រើន រួមនឹងអាជ្ញាធរក៏ទទូចចង់បានផ្លូវ និងស្ពាននេះយ៉ាងខ្លាំងដើម្បីអាចប្រាស្រ័យទាក់ទង និងផ្លាស់ប្តូរទំនិញគ្នាមានភាពងាយស្រួល។

លោក ណុប វុធ្ធី អភិបាលរងខេត្ត និងជាអ្នកនាំពាក្យរដ្ឋបាលខេត្តព្រះវិហារ បានឱ្យដឹងនាព្រឹកថ្ងៃទី១៧ ខែសីហា នេះថា ជាការពិតណាស់ប្រជាពលរដ្ឋក៏ដូចជាអាជ្ញាធរពាក់ព័ន្ធនៃខេត្តព្រះវិហារ បានទទូចស្នើសុំ និងគាំទ្រឱ្យមានការសាងសង់ស្ពានទន្លេល្ពៅ តភ្ជាប់ពីឃុំកំពង់ស្រឡៅមួយ ឆ្ពោះទៅខេត្តចំប៉ាសាក់ ប្រទេសឡាវ ដែលមានផលប្រយោជន៍ច្រើនសម្រាប់ពលរដ្ឋក៏ដូចជាភ្ញៀវទេសចរណ៍ដែលអាចធ្វើដំណើរបានដោយងាយស្រួលជាងបច្ចុប្បន្ន ដែលការធ្វើដំណើរដោយឆ្លងទូក។

លោកអភិបាលរងខេត្ត បានបញ្ជាក់ថា រាជរដ្ឋាភិបាលកម្ពុជា និងប្រទេសឡាវ ក៏ដូចជាក្រសួងសាធារណការ និងដឹកជញ្ជូន កំពុងសិក្សាទីតាំងកសាងស្ពានទន្លេល្ពៅ នេះឱ្យមានភាពល្អប្រសើរ ដើម្បីឱ្យពលរដ្ឋធ្វើដំណើរក៏ដូចជាផ្លាស់ប្ដូរទំនិញគ្នាទៅវិញទៅមកមានភាពងាយស្រួល និងមានសុវត្ថិភាព។

សូមជម្រាបថា លោក គីម រិទ្ធី អភិបាលខេត្តព្រះវិហារ បានថ្លែងនៅក្នុងឃ្លីបវីដេអូមួយ កាលពីថ្ងៃទី១៥ ខែសីហា ឆ្នាំ២០២៤ ថា តំបន់ព្រំដែនរវាងខេត្តព្រះវិហារ និងខេត្តចំប៉ាសាក់ ជាតំបន់ដាច់ស្រយ៉ាលឆ្ងាយពីទីរួមខេត្ត កន្លងមកប្រជាពលរដ្ឋរស់នៅទីនេះមានការលំបាក ក្នុងការប្រាស្រ័យទាក់ទងគ្នា ក៏ដូចជាលំបាកនៅសេវាអប់រំ សេវាសុខភិបាល។

លោកអភិបាលខេត្ត ក៏បានថ្លែងអំណរគុណចំពោះសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា និងជាប្រធានព្រឹទ្ធសភា ដែលគ្រោងស្ថាបនាស្ពានឆ្លងទន្លេល្ពៅ តភ្ជាប់ទៅប្រទេសឡាវ ក្នុងភូមិសាស្ត្រឃុំកំពង់ស្រឡៅមួយ ស្រុកឆែប ខេត្តព្រះវិហារ។

ទន្ទឹមនេះ លោក គីម រិទ្ធី បានប្រកាសគាំទ្រយ៉ាងពេញទំហឹងចំពោះកិច្ចសហប្រតិបត្តិការតំបន់ត្រីកោណ កម្ពុជា-ឡាវ-វៀតណាម ( CLV-DTA) ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបន្តអនុវត្តគោលនយោបាយការពារជាតិរឹងមាំ កសាងខ្សែព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព៕

ដោយ៖ជុន កុសល