៦០ឆ្នាំនៃទំនាក់ទំនងកម្ពុជា-កូរ៉េខាងជើង ឯកអគ្គរដ្ឋទូត ប្តេជ្ញាពង្រឹងពង្រីកកិច្ចសហប្រតិបត្តិការទ្វេភាគី

ដោយឆ្នាំ២០២៤នេះ ជាខួបរយៈពេល៦០ឆ្នាំនៃទំនាក់ទំនងការទូតកម្ពុជា និងកូរ៉េខាងជើង លោកឯកអគ្គរដ្ឋទូតកូរ៉េខាងជើងប្រចាំកម្ពុជា បានប្រកាសប្ដេជ្ញាពង្រឹងពង្រីកនូវកិច្ចសហប្រតិបត្តិការទ្វេភាគីបន្ថែមទៀត។ ទន្ទឹមនេះ លោកឯកអគ្គរដ្ឋទូត ក៏បានកោតសរសើរការរីកចម្រើនរបស់កម្ពុជា។

លោក Jang Yun Gon ឯកអគ្គរដ្ឋទូតកូរ៉េខាងជើងប្រចាំកម្ពុជា បានរំឮកពីទំនាក់ទំនងដ៏យូរអង្វែងរវាងកូរ៉េខាងជើង និងកម្ពុជា ដែលបានពូនជ្រុំដោយលោក គីម អ៊ីលស៊ុង និងសម្ដេចព្រះបរមរតកោដ្ឋ​ សម្តេចបាទព្រះ នរោត្ដម សីហនុ។ ដោយឆ្នាំនេះ គឺជាខួបលើកទី៦០ នៃការបង្កើតទំនាក់ទំនងការទូតរវាងប្រទេសទាំងពីរ លោកឯកអគ្គរដ្ឋទូតបានប្តេជ្ញាចិត្តក្នុងការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរបន្ថែមទៀត។

លោកឯកអគ្គរដ្ឋទូត បានកោតសរសើរចំពោះការរីកចម្រើនយ៉ាងឆាប់រហ័ស និងសមិទ្ធផលជាច្រើនរបស់កម្ពុជា រួមទាំងការរក្សាបាននូវសុខសន្ដិភាព និងស្ថិរភាព ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

ជាកិច្ចឆ្លើយតប ក្នុងជំនួប នាព្រឹកថ្ងៃទី២០ ខែសីហា ឆ្នាំ២០២៤ នៅវិមានសន្តិភាព សម្ដេចធិបតី ហ៊ុន ម៉ាណែត បានអរគុណ និងវាយតម្លៃខ្ពស់ចំពោះតួនាទីរបស់លោកឯកអគ្គរដ្ឋទូត ក្នុងការរក្សាទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ព្រមទាំងបានលើកទឹកចិត្ត លោកឯកអគ្គរដ្ឋទូតឱ្យបន្តធ្វើការងារជាមួយនឹងក្រសួងស្ថាប័នពាក់ព័ន្ធរបស់កម្ពុជា ជាពិសេសក្រសួងការបរទេស និងសហប្រតិបត្តិការអន្តរជាតិ សំដៅជំរុញពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ កម្ពុជា និងកូរ៉េខាងជើង៕