បារី និងស្រាបៀរ ជាច្រើនប្រភេទត្រូវភាគីថៃចាប់បាន ខណៈឈ្មួញលួចនាំចេញពីកម្ពុជាតាមច្រករបៀងដោយខុសច្បាប់

ទំនិញគេចពន្ធជាច្រើនប្រភេទ ពិសេសបារី និងស្រា ត្រូវបានកម្លាំងយោធាថៃការពារព្រំដែនស្ទាក់ចាប់បាន ខណៈដែលមានជនមិនស្គាល់មុខមួយចំនួនបាននិងកំពុងលីសែងឆ្លងអូរតាមច្រករបៀងចូលដីថៃដោយខុសច្បាប់។

ការចាប់ទំនិញខុសច្បាប់នេះបានធ្វើឡើងកាលពីព្រលប់ថ្ងៃទី២០ ខែសីហា ឆ្នាំ២០២៤ ស្ថិតនៅចំណុចខាងក្រោយផ្សារខៅឌីន ស្ថិតក្នុងឃុំខ្លងហាត ស្រុកខ្លងហាត ខេត្តស្រះកែវ ប្រទេសថៃ ដែលនៅមិនឆ្ងាយពីច្រកអន្តរជាតិភ្នំដី ក្នុងស្រុកសំពៅលូន ខេត្តបាត់ដំបងនោះឡើយ ។

យោងតាមប្រភពច្បាស់ការមួយបានបញ្ជាក់ថា ទំនិញទាំងនេះអាចចេញតាមច្រករបៀងជំនោរជាយដែន ស្ថិតនៅក្នុងភូមិត្រពាំងប្រលឹត ឃុំសន្តិភាព ស្រុកសំពៅលូន ខេត្តបាត់ដំបង ដោយសារតែកន្លងមកគេឧស្សាហ៍សង្កេតឃើញមានថៅកែធំៗបានជួលឲ្យកម្មករ លីសែងទំនិញឆ្លងអូរចូលទៅក្នុងទឹកដីថៃ ព្រមទាំងមានរថយន្តថៃរង់ចាំទទួលនៅត្រើយម្ខាងផងដែរ។

យោងតាមការផ្សាយរបស់គេហទំព័រក្នុងស្រុកមួយចំនួនបានបញ្ជាក់ថា នៅពេលដែលកម្លាំងយោធាការពារព្រំដែនថៃ បង្ហាញខ្លួនដើម្បីបង្ក្រាបទំនិញកិច្ចពន្ធទាំងនោះក៏ស្រាប់តែក្រុមកម្មករដែលកំពុងរីសែង បានទម្លាក់ឥវ៉ាន់ចោលហើយនាំគ្នារត់ត្រឡប់ក្រោយឆ្លងដែនចូលទៅក្នុងប្រទេសកម្ពុជាអស់តែម្ដង។

ក្រោយការត្រួតពិនិត្យទំនិញដែលរឹបអូសបាន គឺមានបារីចំនួន ៣២.០០០ កញ្ចប់ ស្រាបៀរ និងស្រាដបមានចំនួន ១.៩៤៤ ប្រភេទដែលទំនិញទាំងនេះក្រោយពីដកហូតបានកម្លាំងយកគេថៃ បានប្រគល់ទៅឲ្យតម្រួតស្រុកក្លងហាត និង បញ្ជូនបន្តទៅអង្គភាពគយប្រចាំខេត្តស្រះកែវដើម្បីរក្សាទុក និងស្រាវជ្រាវរកប្រភពដែលនៅពីក្រោយ និងអនុវត្តនីតិវិធីតាមផ្លូវច្បាប់៕ 

អត្ថបទ៖ សោ និយមរ័ត្ន