ព័ត៌មានអន្ដរជាតិ

រុស្ស៊ីឲ្យពពែជាង៤០០ក្បាលទៅលោក គីម ជុងអ៊ុន ដើម្បីដោះស្រាយវិបត្តិនៅកូរ៉េខាងជើង

បានផុស

៤ ខែ មុន

នៅ

ថ្ងៃពុធ ២១ សីហា ២០២៤

ដោយ

Chheang

រដ្ឋាភិបាលរុស្ស៊ី បានប្រកាសថា ខ្លួនបានបញ្ជូនសត្វពពែចំនួន ៤៤៧ក្បាលទៅកាន់ទីក្រុង Rason នៃប្រទេសកូរ៉េខាងជើង កាលពីសប្ដាហ៍មុន ដែលនេះគឺជាកាដូជូនលោក គីម ជុងអ៊ុន ក្រោយជំនួបពិភាក្សាអំពីកិច្ចសហប្រតិបត្តិការរវាងមេដឹកនាំនៃប្រទេសសម្ព័ន្ធមិត្តទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពពែទាំងនោះ មានប្រភពចេញពីតំបន់ Leningrad នៃប្រទេសរុស្ស៊ី ហើយពួកវានឹងជួយបង្កើតជាផលិតផលទឹកដោះគោសម្រាប់កុមារកូរ៉េខាងជើង ដើម្បីសម្រាលវិបត្តិខ្វះខាតស្បៀងអាហារ ក្រោយពីប្រទេសនេះបានជួបប្រទះស្ថានភាពអាក្រក់ខ្លាំងក្នុងអំឡុងពេលជំងឺរាតត្បាតកូវីដ១៩។

យោងតាមអង្គការឃ្លាំមើលសិទិ្ធមនុស្ស ប្រជាជនចំនួន១០,៧លាននាក់ក្នុងចំណោមប្រជាជនសរុប ២៥,៩លាននាក់នៅក្នុងប្រទេសកូរ៉េខាងជើង មានកង្វះខាតអាហារូបត្ថម្ភ ហើយ១៨%នៃកុមារបានចុះខ្សោយការលូតលាស់ និងការអភិវឌ្ឍ ដោយសារកង្វះអាហារូបត្ថម្ភរ៉ាំរ៉ៃ។

រុស្ស៊ីបានបង្ហាញការខ្វល់ខ្វាយជាមួយកូរ៉េខាងជើងជាខ្លាំង ចាប់តាំងពីការលុកលុយយ៉ាងពេញទំហឹងលើអ៊ុយក្រែនក្នុងខែកុម្ភៈឆ្នាំ២០២២។ កូរ៉េខាងជើង បានប្រកាសគាំទ្រដោយបើកចំហចំពោះការវាយប្រហារនេះ ហើយត្រូវអន្តរជាតិចោទប្រកាន់ពីការលួចផ្គត់ផ្គង់អាវុធជួយដល់កងកម្លាំងរុស្ស៊ីនៅលើសមរភូមិ តែសម្ព័ន្ធមិត្តទាំងពីរបានបដិសេធទទួលស្គាល់ការចោទប្រកាន់ទាំងនោះទេ។

កាលពីខែមិថុនា រុស្ស៊ី និងកូរ៉េខាងជើង បានចុះកិច្ចព្រមព្រៀងមួយ ដែលស្ដីពីការជួយគ្នាទៅវិញទៅមកក្នុងព្រឹត្តិការណ៍សង្គ្រាមជាមួយប្រទេសណាមួយ៕

ដោយ៖ ឈាង