ជនពិការម្នាក់ដាក់ផែនការបង្កើតសិប្បកម្មផលិតសាប៊ូលាងចានដោយខ្លួនឯង

ជាមួយនឹងបទពិសោធ និងជំនាញនៃការកែច្នៃនិងលក់សាប៊ូលាងចានជាង២ទសវត្ស លោក នួន សុខឃឿន អាយុ៤៥ឆ្នាំ ដែលជាជនពិការម្នាក់ បានបង្ហាញនូវឆន្ទៈ និងការតាំងចិត្តខ្ពស់ដើម្បីបង្កើតសិប្បកម្មផលិតសាប៊ូលាងចានដោយខ្លួនដើម្បីចាប់យកមុខរបរនេះក្នុងការទំនុកបម្រុងគ្រួសាររបស់ខ្លួន។

ថ្លែងមកកាន់កម្ពុជាថ្មីនៅព្រឹកថ្ងៃពុធនេះ លោក នួន សុខឃឿន ដែលជាជនពិការលក់សាប៊ូលាងចានតាមរទេះថា ​លោកបានចេះជំនាញផលិតសាប៊ូលាងចាននេះ តាមរយៈយូធូប និងបានសិក្សាបន្ថែម ជាមួយមិត្តភក្ដិដែលចេះជំនាញផលិតសាប៊ូនេះ តាំងពីឆ្នាំ២០០៤ មកម្ល៉េះ។

ជាមេគ្រួសារ និងមានភារកិច្ចរកស៊ីចិញ្ចឹមគ្រួសារ លោក នួន សុខឃឿន មានភរិយា និងកូនប្រុសស្រីចំនួន៣នាក់ ដែលស្ថិតក្នុងបន្ទុក ដោយត្រូវរកប្រាក់សម្រាប់ផ្គត់ផ្គង់ការសិក្សារៀនសូត្ររបស់កូនៗ ផងនោះ ទើ​បលោក មានក្ដីស្រមៃមួយដោយចង់បង្កើតសិប្បកម្មផលិតសាប៊ូលាងចានមួយ នាថ្ងៃខាងមុខ​ បន្ទាប់ពីលោកដោះស្រាយបំណុលដែលជំពាក់គេបន្តិចបន្ដួច រួចទៅ។

សម្រាប់តម្លៃវិញ លោក នួន សុខឃឿន បានបញ្ជាក់ថា សាប៊ូលាងចានដែលលោកបានផលិតលក់ដោយខ្លួនឯងនេះ អាចលក់ចេញបានក្នុងចំណុះ ៣០លីត្រ តម្លៃ ៣ម៉ឺនរៀល មិនថាលក់នៅផ្ទះ ឬក៏តាមផ្លូវសាធារណៈ ​​នោះឡើយ។

លោក នួន សុខឃឿន បានប្រាប់ឱ្យដឹងទៀតថា ទាក់ទងនឹងសាប៊ូដែលគាត់ផលិត​បាននាពេលបច្ចុប្បន្ន គាត់បានដឹកលក់តាមផ្សារ និងតាមផ្លូវសាធារណៈ ដើម្បីរកប្រាក់ចំណូលជួយផ្គត់ផ្គង់គ្រួសារទាំងមូល។

លោក បន្ថែមថា សាប៊ូរបស់លោក បន្ទាប់ពីមានការជួយផ្សព្វផ្សាយមួយរយៈចុងក្រោយនេះ ការផលិតសាប៊ូលាងចាន របស់លោកកំពុងតែមានសាធាណរណៈជន ក្រុមហ៊ុន មួយចំនួនបានជួយទិញយ៉ាងច្រើនគួរសម ទើបនាំឱ្យលោកមានកំលាំងចិត្តជាមួយមុខរបរមួយនេះ បន្តទៅមុខទៀត៕

អត្ថបទ ៖ សួស សិត