ព័ត៌មានអន្ដរជាតិ

នាវាផ្ទុកយន្តហោះចម្បាំងអាមេរិក ធ្វើដំណើរទៅដល់មជ្ឈិមបូព៌ាហើយ

បានផុស

១ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

Chheang

យោធាអាមេរិក បាននិយាយកាលពីថ្ងៃពុធថា នាវាផ្ទុកយន្តហោះ USS Abraham Lincoln និងនាវាពិឃាដអមដំណើរ បានទៅដល់តំបន់មជ្ឈិមបូព៌ាហើយ បន្ទាប់ពីរដ្ឋមន្ត្រីការពារជាតិ លោក Lloyd Austin បានបញ្ជាឲ្យក្រុមវាយប្រហារបង្កើនល្បឿនរបស់ខ្លួន។

នាវាផ្ទុកយន្តហោះ USS Abraham Lincoln (រូបភាព៖ វិបសាយរដ្ឋាភិបាលអាមេរិក)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើរាប់ទាំងនាវា Abraham Lincoln ដែលទើបទៅដល់នេះ នៅតំបន់មជ្ឈិមបូព៌ាកំពុងមានវត្តមាននាវាផ្ទុកយន្តហោះចម្បាំងរបស់សហរដ្ឋអាមេរិកចំនួន២គ្រឿង ដោយនាវា USS Theodore Reoosevelt ដែលកំពុងឈរជើងនៅទីនោះស្រាប់មិនទាន់ធ្វើដំណើរចាកចេញពីមជ្ឈិមបូព៌ានៅឡើយទេ ខណៈពេលមានការភ័យខ្លាចកាន់តែខ្លាំងឡើងនៃជម្លោះក្នុងតំបន់បន្ទាប់ពីការធ្វើឃាតមេដឹកនាំកំពូលក្រុមហាម៉ាសគឺលោក Ismail Haniyey ដែលអ៊ីរ៉ង់បានចោទប្រកាន់អ៊ីស្រាអែលថាជាអ្នកនៅពីក្រោយការវាយប្រហារ។

មេបញ្ជាការយោធាអាមេរិកទទួលបន្ទុកនៅតំបន់មជ្ឈិមបូព៌ា បាននិយាយនៅលើប្រព័ន្ធផ្សព្វផ្សាយសង្គមថា៖ «នាវា USS Abraham Lincoln (CVN 72) ដែលផ្ទុកយន្តហោះចម្បាំង F-35C និងយន្តហោះចម្បាំង F/A-18 Block III បានចូលដល់ទីបញ្ជាការកណ្តាល (USCENTCOM) ដែលសហរដ្ឋអាមេរិកគ្រប់គ្រងហើយ។ នាវា USS Abraham Lincoln (CVN 72) ដែលជាប្រភេទនាវាចម្បាំងកំពូលក្នុងក្រុមវាយប្រហារ Carrier Strike Group 3 ត្រូវបានអមដោយនាវាពិឃាដ Destroyer Squadron (DESRON) 21 និងនាវាផ្ទុកយន្តហោះចម្បាំង Carrier Air Wing (CVW) 9»។

នាវា Lincoln បានធ្វើដំណើរទៅកាន់មជ្ឈិមបូព៌ាកាលពីដើមខែសីហា ហើយគម្រោងដើមឡើយត្រូវទៅដល់នៅចុងខែ។ ប៉ុន្តែដោយសារតែការតឿនរបស់រដ្ឋមន្ត្រីការពារជាតិ លោក Lloyd Austin ឲ្យពន្លឿនដំណើរ កាលពីថ្ងៃទី១១ខែសីហា ទើបនាវានេះបានមកដល់មុនកាលកំណត់។

ភាពតានតឹងនៅមជ្ឈិមបូព៌ាកំពុងកើនឡើងគួរឲ្យកត់សម្គាល់ ចាប់តាំងពីក្រុមសកម្មប្រយុទ្ធហេសបូឡា និងអ៊ីរ៉ង់បានប្តេជ្ញាសងសឹកចំពោះការសម្លាប់មេដឹកនាំកំពូលៗរបស់ខ្លួនកាលពីចុងខែកក្កដា។ ការវាយប្រហាររបស់អ៊ីស្រាអែលទៅលើតំបន់ជាយក្រុងភាគខាងត្បូងនៃទីក្រុង Beirut បានសម្លាប់មេបញ្ជាការកំពូលរបស់ក្រុមហេសបូឡា លោក Fuad Shukr ហើយមិនបានប៉ុន្មានម៉ោងផងក៏មានការវាយប្រហារមួយផ្សេងទៀតនៅទីក្រុងតេហេរ៉ង់ ដែលបានសម្លាប់មេដឹកនាំនយោបាយរបស់ក្រុមហាម៉ាស លោក Ismail Haniyeh៕

ដោយ៖ ឈាង