ព័ត៌មានជាតិ

រកឃើញអ្នកពាក់ព័ន្ធជាង១៥០នាក់ជាមួយជនជាតិចិន២នាក់ ឆ្លងកូវីដ១៩នៅខេត្តកោះកុង

បានផុស

៤ years មុន

នៅ

ថ្ងៃសុក្រ ៥ មីនា ២០២១

ដោយ

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុងបានឲ្យដឹងនៅយប់ ថ្ងៃទី៥ ខែមីនានេះថា រហូតមកដល់ល្ងាច ថ្ងៃទី០៥ ខែមីនា ឆ្នាំ២០២១នេះ ក្រុមការងាឆ្លើយតបបន្ទាន់មន្ទីរសុខាភិបាលខេត្ត បានចុះស្រាវជ្រាវរកអ្នកជាប់ពាក់ព័ន្ធនឹងជនជាតិចិន២នាក់ ចំនួន១៥៣នាក់បានយកសំណាកនិងឲ្យធ្វើចត្តាឡីស័ក នៅអគារស្នាក់នៅរបស់ពួកគេតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក៏ដោយលោកបានបន្ថែមថា «យើងកំពុងធ្វើការស្រាវជ្រាវពីប្រភពចម្លងថា តើជនជាតិចិនពីរនាក់ហ្នឹងឆ្លងមកពីណាព្រោះថា ឥឡូវនេះនៅមិនទាន់ឃើញមានប្រភពនៅទីនេះទេ»។

លោកបានបន្តថា អាជ្ញាធរបានផ្អាកការធ្វើដំណើរចេញចូលតំបន់ក្រុមហ៊ុនញូញៀនមួយរយៈសិន មិនថាតែផ្លូវគោក ឬផ្លូវទឹកឡើយ។

លោក ទូសាវុធ អភិបាលរងខេត្តកោះកុងបានឲ្យដឹងនៅយប់ថ្ងៃទី០៥មីនានេះដែរថា អាជ្ញាធរបានស្នើសុំឲ្យក្រុមហ៊ុនផ្អាកការចេញចូលមួយរយៈសិនដោយអ្នកខាងក្រៅហាមចូលក្នុងក្រុមហ៊ុនហើយអ្នកនៅខាងក្នុងក្រុមហ៊ុនមិនត្រូវអនុញ្ញាតឲ្យចេញមកខាងក្រៅឡើយ ដើម្បីទុកលទ្ធភាពឲ្យក្រុមការងារធ្វើការស្រាវជ្រាវបន្ថែមរកអ្នកជាប់ពាក់ព័ន្ធជាមួយជនជាតិចិន២នាក់ ដែលមានតេស្តវិជ្ជមានកូវីដ១៩។

លោកអភិបាលរងខេត្តបានបន្តថា រដ្ឋបាលខេត្តកំពុងពង្រីកបន្ទប់នៅក្នុងមណ្ឌលចត្តាឡីស័កបន្ថែមទៀត ដើម្បីត្រៀមបម្រុងមានការកើនឡើងនៃអ្នកជាប់ពាក់ព័ន្ធនឹងព្រឹត្តិការណ៍សហគមន៍២០កុម្ភៈខណៈបច្ចុប្បន្នមណ្ឌលចត្តាឡីស័កចំនួន២ទីតាំង ដែលទី១នៅសាលាខេត្តចាស់និងទី២នៅមណ្ឌលកុមារកំព្រាដោយទីតាំងទាំងពីរនេះអាចដាក់មនុស្សបានជាង១០០គ្រែប៉ុណ្ណោះ។

លោកបានបញ្ជាក់ថា ទីតាំងទាំងពីរនេះបានដាក់បងប្អូនពលករខ្មែរមកពីថៃជិតពេញអស់ហើយដោយក្នុង១ថ្ងៃៗមានពលករចូលពី៥ទៅ១០នាក់ដែលទាមទារឲ្យយើងត្រូវពង្រីកបន្ថែមទៀត។

លោកវេជ្ជបណ្ឌិត ទៅ ម៉ឺង បានបន្ថែមទៀតថា ចំពោះជនជាតិចិន២នាក់ដែលមានវិជ្ជមានជំងឺកូវីដ១៩ ត្រូវមន្ត្រីសុខាភិបាល បានយកពួកគាត់មកសម្រាកព្យាបាល ក្នុងមន្ទីរពេទ្យបង្អែកខេត្តរួចរាល់ដោយមានការយាមកាមត្រឹមត្រូវតឹងរ៉ឹងមិនមានការធ្វេសប្រហែសឡើយ៕

ដោយ ៖ សំអឿន