កីឡាប៉ារ៉ាឡាំពិក២០២៤ ចាប់ផ្តើម​ថ្ងៃពុធ​នេះ កងកម្លាំង​២៥​ពាន់​នាក់​ដាក់ការពារ

រដ្ឋាភិបាលបារាំងបានប្រកាសនៅថ្ងៃអង្គារ ទី២០ ខែសីហា ពី​ការ​ដាក់ពង្រាយកម្លាំង​សមត្ថកិច្ច​ប្រមាណ​ ២៥,០០០នាក់ សម្រាប់​ការពារ​ព្រឹត្តិការណ៍កីឡាប៉ារ៉ាឡាំពិកនៅទីក្រុងប៉ារីស រយៈ​ពេល​២​សប្តាហ៍​ ចាប់​ពី​ថ្ងៃទី២៨ ខែសីហា ដល់​ថ្ងៃទី៨ ខែកញ្ញា ឆ្នាំ​២០២៤។

ដំណឹង​នេះត្រូវបានប្រកាសដោយរដ្ឋមន្ត្រីក្រសួង​មហាផ្ទៃស្តីទី លោក Gérald Darmanin នៅក្នុងសន្និសីទសារព័ត៌មាននៅទីក្រុងប៉ារីស ជាកន្លែង​លោកបានបន្ថែមថា អង្គភាពជាន់ខ្ពស់ និងក្រុមប្រឆាំងភេរវកម្ម​នៅក្នុងកងកម្លាំងសន្តិសុខក៏នឹងមានការប្រុងប្រយ័ត្នផងដែរ ដើម្បីឆ្លើយតប​នឹងភាពអាសន្នដែលអាចកើតមាន។ លើសពីនេះទៀត ការគាំទ្រនឹងត្រូវបានផ្តល់ដោយបុគ្គលិកបរទេសមកពីប្រទេសដូចជា ឈីលី ហ្វាំងឡង់ កាតា និងអេស្ប៉ាញ។

សម្រាប់ករណីជាក់លាក់នៃពិធីបើក​នឹងប្រព្រឹត្តទៅនៅថ្ងៃពុធ ទី​២៨ ខែសីហា សប្តាហ៍នេះ​នៅ​ Champs-Élysées លោក Darmanin បានរាយការណ៍ថា ប្រតិបត្តិការសន្តិសុខដ៏សំខាន់ដែលពាក់ព័ន្ធនឹង​មាន​ភ្នាក់ងារប្រហែល ១៥,០០០នាក់។ នេះបើយោងតាមសេចក្តីថ្លែងការណ៍​ចេញ​ផ្សាយ​ដោយសារព័ត៌មានបារាំង BFMTV។

ករណី​ក្នុងព្រឹត្តិការណ៍កីឡាបារ៉ា​ឡាំពិក គណៈប្រតិភូមកពីប្រទេសដែលអាចប្រឈមនឹងការគំរាមកំហែងផ្នែកសន្តិសុខខ្ពស់ ដូចជាអ៉ីស្រាអែល ដែលនឹងមានអត្តពលិក ២៧នាក់ អាជ្ញាកណ្តាល ២នាក់ និងប្រធានគណៈកម្មាធិការប៉ារ៉ាឡាំពិក នឹងត្រូវបានផ្តល់ការការពារពេញម៉ោង។ ការឃ្លាំមើលនេះនឹងកើតឡើងមិនត្រឹមតែក្នុងអំឡុងពេលចលនារបស់ពួកគេប៉ុណ្ណោះទេ ប៉ុន្តែនៅក្នុងភូមិប៉ារ៉ាឡាំពិកខ្លួនឯងផងដែរ។

ទីក្រុងប៉ារីសធ្វើជាម្ចាស់ផ្ទះកីឡាអូឡាំពិកចាប់ពីថ្ងៃទី២៦ ខែកក្កដា ដល់ថ្ងៃទី១១ ខែសីហា ដោយ​ជោគជ័យ​ ដែល​ពិធីបើកនៅតាមបណ្តោយទន្លេសែន រដ្ឋាភិបាលបារាំងបានដាក់ពង្រាយប៉ូលីសប្រហែល ៤៥,០០០នាក់។ សម្រាប់ពិធីបិទនេះ មានបុគ្គលិកប្រមាណ ២,០០០នាក់បានចូលរួម។ សរុបមក មន្ត្រីប៉ូលិស និងអាវុធហត្ថប្រហែល ៣០,០០០នាក់ត្រូវទទួលខុសត្រូវក្នុងការធានាសន្តិសុខជារៀងរាល់ថ្ងៃក្នុងអំឡុងពេលកីឡាអូឡាំពិក ជាមួយនឹងប្រតិបត្តិការជាក់លាក់សម្រាប់ព្រឹត្តិការណ៍ដូចជាការរត់ម៉ារ៉ាតុងដែលបានឆ្លងកាត់កណ្តាលទីក្រុងរវាងទីក្រុងប៉ារីស និង Versailles ។

ពិធីបើកកីឡាប៉ារ៉ាឡាំពិក នឹងប្រព្រឹត្តិទៅនៅទីកន្លែងប្រវត្តិសាស្ត្រ​ Place de la Concorde។ លោក Darmanin ពន្យល់ថា ៖«នឹងមានអ្នកទស្សនា ៣៥,០០០នាក់ អត្តពលិក ៥,០០០នាក់ និងគណៈប្រតិភូចំនួន ១៧០នាក់ ជាមួយនឹងកៅអីចំនួន ១៥,០០០កៅអី បើកជាសាធារណៈនៅជិតទីតាំងប្រវត្តិសាស្ត្រ Champs-Elysées»។

ដោយសារវាជាពិធីនៅខាងក្រៅ ប្រតិបត្តិការសន្តិសុខដ៏សំខាន់មួយនឹងត្រូវដាក់ពង្រាយនៅថ្ងៃនោះ ហើយចលនាឆ្លងកាត់រដ្ឋធានីនឹងត្រូវដាក់កម្រិត៕

ប្រែសម្រួល៖ មន្នីរ័ត្ន
ប្រភព៖ Inside The Games