នាយករដ្ឋមន្ត្រី ចាត់ទុកការបរិច្ចាគចូល«មូលនិធិកសាងហេដ្ឋារចនាសម្ព័ន្ធតាមព្រំដែន» ជាមហាសាមគ្គីជាតិខ្មែរ ដើម្បីការពារ និងអភិវឌ្ឍកម្ពុជា

នាល្ងាចថ្ងៃទី២៧ ខែសីហា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញមកអរគុណព្រះគុណ និងអរគុណ ជូនចំពោះព្រះសង្ឃគ្រប់ព្រះអង្គ មន្ត្រីរាជការ កងកម្លាំងប្រដាប់អាវុធគ្រប់ប្រភេទ និងពលរដ្ឋខ្មែរទាំងក្នុង​ និងក្រៅប្រទេស​ ដែលបរិច្ចាគថវិកាចូលក្នុង«មូលនិធិកសាងហេដ្ឋារចនាសម្ព័ន្ធតាមព្រំដែន» ដោយផ្ដោតលើការកសាងផ្លូវក្រវាត់ព្រំដែន និងបានចាត់កាយវិការនេះថាជាមហាសាមគ្គីជាតិខ្មែរ ដើម្បីការពារ និងអភិវឌ្ឍមាតុភូមិកម្ពុជា។

តាមរយៈបណ្ដាញសង្គម នាយករដ្ឋមន្ត្រី​ សរសេរយ៉ាងដូច្នេះ៖“ក្នុងនាមរាជរដ្ឋាភិបាល និងក្នុងនាមខ្លួនខ្ញុំព្រះករុណាខ្ញុំផ្ទាល់ ខ្ញុំព្រះករុណាខ្ញុំសូមថ្លែងអំណរព្រះគុណ និងអរគុណដល់ព្រះតេជព្រះគុណព្រះសង្ឃគ្រប់ព្រះអង្គ មន្ត្រីរាជការ កងកម្លាំងប្រដាប់អាវុធគ្រប់ប្រភេទ និងជនរួមជាតិគ្រប់មជ្ឈដ្ឋានទាំងក្នុង​ និងក្រៅប្រទេស​ ដែលបានចូលរួមចំណែកយ៉ាងផុលផុសបរិច្ចាគថវិកាក្នុង «មូលនិធិកសាងហេដ្ឋារចនាសម្ព័ន្ធតាមព្រំដែន» ដោយផ្ដោតលើការកសាងផ្លូវក្រវាត់ព្រំដែន ក្នុងរយៈពេលពីរថ្ងៃកន្លងមកនេះ​” ។

សម្រាប់សម្ដេចធិបតី ហ៊ុន ម៉ាណែត ដែលជាអ្នកផ្ដួចផ្ដើមបង្កើតមូលនិធិ ការចូលរួមចំណែកដ៏ឧត្តុង្គឧត្តមថ្លៃថ្លានេះ ពិតជាបានសបញ្ជាក់យ៉ាងច្បាស់អំពីធ្លុងមហាសាមគ្គី និងស្មារតីជាតិខ្មែរតែមួយប្រកបដោយមនសិកា​រស្នេហាជាតិ​ ក្នុងបុព្វហេតុការពារ និងអភិវឌ្ឍ​មាតុភូមិកម្ពុជា។

ជាការកត់សម្គាល់ បន្ទាប់ពីនាយករដ្ឋមន្ត្រីកម្ពុជា បានប្រកាសពីគណនីមូលនិធិរួចមក មានព្រះសង្ឃ មន្ត្រីរាជការ កងកម្លាំងប្រដាប់អាវុធគ្រប់ប្រភេទអ្នកមានធនធានដូចជា ឧកញ៉ា អ្នកឧកញ៉ា លោកអ្នកឧកញ៉ា និងពលរដ្ឋខ្មែរទាំងក្នុង​ និងក្រៅប្រទេស​ បានចំណាយថវិកាផ្ទាល់ខ្លួន បរិច្ចាគចូលនិធិ ក្នុងបុព្វហេតុ កសាងផ្លូវក្រវាត់ព្រំដែន។

ទោះជារយៈពេល២ថ្ងៃមកនេះ ការបរិច្ចាគមានភាពផុសផុលយ៉ាងណាក៏ដោយ ក៏នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ក៏នៅតែបន្ដលើកទឹកចិត្តឱ្យពលរដ្ឋគ្រប់រូប បន្តបរិច្ចាគថវិកាបន្តទៀត។

សម្ដេចប្រមុខរាជរដ្ឋាភិបាល បញ្ចប់សំណេរលើបណ្ដាញសង្គម យ៉ាងដូច្នេះ៖ “ទន្ទឹមគ្នានេះ ខ្ញុំព្រះករុណាខ្ញុំសូមលើកទឹកចិត្តដល់ជនរួមជាតិគ្រប់មជ្ឈដ្ឋានទាំងក្នុង និងក្រៅប្រទេស បន្តចូលរួមឱ្យកាន់តែសកម្មផុលផុសបន្ថែមទៀត ហើយក្រុមការងារមូលនិធិបាន និងកំពុងបន្តទទួលការបរិច្ចាគដោយក្តីរីករាយ” ៕

ដោយ ៖ ង៉ិល ណារ៉ាត់