ក្រុមហ៊ុនវៀតណាមត្រៀមដើម្បីរក្សា​ទីផ្សារនៅអឺរ៉ុប មុនពេលច្បាប់ប្រឆាំងការកាប់បំផ្លាញព្រៃឈើចូលជាធរមាន

សហគ្រាសវៀតណាមមួយចំនួន បានប្រញាប់ប្រញាល់រៀបចំផែនការតំបន់ដាំដុះរបស់ខ្លួន ​ដើម្បីគោរពតាមតម្រូវការនៃបទប្បញ្ញត្តិស្តីពីការកាប់បំផ្លាញព្រៃឈើរបស់សហភាពអឺរ៉ុប (EUDR) ​ក្នុង​គោលបំណង​រក្សា​ឱ្យ​បាន​នូវ​ទីផ្សារ​នាំ​ចូល​ដ៏តឹងរឹងរបស់សហភាពអឺរ៉ុប ខណៈឧស្សាហកម្មឈើ កាហ្វេ និងកៅស៊ូវៀតណាម​ រំពឹងថានឹងរង​ផល​ប៉ះ​ពាល់​ខ្លាំង ​ជាង​គេ​។ នេះ​បើ​តាម​ការចុះ​ផ្សាយ​របស់កាសែត​ Viet Nam News។

​ក្រុមហ៊ុន​ពាណិជ្ជកម្ម សេវាកម្ម និងទេសចរណ៍ Kim Thông បាននិយាយថា ខ្លួនបានជ្រើសរើសដំណាំ​វត្ថុធាតុដើមដែលដាំដុះលើដីកសិកម្មទាំងស្រុង ​មិន​មែន​ជា​ដីព្រៃ​ ដើម្បីអនុវត្តតាមបទប្បញ្ញត្តិ​ EUDR ខណៈ​ក្រុមហ៊ុន​មានគោលបំណងនាំចេញសណ្តែកដីភ្នំ សណ្ដែកផ្កាយ​ ​និង​ផលិតផ្សេង​ៗ​ទៀត​ទៅកាន់ប្រទេស​ជា​ទីផ្សារនៅ​អឺរ៉ុបមួយចំនួន រួមទាំងអាល្លឺម៉ង់ ជាដើម​។

ជុំ​វិញ​បញ្ហា​នេះ​ ក្រុមហ៊ុនភាគ GGTD Joint Stock Company បាននិយាយថា​​ ក្រោម​បទប្បញ្ញត្តិ​ EUDR ​ការរៀបចំផែនការរយៈ​ពេល​វែង​សម្រេាប់​តំបន់ដាំ​ដុះវត្ថុធាតុដើម ​គឺ​ជាបញ្ហាដែលសហគ្រាសក្នុងស្រុកគួរតែយកចិត្តទុកដាក់ ហើយ​ក្រុម​ហ៊ុន​ខ្លួន​ឯង​ផ្ទាល់​កំពុង​ផ្ដោត​លើការ​រៀបចំផែនការ​នៅក្នុងខេត្តខ្ពង់រាប​ភាគ​កណ្ដាល​ និង​តំបន់មួយចំនួននៅភាគខាងជើងប្រទេស​ ​ដើម្បីបំពេញតម្រូវការទីផ្សារសហភាព​អឺរ៉ុប​។

ទោះជាយ៉ាងណាក៏ដោយ សហគ្រាសជាច្រើនមិនបានយល់ច្បាស់អំពីតម្រូវការរបស់ EUDR នោះ​ទេ ​ដោយ​ខ្លះ​បានដាក់ញត្តិទៅទីភ្នាក់ងារគ្រប់គ្រងរដ្ឋឱ្យរៀបចំកម្មវិធីបណ្តុះបណ្តាលបន្ថែមទៀត ដើម្បីជួយពួកគេឱ្យយល់កាន់តែច្បាស់អំពីតម្រូវការជាក់លាក់របស់ EUDR ដោយ​រៀបចំផែនការផលិតកម្ម​ និងខ្សែសង្វាក់ផ្គត់ផ្គង់​ឱ្យ​បាន​សមស្រប​។

មន្រ្តី​ជំនាញ​វៀតណាម​ លើក​ឡើង​​ថា​ ​ដើម្បីដោះស្រាយរាល់បញ្ហាប្រឈមពី EUDR វៀតណាមចាំបាច់ត្រូវមានក្រប​ខ័ណ្ឌ​ផែនការសកម្មភាពដើម្បីសម្របតាម ហើយ​​អាទិភាព​កំពូល​គួរ​​តែ​មាន​សម្រាប់​​ការ​បង្កើត​សម្ព័ន្ធភាព​សាធារណៈ និង​ឯកជន ដើម្បី​ផ្លាស់​ប្តូរ​ព័ត៌មាន និង​ធានា​សុវត្ថិភាព​ទិន្នន័យ និង​ការ​កសាង​ប្រព័ន្ធ​ព្រៃឈើ និង​ផលិតកម្ម​ដែល​ឆ្លើយតប​នឹង EUDR ។ ​

គួរ​គូស​បញ្ជាក់​ថា​ EUDR ដែល​​ចូលជាធរមាន​កាល​ពី​​ខែ​មិថុនា ​ឆ្នាំ​មុន​ ​បាន​កំណត់​ថា​ ​ផលិតផលដែលដាក់​លក់លើ ឬនាំចេញពីទីផ្សារអឺរ៉ុប​ ​ត្រូវតែអាចតាមដានបាន ​មិន​ជាប់​ពាក់​ព័ន្ធ​ការកាប់បំផ្លាញព្រៃឈើ និងផលិតដោយស្របច្បាប់។ ក្រុមហ៊ុនធំៗដែលនាំចូលទំនិញ​ទៅ​សហភាព​ ត្រូវតែគោរពបទប្បញ្ញត្តិ​ចាប់​ពី​ថ្ងៃ​ទី​ ៣០ ខែ​ធ្នូ​ ឆ្នាំ​ ២០២៤ តទៅ​ ខណៈ​សហគ្រាសធុនតូច និងមធ្យម ត្រូវ​អនុវត្ត​ចាប់​ពី​ថ្ងៃ​ទី ៣០​ ខែមិថុនា ឆ្នាំ ២០២៥​។​

បើ​តាម​​ក្រសួងកសិកម្ម និងអភិវឌ្ឍន៍ជនបទវៀតណាម​ ​ឧស្សាហកម្មឈើ កាហ្វេ និងកៅស៊ូរបស់​វៀតណាម​ ​នឹង​រងផលប៉ះពាល់ខ្លាំងជាងគេ​ដោយ​បទប្បញ្ញត្តិ​ EUDR ខណៈសហភាពអឺរ៉ុប គឺជាទីផ្សារដ៏ធំ និងសំខាន់សម្រាប់ផលិតផលកសិកម្មរបស់វៀតណាម និងទំនិញផ្សេងៗទៀត។ ក្នុង​ឆ្នាំ ២០២៣​ វៀតណាម​បាន​នាំ​ចេញ​ផលិតផល​ដែល​មាន​តម្លៃ​ជាង ៥៣ ប៊ី​លាន​ដុល្លារ​ទៅកាន់​​ប្លុក​នេះ​ ​ដោយ​មាន​ទំនិញ​សំខាន់ៗ​រួម​មាន​កាហ្វេ កៅស៊ូ និង​ឈើ។ អ្នកជំនាញពាណិជ្ជកម្ម​ជឿជាក់ថា ចំណូលនៃការនាំចេញរបស់វៀតណាមទៅកាន់អឺរ៉ុប​ អាចកើនឡើងគួរឱ្យកត់សម្គាល់ ប្រសិនបើសហគ្រាសវៀតណាមអាចគោរពតាមបទប្បញ្ញត្តិ​ EUDR៕