ព័ត៌មានអន្ដរជាតិ

ថៃ ពេញចិត្តយន្តហោះចម្បាំងស៊ុយអ៊ែតជាង F-16 របស់អាមេរិក

បានផុស

៤ សប្តាហ៍ មុន

នៅ

ថ្ងៃពុធ ២៨ សីហា ២០២៤

ដោយ

Chheang

កងទ័ពអាកាសថៃ នឹងបញ្ជាទិញយន្តហោះចម្បាំង Gripen ដែលផលិតដោយក្រុមហ៊ុន Saab របស់ប្រទេសស៊ុយអែត ព្រោះយល់ឃើញថាវាល្អជាងការទិញយន្តហោះចម្បាំង F-16 របស់សហរដ្ឋអាមេរិក។

យន្តហោះ JAS 39 Gripen E/F (រូបភាព៖ Meta-Defense)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងទ័ពអាកាសថៃ បានប្រកាសនៅក្នុងសេចក្តីថ្លែងការណ៍កាលពីថ្ងៃទី២៧ខែសីហាថា គណៈកម្មាធិការលទ្ធកម្មរបស់ថៃ បានថ្លឹងថ្លែងជម្រើសរយៈពេល១០ខែរួចមកហើយមុនពេលសម្រេចចិត្តថាទិញយន្តហោះ JAS 39 Gripen E/F ដែលជាជម្រើសសមរម្យបំផុត។ ក្នុងសេចក្ដីថ្លែងការណ៍ដដែលនេះ បានរៀបរាប់ថា៖ «យើងបានពិចារណាការទិញនេះយ៉ាងប្រុងប្រយ័ត្ន ដើម្បីឲ្យយើងអាចប្រើប្រាស់វាបានច្រើនបំផុតនៅក្នុងការការពារប្រទេសរបស់យើងយ៉ាងហោចណាស់ ៣០ឆ្នាំទៅមុខទៀត។ យន្តហោះ Gripen អាចឆ្លើយតបទៅនឹងគោលការណ៍យុទ្ធសាស្ត្ររបស់កងទ័ពអាកាសថៃ និងសហការជាមួយកងកម្លាំងសន្តិសុខផ្សេងទៀត»។

យន្តហោះចម្បាំង Gripen នឹងត្រូវប្រើប្រាស់ជំនួសយន្តហោះ F-16A/B ដែលថៃបានទិញកាលពីចុងទសវត្សរ៍ឆ្នាំ១៩៨០។ យ៉ាងណា គេនៅពុំទាន់មានព័ត៌មានលម្អិតថាតើថៃអាចទិញយន្តហោះ Gripen ចំនួនប៉ុន្មានគ្រឿងនោះទេ ប៉ុន្តែបើតាមរបាយការណ៍នៅក្នុងប្រព័ន្ធផ្សព្វផ្សាយដែលជំនាញខាងវិស័យការពារជាតិថៃកាលពីដើមឆ្នាំ២០២៤ រដ្ឋាភិបាលក្រុងបាងកកកំពុងពិចារណាទិញយន្តហោះចម្បាំងចំនួន១២គ្រឿង។

បច្ចុប្បន្នប្រទេសថៃកំពុងប្រតិបត្តិការយន្តហោះ Gripen ចាស់ចំនួន ១១គ្រឿង និងយន្តហោះ F-16 រាប់សិបគ្រឿង៕

ដោយ៖ ឈាង

Related Topics:ប្រទេសថៃ