ក្រុមប្រឹក្សាសន្តិសុខរបស់ UN បរាជ័យចាត់វិធានការរួមគ្នាលើប្រទេសមីយ៉ាន់ម៉ា

សមាជិកនៃក្រុមប្រឹក្សាសន្តិសុខរបស់ UN បានខកខានក្នុងការធ្វើសកម្មភាពរួមគ្នាដើម្បីឆ្លើយតបនឹងអំពើហិង្សាដ៏សាហាវដោយកងកម្លាំងសន្តិសុខមីយ៉ាន់ម៉ា ។

UN និយាយថា មនុស្សជាង ៥០ នាក់ត្រូវបានសម្លាប់ ខណៈដែលប្រជាជនធ្វើបាតុកម្មធ្វើរដ្ឋប្រហារកាលពីខែមុន ដោយសារតែកងកម្លាំងសន្តិសុខបានបាញ់ម្តងហើយម្តងទៀតទៅលើហ្វូងមនុស្ស ។

ក្រុមប្រឹក្សាសន្តិសុខបានពិភាក្សាពីការឆ្លើយតបរបស់ខ្លួននៅក្នុងកិច្ចប្រជុំបិទទ្វារជាលើកទី ២ តាមរយៈ Video Conference កាលពីថ្ងៃសុក្រ ។

អ្នកនាំពាក្យរបស់ UN ក្រោយមកបានប្រាប់ក្រុមអ្នកយកព័ត៌មានថា បេសកជនពិសេសរបស់អគ្គលេខាធិការ UN ប្រចាំប្រទេសមីយ៉ាន់ម៉ាលោកស្រី Christine Schraner Burgener បានទទូចដល់សមាជិកក្រុមប្រឹក្សាជំរុញឲ្យបញ្ឈប់អំពើហិង្សានេះ ។ លោកស្រីបាននិយាយថា ការរួបរួមរបស់ក្រុមប្រឹក្សាគឺត្រូវការជាចាំបាច់ជាងពេលណាៗទាំងអស់លើប្រទេសមីយ៉ាន់ម៉ា ។

ចំណែកឯកអគ្គរដ្ឋទូតអង់គ្លេសប្រចាំនៅ UN លោកស្រី Barbara Woodward បានប្រាប់សន្និសីទសារព័ត៌មានតាម Video Conference ថា វាមានសារៈសំខាន់ណាស់សម្រាប់ក្រុមប្រឹក្សាក្នុងការនិយាយដោយសម្លេងតែមួយ ។

រហូតមកដល់ពេលនេះមហាអំណាចធំៗដូចជា អង់គ្លេស និងសហរដ្ឋអាមេរិកបានដាក់ទណ្ឌកម្មជាឯកតោភាគីលើប្រទេសមីយ៉ាន់ម៉ា ។ គេនៅមិនទាន់ដឹងច្បាស់ទេថាតើសហគមន៍អន្តរជាតិនឹងអាចធ្វើសកម្មភាពរួមគ្នាបានយ៉ាងណាទៀតនោះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ប៉ូលិសកាន់តែច្រើនឡើងៗ ចាប់ផ្តើមក្បត់មេទ័ពមកចូលរួមជាមួយបាតុករមីយ៉ាន់ម៉ា

ចុចអាន ៖ សហរដ្ឋអាមេរិករឹតត្បិតការនាំចេញទំនិញទៅយោធាមីយ៉ាន់ម៉ា