ចៅប្រុសទី៤ របស់សម្ដេចតេជោ ហ៊ុន សែន ចូលសិក្សាជំនាញយោធា នៅអង់គ្លេស

ចៅប្រុសទី៤ របស់សម្ដេចតេជោ ហ៊ុន សែន ឈ្មោះ ហ៊ុន ច័ន្ទបញ្ញាបុត្រ បានចាប់ផ្ដើមចូលសិក្សាជំនាញយោធា នៅចក្រភពអង់គ្លេស។

តាមរយៈសំណេរនៅលើបណ្ដាញសង្គមហ្វេសប៊ុក នៅថ្ងៃទី៣១ ខែសីហា ឆ្នាំ២០២៤ សម្ដេចតេជោ ហ៊ុន សែន ប្រធានព្រឹទ្ធសភា បានរៀបរាប់ឱ្យដឹងថា «ចៅទី៤ ហ៊ុន ច័ន្ទបញ្ញាបុត្រ ចាប់ផ្តើមជាមួយការសិក្សានៅសាលាកងទ័ពនៃចក្រភពអង់គ្លេស»។ សម្ដេចតេជោ បានឱ្យដឹងដែរថា គិតត្រឹមឆ្នាំ២០២៤នេះ មានចៅចំនួន៤រូបហើយ ដែលកំពុងរៀន និងចាប់ផ្តើមរៀននៅកម្រិតឧត្តមសិក្សា និងក្រោយឧត្តមសិក្សា។

សម្ដេចតេជោ បានជូនពរដល់ចៅរបស់សម្ដេចឱ្យទទួលបានជោគជ័យសម្រាប់ការសិក្សាលើមុខវិជ្ជាយោធា និងបន្តដោយមុខវិជ្ជាផ្សេងទៀត ពិសេសមុខវិជ្ជាសេដ្ឋកិច្ច និងវិទ្យាសាស្រ្តនយោបាយ។

គួរជម្រាបដែរថា លោក ហ៊ុន ច័ន្ទបញ្ញាបុត្រ គឺជាកូនប្រុសរបស់ឯកឧត្តមឧបនាយករដ្ឋមន្ត្រី ហ៊ុន ម៉ានី និងលោកជំទាវ យឹម ឆៃលីន៕