តំណាងអយ្យការសម្រេចចោទប្រកាន់ជនសង្ស័យ​៦នាក់ ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន

តំណាងអយ្យការអមសាលាដំបូងរាជធានីភ្នំពេញ កាលពីល្ងាចថ្ងៃទី៣០ ខែសីហា ឆ្នាំ២០២៤ បានសម្រេចចោទប្រកាន់លើជនសង្ស័យចំនួន៦នាក់ និងបក្ខពួក ពាក់ព័ន្ធករណីគ្រឿងញៀនជិត៤០០គីឡូក្រាម ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន និងបទសម្អាតប្រាក់ តាមមាត្រា ៤០ និងមាត្រា ៤៨ នៃច្បាប់ស្តីពីការត្រួតពិនិត្យគ្រឿងញៀន និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។

គួរបញ្ជាក់ថា កាលពីថ្ងៃទី២៤ ខែសីហា ឆ្នាំ២០២៤ កម្លាំងជំនាញនៃមន្ទីរប្រឆាំងបទល្មើសគ្រឿងញៀន (ក៤) សហការជាមួយស្នងការដ្ឋាននគរបាលរាជធានីភ្នំពេញ ដោយមានការដឹកនាំ និងសម្របសម្រួលដោយលោក គឹម ហុងសាន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចុះស្រាវជ្រាវស៊ើបអង្កេត រហូតឈានទៅបង្ក្រាបករណីរក្សាទុក ដឹកជញ្ជូន និងជួញដូរដោយខុសច្បាប់ នូវសារធាតុញៀន ស្ថិតនៅ០៤ទីតាំង នៅគោលដៅផ្សេងៗគ្នា។

គោលដៅទី១ នៅវេលាម៉ោង ១៥និង ៤០នាទី នៅចំណុចបណ្តោយផ្លូវលំ ភូមិជ្រៃកោង សង្កាត់ ចោមចៅទី២ខណ្ឌពោធិ៍សែនជ័យ រាជធានីភ្នំពេញ ។គោលដៅទី២នៅវេលាម៉ោង ១៦និង ៤០នាទី នៅចំណុចមុខស្ថានីយ៍ប្រេងឥន្ឋនៈ TOTAL ខណ្ឌពោធិ៍សែនជ័យ រាជធានីភ្នំពេញ។ គោលដៅទី៣ នៅវេលាម៉ោង ១៧ និង ៣០ នាទី នៅចំណុចផ្ទះលេខWG៧១ ផ្លូវលេខ៦ ភូមិទួលសំពៅ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ និងគោលដៅទី៤ វេលាម៉ោង ២០ និង ០១ នាទី នៅចំណុចផ្ទះលេខ១៦ដេ ផ្លូវលេខ២អា បុរីលឹមឈាងហាក់ហ្គ្រីនហួម ភូមិកំរៀង សង្កាត់កន្ទោក ខណ្ឌកំបូល រាជធានីភ្នំពេញ។

ក្នុងរង្វង់ប្រតិបត្តិការនេះ បានឃាត់ខ្លួនជនល្មើស ចំនួន៦នាក់ ក្នុងស្រី០២នាក់ ៖ ទី១៖ ឈ្មោះ ប៊ុន ម៉ាឡែន ភេទស្រី ជនជាតិខ្មែរ អាយុ៥១ឆ្នាំ, ទី២៖ ឈ្មោះ សេង គីម ភេទស្រី ជនជាតិខ្មែរ អាយុ២៦ឆ្នាំ, ទី៣៖ ឈ្មោះ រី សុខលិ ភេទប្រុស ជនជាតិខ្មែរ អាយុ ២៣ឆ្នាំ, ទី៤៖ ឈ្មោះ ដាំ ប្រុសពៅ ភេទប្រុស ជនជាតិខ្មែរ អាយុ ២៨ឆ្នាំ, ទី៥៖ ឈ្មោះ ជួន ចំរើន ភេទប្រុស ជនជាតិខ្មែរ អាយុ ៣៥ឆ្នាំ, និង៦៖ ឈ្មោះ អេង គីមសាយ ភេទប្រុស ជនជាតិខ្មែរ អាយុ ២៤ឆ្នាំ។ និងដកហូត វត្ថុតាងរួមមាន៖ គ្រឿងញៀនប្រភេទមេតំហ្វេតាមីន (ICE) ២៥៤ ២៩២. ៤០ក្រាម, គ្រឿងញៀនប្រភេទកេតតាមីន (Ketamine) ១២៧ ៦០៦.៨០ក្រាម, គ្រឿងញៀនហេរ៉ូអ៊ីន (Heroine) ៧៧០០ក្រាម សរុបគ្រឿងញៀនជិត៣៩០គីឡូក្រាម និង រថយន្ត Pruise ០១គ្រឿងផងដែរ៕

អត្ថបទ៖ សុភា