ព័ត៌មានអន្ដរជាតិ

រុស្ស៊ី ត្រៀមប្ដូរគោលការណ៍នុយក្លេអ៊ែរ ដោយសារការលូកដៃកាន់តែខ្លាំងរបស់លោកខាងលិច

បានផុស

២ ខែ មុន

នៅ

ថ្ងៃចន្ទ ២ កញ្ញា ២០២៤

ដោយ

Chheang

ប្រទេសរុស្សី នឹងកែប្រែគោលការណ៍របស់ខ្លួនលើការប្រើប្រាស់អាវុធនុយក្លេអ៊ែរ ដើម្បីដោះស្រាយនូវអ្វីដែលខ្លួនអះអាងថាជាការលូកដៃរបស់លោកខាងលិចកាន់តែខ្លាំងឡើងនៅក្នុងជម្លោះរវាងក្រុងមូស្គូ និងប្រទេសអ៊ុយក្រែន។ នេះបើយោងតាមការប្រកាសរបស់លោក Sergei Ryabkov អនុរដ្ឋមន្ត្រីការបរទេសរុស្ស៊ី ទៅកាន់ទីភ្នាក់ងារព័ត៌មានរដ្ឋ TASS កាលពីថ្ងៃទី១ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sergei Ryabkov បានរៀបរាប់ពីបច្ចុប្បន្នភាពនៃការដាក់ពង្រាយកងកម្លាំងនុយក្លេអ៊ែររបស់ប្រទេសរុស្ស៊ី ដោយនិយាយថា៖ «ការងារនេះស្ថិតក្នុងដំណាក់កាលទៅមុខ ហើយមានចេតនាច្បាស់លាស់ក្នុងការបង្កើតការកែតម្រូវ (ចំពោះគោលការណ៍នុយក្លេអ៊ែរ) ដែលបង្កឡើងក្នុងចំណោមបញ្ហាផ្សេងៗទៀតដោយការពិនិត្យមើល និងការវិភាគនៃការវិវឌ្ឍនៃជម្លោះនាពេលថ្មីៗនេះ»។

លោក Rybakov បានបន្ថែមថា ការផ្លាស់ប្តូរនេះគឺ «ជាប់ពាក់ព័ន្ធជាមួយនឹងដំណើរកើនឡើងនៃសត្រូវលោកខាងលិច» របស់រុស្ស៊ី នៅក្នុងជម្លោះអ៊ុយក្រែន ដែលវិមានក្រឹមឡាំងចាត់ទុកថាជា «ប្រតិបត្តិការយោធាពិសេស»។ យ៉ាងណា លោក Rybakov មិនបានបញ្ជាក់លម្អិតពីពេលវេលាជាក់លាក់ថាតើកំណែទម្រង់គោលការណ៍នុយក្លេអ៊ែរនឹងបញ្ចប់នៅពេលណានោះទេ។

លោក វ៉្លាឌឺមៀរ ពូទីន ប្រធានាធិបតីរុស្ស៊ី ធ្លាប់បានកែប្រែគោលការណ៍នុយក្លេអ៊ែរម្ដងរួចមកហើយកាលពីឆ្នាំ២០២០។ គោលការណ៍នោះ បានចែងថា រុស្ស៊ីអាចប្រើអាវុធនុយក្លេអ៊ែរជា «មធ្យោបាយនៃការរារាំង» នៅក្នុងព្រឹត្តិការណ៍រងការវាយប្រហារដោយនុយក្លេអ៊ែរពីសត្រូវ ឬក៏ការវាយប្រហារដោយមិនប្រើនុយក្លេអ៊ែរ ដែលគំរាមកំហែងដល់អត្ថិភាពនៃរដ្ឋ។

ប៉ុន្តែចាប់តាំងពីការលុកលុយអ៊ុយក្រែនក្នុងខែកុម្ភៈឆ្នាំ២០២២ សមាជិកមន្ត្រីរុស្ស៊ីបានជំរុញឲ្យលោក ពូទីន ផ្លាស់ប្តូរគោលការណ៍នេះ ដើម្បីកាត់បន្ថយកម្រិតនៃការប្រើប្រាស់អាវុធនុយក្លេអ៊ែរកុំឲ្យមានការថ្នាំងថ្នាក់ពីលោកខាងលិច។

មេដឹកនាំរុស្ស៊ី បាននិយាយថា គោលការណ៍នេះអាចកែប្រែ ដោយផ្អែកលើស្ថានភាពពិភពលោកដែលកំពុងវិវឌ្ឍ។

រដ្ឋាភិបាលក្រុងមូស្គូ បានចោទប្រកាន់លោកខាងលិចថាបានប្រើប្រាស់អ៊ុយក្រែនជាឧបករណ៍របស់ខ្លួននៅក្នុងសង្គ្រាមដើម្បីប្រឆាំងនឹងរុស្ស៊ី។ ប៉ុន្តែទាំងសហរដ្ឋអាមេរិក និងសម្ព័ន្ធមិត្តលោកខាងលិច បានបដិសេធការចោទប្រកាន់របស់រុស្ស៊ី ហើយនិយាយថា ពួកគេជួយអ៊ុយក្រែនការពារខ្លួនប្រឆាំងនឹងសង្រ្គាមឈ្លានពានបែបអាណានិគមដោយរុស្ស៊ីតែប៉ុណ្ណោះ៕

ដោយ៖ ឈាង