សន្តិសុខសង្គម

បុរសម្នាក់ ដើរទៅអើតមើលរថយន្តគេចតទុក ត្រូវសន្តិសុខយកដំបងវាយជើងរបួសធ្ងន់ ស្មានថាចោរ

បានផុស

៧ ខែ មុន

នៅ

ថ្ងៃចន្ទ ២ កញ្ញា ២០២៤

ដោយ

យុវជនម្នាក់ ដើរទៅអើតមើលរថយន្តគេចតទុក ត្រូវសន្តិសុខឃើញសង្ស័យស្មានថាជាចោរ ក៏យកដំបងវាយជើងបណ្ដាលឲ្យរងរបួសដេកដួលស្ដូកស្ដឹងនៅចិញ្ចើមផ្លូវស្តុបលូ ៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីវេលាម៉ោង ០៧ និង ៣០ នាទីព្រឹក ថ្ងៃទី ០២ ខែកញ្ញា ឆ្នាំ ២០២៤ ស្ថិតនៅតាមបណ្ដោយផ្លូវវេងស្រេង សង្កាត់ស្ទឹងមានជ័យទី ៣ ខណ្ឌមានជ័យ រាជធានីភ្នំពេញ។ បុរសរងរបួសមានឈ្មោះ ឡេង តយ អាយុ ២៦ ឆ្នាំ មុខរបរកម្មករដេរខោអាវស៊ីថ្ងៃ មានស្រុកកំណើតនៅឯខេត្តត្បូងឃ្មុំ។

បើយោងតាមការបញ្ជាក់ពីយុវជនរងគ្រោះខាងលើបានឲ្យដឹងថា ព្រឹកមិញនេះរូបគាត់បានដើរតាមបណ្ដោយផ្លូវ ៣៧១ សឡា ខណៈដើរហត់ពេកក៏បានឈប់សម្រាកក្បែររថយន្តមួយគ្រឿងដែលម្ចាស់ចតទុកនៅមុខការ៉ាស់សាំងមួយកន្លែង។ ខណៈនោះដែរ ក៏ស្រាប់តែមានសន្តិសុខយាមនៅទីនោះឃើញ ស្មានតែរូបគាត់បម្រុង និងលួចសម្ភារៈក្នុងរថយន្ត សន្តិសុខនោះ ក៏ទាញដំបងដែករលាស់វាយទៅលើជើងខាងស្ដាំជាច្រើនដំបង បណ្ដាលឲ្យបែកស្មងជើងរងរបួសធ្ងន់។ ភ្លាមៗ យុវជនរូបនោះ ក៏បានព្យាយាមដើររហូតដល់ស្តុបលូ ៥ នៅផ្លូវវេងស្រេង ទើបដេកដួលដើរទៅមុខលែងរួច។

បច្ចុប្បន្ន យុវជនខាងលើ ត្រូវបានប្រជាការពារដែលប្រចាំការនៅទីនោះជួយយកអាកុលលាងរបួស ដើម្បីសង្គ្រោះបឋម រួចក៏ទំនាក់ទំនងទៅកាន់អាជ្ញាធរមូលដ្ឋានដឹកយុវជនខាងលើទៅសង្គ្រោះនៅឯមន្ទីរពេទ្យ៕

អត្ថបទ ៖ ម៉េង